ކިޑްނީ ފެއިލްވެފައިވާ މީހުންނަށް ގޭގައި ހެދޭ ޕެރިޓޯނިއަލް ޑައިލިސިސްއާއެކު ކިޑްނީ ހަލާކުވާ ނިސްބަތް ދަށްކުރެވޭ ކަމަށް އައިޖީއެމްއެޗްގެ ކިޑްނީ ބަލީގެ ޚާއްޞަ ޑޮކްޓަރުން ވިދާޅުވެއްޖެއެވެ.

ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވާހަކަދައްކަވަމުން އައިޖީއެމްއެޗްގެ ކޮންސަލްޓެންޓް ސަބް-ސްޕެޝަލިސްޓް އިން ނެފްރޮލޮޖީ ޑރ. އަޙްމަދު ޝިހާމް ވިދާޅުވީ ރާއްޖެ ފަދަ ވަކި ރަށްތަކެއްގެ މައްޗަށް އެކުލެވޭ ޤައުމެއްގައި ކޮންމެ ރަށެއްގައި ޑައިލިސިސް ސެންޓަރެއް ތަރައްޤީކުރުމަކީ އެކަށީގެންވާ ކަމެއް ނޫން ކަމަށެވެ. ނަމަވެސް ޕެރިޓޯނިއަލް ޑައިލިސިސްއާއެކު އަމިއްލަ ގޭގައި މި ފަރުވާ ދެވޭނެ ކަމަށް ޑރ. ޝިހާމް ވިދާޅުވިއެވެ.

"ކިޑްނީ ބަލީގެ ސަބަބުން ކިޑްނީގެ ހަލާކު ނުވެ ހުންނަ މިންވަރު އެއީ 5 ޕަސެންޓުވިޔަސް 2 ޕަސެންޓުވިޔަސް އެބައި ސަލާމަތްކުރުމުގެ ފުރުސަތު އަދި ދިގު މުއްދަތަކަށް ބޭނުންކުރުމުގެ ފުރުސަތު އެބަ ބޮޑުވޭ ހީމޯ ޑައިލިސިސްއަށްވުރެ ބޮޑަށް ޕެރިޓޯނިއަލް ޑައިލިސިސްއާއެކު." ކަމަށް ޑރ. ޝިހާމް ވިދާޅުވިއެވެ.

ޕެރިޓޯނިއަލް ޑައިލިސިސްގައި ބަނޑަށް ޚާއްޞަ ކެތީޓަރެއް ލައްވައެވެ. މި ޑިވައިސް މެދުވެރިކޮށް ހަށިގަނޑުން ބޭރުކުރަންޖެހޭ ދިޔާ ޖަރާސީމުގެ ބައި ބޭރުކޮށްދެއެވެ. މިއީ އެއް ފަހަރު ލެއްވުމަށްފަހު ޢުމުރަށް ބޭނުންކުރާ ޑިވައިސެކެވެ. ބަލި މީހާއަށް އަމިއްލައަށް ޑައިލިސިސް ހެދުމަށް 5 ދުވަހުގެ ތަމްރީނު ދެވެއެވެ.

އެ ޕްރޮގްރާމްގައި ވާހަކަދައްކަވަމުން ކޮންސަލްޓެންޓް ސަބް-ސްޕެޝަލިސްޓް އިން ނެފްރޮލޮޖީ ޑރ. އަޙްމަދު ޢަބްދުﷲ ވިދާޅުވީ ސަރުކާރު ހޮސްޕިޓަލްތަކުގެ ތެރެއިން މި ޚިދުމަތް މިވަގުތު ފޯރުކޮށްދެނީ ހަމައެކަނި އައިޖީއެމްއެޗުން ކަމަށެވެ. ނަމަވެސް ރާއްޖޭގެ ކޮންމެ ރަށެއްގައި ހުރި މީހަކަށް ވެސް މި ޚިދުމަތް ލިބޭނެ ކަމަށް ވިދާޅުވިއެވެ. ނަރުހުންނަށް ރާއްޖެ އަދި އިންޑިއާގައި ވެސް ތަމްރީނު ފޯރުކޮށްދީފައިވާ ކަމަށް ޑރ. އަޙްމަދު ވިދާޅުވިއެވެ.

ރާއްޖޭގައި ކިޑްނީގެ ބަލިތައް އާންމުވަމުންދާއިރު ދާއިމީ ބޮޑެތި ބަލިތަކުގެ ތެރެއިން އާސަންދަ މެދުވެރިކޮށް އެންމެ ގިނަ މީހުން ޚިދުމަތް ހޯދާ އެއް ބައްޔަކީ ކިޑްނީ ބައްޔެވެ.