އިސްތިއުމާރީ އިސްރާއީލުގެ ސިފައިން އިސްތިއުމާރު ކޮށްފައިވާ ހުޅަނގު އައްސޭރީގެ އެކި ސަރަހައްދުތަކަށް ވަދެ ހިންގި ރެއިޑުތަކެއްގައި ކުރީގެ ހައްޔަރީން ހިމެނޭ ގޮތަށް 21 ފަލަސްޠީނުގެ ރައްޔިތުން ހައްޔަރުކޮށްފިއެވެ.
ހުޅަނގު އައްސޭރީގެ ދެކުނުގައި އޮންނަ ޚަލީލް (ހެބްރޯން) ގެ ދެކުނުން އޮންނަ އަލް ފައްވާރު ރެފިއުޖީ ކޭމްޕަށް ވަދެ ގިނަ ގެތަކެއް ބަލައި ފާސްކޮށް ގާތްގަނޑަކަށް 25 ފަލަސްޠީނީން ހިފެހެއްޓައި ފީލްޑް އިންޓެރޮގޭޝަނަށް ހާޒިރުކުރި ކަމަށް ޕްރިޒަނާޒް މީޑިއާ އޮފީހުން ބުނެފައިވެއެވެ. އެ މީހުންގެ ތެރެއިން ގިނަ ބަޔަކު ދޫކޮށްލި ނަމަވެސް ހަ މީހަކު ހައްޔަރުގައި ބައިތިއްބާފައިވެއެވެ.
ބެއިތުލަހަމް ގަވަރުނަރޭޓުން 11 ފަލަސްޠީނީން ހައްޔަރުކޮށްފައިވާއިރު އޭގެ ތެރޭގައި ޢައިދާ ރެފިއުޖީ ކޭމްޕުގެ ފަތަޙް ޖަމާޢަތުގެ ސެކްރެޓަރީ އަދި ކުރީގެ ހައްޔަރީ މަރުވާން މަޙުމޫދު ފަރާރުޖާ ހިމެނެއެވެ. އުތުރު ހުޅަނގު އައްސޭރީގެ ނާބުލުސް ކައިރީ ކަފްރު ޤަލީލުންނާއި ޠޫބާސް ގަވަރުނަރޭޓުގެ ތައްމޫނުން ދެ މީހަކު އަދި ޠޫލްކަރިމް ގަވަރުނަރޭޓުން ދެ ފަލަސްޠީނު ރައްޔިތުން ހައްޔަރުކޮށްފައިވެއެވެ.
"ގިނަ ގަވަރުނަރޭޓުތަކެއްގައި އެއް ވަގުތެއްގައި ފުޅާ ދާއިރާއެއްގައި ހައްޔަރުކުރުމުގެ ކެމްޕެއިންތައް ހިންގުމަކީ ފަލަސްޠީނީންނާ ދެކޮޅަށް ޚާއްޞަކޮށް ކުރީގެ ހައްޔަރީންނާއި ޙަރަކާތްތެރީންނާ ދެކޮޅަށް ރޭގަނޑުގެ ރެއިޑުތަކާއި ފީލްޑް އިންޓެރޮގޭޝަންތައް ހިންގައިގެން އިސްތިއުމާރީ ބާރުގެ ސިޔާސަތު ވަރުގަދަކުރަމުންދާ ކަމުގެ ހެއްކެއް" ކަމަށް ޕްރިޒަނާޒް މީޑިއާ އޮފީހުން ބުނެފައިވެއެވެ.
ވަކިން ހިނގި ހާދިސާއެއްގައި ޖެނީންގެ އިރުމަތީ އަރުބޫނާ އަވަށުގެ ފަލަސްޠީނީ ޒުވާނެއް ޓެލެގްރާމް ގުރޫޕެއް މެދުވެރިކޮށް އިސްރާއީލު ސިފައިންގެ ހަރަކާތްތައް ބެލުމުގެ ތުހުމަތުގައި ހައްޔަރުކޮށް އޭނާ ލައްވައި ގަދަކަމުން ވީޑިއޯ މެސެޖެއް ރެކޯޑުކުރުވި ކަމަށް ދައުރުވާ ވީޑިއޯއަކުން ހާމަވެފައިވެއެވެ. އެ ވީޑިއޯގައި ދެ ސިފައިން ބަޑި އަމާޒުކޮށް "ކެޕްޓަން ޔޫސުފް" ގެ ނަމުން ފާހަގަކުރެވޭ ސިފައިންގެ މީހެއް ވީޑިއޯ ކުރާ މަންޒަރު ފެނެއެވެ. "ގުރޫޕުގައި ހިމެނޭ ކޮންމެ މީހެއް އަހަންނަށް އެނގޭ ސިފައިންގެ ވީޑިއޯ ނެގި ކޮންމެ މީހެއް ވެސް އެނގޭ" ކަމަށް އެ އިސްރާއީލު އޮފިސަރު ބުނެފައިވެއެވެ.
2023 ވަނަ އަހަރުގެ އޮކްޓޫބަރު މަހުން ފެށިގެން ހުޅަނގު އައްސޭރީގައި ހިންގާ ޢުދުވާނުގައި 1173 ފަލަސްޠީނީން ޝަހީދުވެ 12666 މީހުން ޒަޚަމްވެ ގާތްގަނޑަކަށް 23000 މީހުން ހައްޔަރުކޮށް 33000 މީހުން ގެދޮރުން ބޭރުކޮށްފައިވާ ކަމަށް ފަލަސްޠީނުގެ ރަސްމީ ތަފާސް ހިސާބުތަކުން ދައްކައެވެ.
Advertisement
This content is created and paid for by advertisers and does not involve Voice Journalists
