މާލޭގެ އިތުރުން އަތޮޅުތެރޭގެ އާބާދީ ބޮޑެތި ރަށްރަށުގައި މިފްކޯގެ ފިހާރަތައް ހުޅުވުމުގެ މަސައްކަތް ކުރަމުން އަންނަ ކަމަށް އެ ކުންފުނީގެ ޗީފް އޮޕަރޭޓިން އޮފިސަރ ހާމިދު ނަޒީމު އިބްރާހީމް ވިދާޅުވެއްޖެއެވެ.
ޕީއެސްއެމް ނިއުސްއަށް ދެއްވި ޚާއްޞަ އިންޓަވިއުއެއްގައި ސީއޯއޯ ވިދާޅުވީ ފިހާރަތައް ހުޅުވުމުގައި ބޮޑަށް އިސްކަން ދޭނީ ސިޓީތަކަށާއި އާބާދީ ބޮޑެތި ރަށްރަށަށް ކަމަށެވެ. މި މަސައްކަތުގެ ތެރެއިން މި އަހަރުގެ މެއި މަހު އަތޮޅުތެރޭގައި ހުޅުވި މިފްކޯގެ ފުރަތަމަ އައުޓްލެޓް ވަނީ އައްޑޫ ސިޓީ ހިތަދޫގައި ހުޅުވައިފައެވެ.
"އަޅުގަނޑުމެންގެ ވިސްނުމަކީ ރާއްޖޭގެ އާބާދީ ބޮޑު ރަށްރަށުގައި މިފްކޯގެ ފިހާރަތައް ހުޅުވާ އަދި މިފްކޯގެ އުފެއްދުންތައް އާންމު ރައްޔިތުންނާ ހަމައަށް އަގުހެޔޮކޮށް އަދި ލުއިފަސޭހަކޮށް ފޯރުކޮށްދިނުން." ކަމަށް ސީއޯއޯ ވިދާޅުވިއެވެ.
ރާއްޖޭގެ ރަށްރަށުގައި ފިހާރަތައް ޤާއިމުކުރުމުގެ އިތުރުން ދިވެހީން އާންމުކޮށް އުޅޭ ޤައުމުތަކުގައި ވެސް މިފްކޯގެ އުފެއްދުންތައް ލިބޭނެ އިންތިޒާމު ހަމަޖެއްސުމުގެ މަސައްކަތް އެ ކުންފުނިން އަންނަނީ ކުރަމުންނެވެ. އެ ގޮތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ސްރީލަންކާއަށް ކުރެއްވި ރަސްމީ ދަތުރުފުޅުގެ ތެރެއިން ވަނީ މިފްކޯގެ އައުޓްލެޓެއް ލަންކާގައި ހުޅުވައިފައެވެ.
ސްރީލަންކާގައި އިފްތިތާޙްކޮށްފައިވާ ބާވަތްތަކުގެ ތެރޭގައި ފަސްމީރު ބްރޭންޑުގެ ވަޅޯމަހާއި އެކި ބާވަތްތަކުގެ މަސްދަޅާއި ރިހާކުރާއި ޕެކެޓުގައި ބަންދުކޮށްފައި ހުންނަ މުގުރި މަސް ހިމެނެއެވެ.
Advertisement
This content is created and paid for by advertisers and does not involve Voice Journalists
