ވެނެޒުއޭލާގެ ވެރިރަށް ކަރަކަސް ހިމެނޭހެން އެ ގައުމުގެ އެކި ސަރަހައްދުތަކަށް ޖެހިޖެހިގެން އައި ބާރުގަދަ ދެ ބިންހެލުމެއްގައި ގިނަ އިމާރާތްތަކެއް ބިމާހަމަވެ، އެތައް ހާސް ބަޔަކު މަރުވެފައިވާނެ ކަމުގެ ބިރު ބޮޑުވެއްޖެއެވެ.

ޔޫއެސް ޖިއޮލޮޖިކަލް ސާވޭ (ޔޫއެސްޖީއެސް) އިން މައުލޫމާތުދޭ ގޮތުގައި، ބުދަ ދުވަހުގެ ރޭ ފުރަތަމަ އައީ 7.2 މެގްނިޓިއުޑްގެ ބިންހެލުމެކެވެ. މި ބިންހެލުން އައީ ކަރަކަސްއާ 284 ކިލޯމީޓަރު ދުރުގައި އޮންނަ ސަން ފެލީޕޭ ކައިރިއަށެވެ. އޭގެ ކުޑަވަގުތުކޮޅެއް ފަހުން، ކަރަކަސްގެ ހުޅަނގުން 293 ކިލޯމީޓަރު ދުރުގައި އޮންނަ ޔުމާރޭ ކައިރިއަށް 7.5 މެގްނިޓިއުޑްގެ ދެވަނަ ބިންހެލުން އައިސްފައިވެއެވެ.

މި ހާދިސާއާ ގުޅިގެން ވެނެޒުއޭލާގެ ވަގުތީ ރައީސް ޑެލްސީ ރޮޑްރިގޭޒް ވަނީ މުޅި ގައުމުގައި ކުއްލި ނުރައްކަލުގެ ހާލަތު އިއުލާން ކުރައްވާފައެވެ. ގައުމާ މުހާތަބު ކުރައްވަމުން ރޮޑްރިގޭޒް ވިދާޅުވީ ލިބުނު ގެއްލުންތައް ބަލަމުންދާ ކަމަށެވެ. ނަމަވެސް، މަރުވި ނުވަތަ އަނިޔާވި މީހުންގެ ރަސްމީ އަދަދެއް އަދި ހާމައެއް ނުކުރައްވައެވެ.

ޔޫއެސްޖީއެސް އިން އަންދާޒާ ކުރާ ގޮތުގައި މި ބިންހެލުމުގައި 10،000 އާއި 100،000 އާ ދެމެދުގެ އަދަދަކަށް މީހުން މަރުވުން އެކަށީގެންވެއެވެ.

އިންޓީރިއާ މިނިސްޓަރު ދިއޮސްޑާޑޯ ކަބެއްލޯ ވިދާޅުވީ ސަލާމަތީ ފައުޖުތަކާއި، ފަޔާ ބްރިގޭޑް އަދި މަދަނީ އެހީތެރިކަން ފޯރުކޮށްދޭ ހުރިހާ އިދާރާތަކެއް މިހާރު ހަރަކާތްތެރިވަމުންދާ ކަމަށެވެ.

"ގިނަ އަދަދެއްގެ އިމާރާތްތަކާއި ގެދޮރު ވަނީ ވެއްޓިފައި. އަޅުގަނޑުމެން އަތުގައި ހުރި ހުރިހާ ވަސީލަތެއް ބޭނުންކޮށްގެން މީހުން ސަލާމަތް ކުރުމުގެ މަސައްކަތް ދަނީ ކުރަމުން،" ދައުލަތުގެ ޓީވީ މެދުވެރިކޮށް އޭނާ ވިދާޅުވިއެވެ.

ޚާއްޞަކޮށް ކަރަކަސްގެ އަލްޓަމީރާ ސަރަހައްދުގެ ހާލަތު ވަރަށް ނުރައްކާ ކަމަށާއި، އެ ސަރަހައްދުގެ ގިނަ އިމާރާތްތަކެއް ވެއްޓިފައިވާ ކަމަށް ކަބެއްލޯ ފާހަގަކުރެއްވިއެވެ. އަދި އެމްބިއުލާންސްތަކާއި އެހީ ފޯރުކޮށްދޭ އުޅަނދުތަކަށް މަގުދެއްކުމަށްޓަކައި މަގުތައް ހުސްކުރުމަށް އާންމުންނަށް ވަނީ އިލްތިމާސްކޮށްފައެވެ.

ބިންހެލުން އައި ވަގުތަކީ ވެނެޒުއޭލާގެ މިނިވަންކަމުގެ ހަނގުރާމައިގެ މުހިންމު ކާމިޔާބީއެއް ފާހަގަކުރުމުގެ ބަންދު ދުވަހަކަށް ވުމުން، ގިނަ ބަޔަކު ތިބީ ގޭގައެވެ. ބިންހެލުން އިހްސާސްވި މީހުން ބުނާ ގޮތުގައި އެއް މިނެޓަށް ވުރެ ކުރު ވަގުތުކޮޅެއްގެ ތެރޭގައި ދެ ބިންހެލުން އައުމުން ލިބުނު ސިހުން ވަރަށް ބޮޑެވެ.

ކަރަކަސްގެ މައި އެއާޕޯޓް ކަމަށްވާ ސައިމަން ބޮލިވާ އިންޓަނޭޝަނަލް އެއާޕޯޓަށް ބޮޑެތި ގެއްލުންތަކެއް ލިބި، މިހާރު ވަނީ ބަންދުކޮށްފައެވެ. ސޯޝަލް މީޑިއާގައި ދައުރުވާ ވީޑިއޯތަކުން ފެންނަ ގޮތުގައި އެއާޕޯޓުގެ ފުރާޅުން ބައިތައް ވެއްޓެމުން ދިޔައިރު މީހުން ދިޔައީ ރައްކާތެރިކަން ހޯދުމަށް ދުވަމުންނެވެ.

ސައިންސްވެރިން ބުނާ ގޮތުގައި ވެނެޒުއޭލާއަށް މިހާ ބޮޑު ގެއްލުމެއް ލިބުނީ އެ ގައުމު އޮންނަ ސަރަހައްދުގެ ބިމުގެ އަޑީގެ ފަށަލަތަކުގެ ގޮތުންނެވެ. ޚާއްޞަކޮށް ކަރަކަސް އޮންނަނީ ބިންހެލުމުގެ ލޮޅުންތައް އިތުރަށް ވަރުގަދަކޮށްދޭ ފަދަ ބިމެއްގެ މަތީގައި ކަމަށް ކަމާބެހޭ މާހިރުން ފާހަގަކުރެއެވެ.