ފީފާ ވޯލްޑް ކަޕް 2026 އާ ދިމާކޮށް އުރީދޫ މޯލްޑިވްސްއިން ކުރިއަށް ގެންދިޔަ "އުރީދޫ ނޭޝަން ކަޕް 2026" އެފްސީ 26 އީ-ސްޕޯޓްސް މުބާރާތުގެ ޗެމްޕިއަންކަން ދެކުނު ކޮރެއާ ތަމްސީލުކުރި މުޙައްމަދު ޒަމީލް ޒިހުނީ ހޯދައިފިއެވެ.

މި މުބާރާތުގައި ރާއްޖޭގެ މޮޅު 48 އެފްސީ 26 ކުޅުންތެރިން ބައިވެރިވެފައިވެއެވެ. ކޮންމެ ކުޅުންތެރިއަކުވެސް ތަމްސީލުކޮށްފައި ވަނީ ފީފާ ވޯލްޑް ކަޕް 2026 ގައި ވާދަކުރާ 48 ޤައުމުގެ ތެރެއިން ޤައުމެކެވެ. އެގޮތުން ދުނިޔޭގެ އެންމެ ބޮޑު ފުޓްބޯޅަ މުބާރާތުގެ ފޯރިއާއި ރޫޙު ދައްކުވައިދިން ތަފާތު މުބާރާތެއް ކަމަށް އުރީދޫ މޯލްޑިވްސްއިން ބުނެފައިވެއެވެ.

ވާދަވެރި މެޗުތަކަކަށް ފަހު ޗެމްޕިއަންކަން ހޯދި ޒަމީލް މުޅި މުބާރާތުގައިވެސް ވަނީ މޮޅު ކުޅުމެއް ދައްކައިފައެވެ. މުބާރާތުގެ ރަނަރއަޕް މަޤާމު ހޯދީ ސައުދީ އަރަބިއްޔާ ތަމްސީލުކުރި ޢަބްދުﷲ މާހިލެވެ. ތިންވަނަ (ސެކަންޑް ރަނަރއަޕް) ލިބުނީ އޮސްޓްރިއާ ތަމްސީލުކުރި ޒަކްވާން ޝިހާދަށެވެ.

ވަނަވަނައަށް ދިޔަ ފަރާތްތަކަށް ފައިސާގެ އިނާމާއި ހައިސެންސް ސްމާޓް ޓީވީ ދީފައިވެއެވެ. ޗެމްޕިއަން ޒަމީލަށް 8,000 ރުފިޔާ ތަށި ހައިސެންސް 75 އިންޗީގެ ޔޫއެޗްޑީ 4ކޭ ވިޑާ ސްމާޓް ޓީވީ އަދި ވޯލްޑް ކަޕް ރެޕްލިކާއެއް ލިބިފައިވެއެވެ. ރަނަރއަޕް މާހިލަށް 5,000 ރުފިޔާ ތަށި އަދި ހައިސެންސް 65 އިންޗީގެ ޔޫއެޗްޑީ 4ކޭ ވިޑާ ސްމާޓް ޓީވީއެއް ލިބުނުއިރު ތިންވަނައަށް ދިޔަ ޒަކްވާނަށް 2,000 ރުފިޔާ ތަށި އަދި ހައިސެންސް 55 އިންޗީގެ ޔޫއެޗްޑީ 4ކޭ ވިޑާ ސްމާޓް ޓީވީއެއް ލިބިފައިވެއެވެ.

މި މުބާރާތަކީ އުރީދޫ މޯލްޑިވްސްއިން ވޯލްޑް ކަޕާ ދިމާކޮށް މުޅި ރާއްޖޭގައި ކުރިއަށް ގެންދާ ފުޓްބޯޅަ ފޯރީގެ ކެމްޕޭނުގެ ބައެކެވެ. އެ ކެމްޕޭނުގެ ތެރެއިން ފުޓްބޯޅަ ސަޕޯޓަރުންނަށް ޚާއްޞަ ޕްރޮމޯޝަންތަކާއި ޑިޖިޓަލް ތަޖުރިބާތަކާއި އީ-ސްޕޯޓްސް މުބާރާތްތައް މެދުވެރިކޮށް ފޯރިގަދަ މާޙައުލެއް ބިނާކުރުމަށް މަސައްކަތް ކުރަމުންދާ ކަމަށް އެ ކުންފުނިން ބުނެފައިވެއެވެ.

އުރީދޫ މޯލްޑިވްސްއިން ބުނެފައިވާ ގޮތުގައި މި ފަދަ ޙަރަކާތްތައް މެދުވެރިކޮށް ގޭމިންގް ދާއިރާގެ ހުނަރުވެރިންނަށް ފުރުޞަތުތައް ފަހިކޮށްދީ އިޖުތިމާޢީ ގުޅުން ބަދަހިކޮށް ފުޓްބޯޅައަށް ދިވެހިންގެ ހިތްތަކުގައި އޮތް ލޯބި ފާހަގަކުރުމަށް ވާދަވެރި މައިދާންތައް ތަނަވަސްކޮށްދީ ރާއްޖޭގެ އީ-ސްޕޯޓްސް ދާއިރާ ކުރިއެރުވުމަށް މުހިންމު މަސައްކަތްތަކެއް އެ ކުންފުނިން ކުރަމުން ގެންދެއެވެ.

އެ ކުންފުނިން ވަނީ މި މުބާރާތުގެ ހުރިހާ ބައިވެރިންނަށާއި ވަނަވަނައަށް ދިޔަ ފަރާތްތަކަށް މަރުޙަބާ ކިޔައިފައެވެ.