ހިނގާބިނގާވެ އުޅުމުގައި ދަތިވެފައިވާ ފަރާތްތަކަށް ބޭންކް އޮފް މޯލްޑިވްސްއިން 30 ވީލްޗެއާ ހަދިޔާކޮށްފިއެވެ.
ބީއެމްއެލުން މިފަހަރުވެސް ވީލްޗެއާ ހަދިޔާކޮށްފައިވަނީ ރާއްޖޭގެ އެކި ސަރަހައްދުތަކުގައި ދިރިއުޅެމުންދާ ފަރާތްތަކަށެވެ. ބީއެމްއެލުން ބުނީ 2017 ވަނަ އަހަރުން ފެށިގެން ކުރިއަށްގެންދާ މި ޕްރޮގްރާމުގައި މިހާތަނަށް 105 އަށްވުރެ ގިނަ ރަށުގައި ދިރިއުޅެމުންދާ 360 ހަށްވުރެ ގިނަ ފަރާތްތަކަށް ވީލްޗެއާ ހަދިޔާ ކޮށްފައިވާކަމަށެވެ.
ބީއެމްއެލުން މިފަހަރު ހަދިޔާކުރި ވީލްޗެއާގެ ތެރޭގައި، އަމިއްލައަށް ދުއްވޭ މޮޓޮރައިޒްޑް ވީލްޗެއާގެ އިތުރުން، ހާއްސަ 'މެނުއަލް' ވީލްޗެއާ ހިމެނެއެވެ. މެނުއަލް ވީލްޗެއާތަކަކީ އަމިއްލައަށް ހިނގާބިނގާވެ އުޅުމުގައި އާއިލާގެ ނުވަތަ އެހީތެރިންގެ އެހީތެރިކަން ބޭނުންވާ ކުޑަކުދިންނާއި ބޮޑެތި މީހުންނަށް ހާއްސަކޮށްގެން ފަރުމާކޮށްފައިވާ ވީލްޗެއާތަކެކެވެ.
ވީލްޗެއާ ހަދިޔާކުރުމުގެ މި ޕްރޮގްރާމް ކުރިއަށްގެންދަނީ ބޭންކް އޮފް މޯލްޑިވްސްގެ އިޖުތިމާއީ ޒިންމާގެ ދަށުންނެވެ. މި ޕްރޮގްރާމްގެ މައިގަނޑު މަގުސަދަކީ މި އެހީ ލިބޭ ފަރާތްތަކަށާއި އެ ފަރާތްތަކުގެ އާއިލާތަކުގެ ދިރިއުޅުމުގެ ފެންވަރު ރަނގަޅުކޮށް، މިނިވަންކަމާއެކު އުޅުމުގެ ފުރުސަތު ފަހިކޮށްދިނުންކަމަށް ބީއެއެލުން ބުނެއެވެ.
Advertisement
This content is created and paid for by advertisers and does not involve Voice Journalists
