މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން އަމިއްލަ އިސްނެގުމުގައި އާންމުކުރަންޖެހޭ މައުލޫމާތުތައް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ވެބްސައިޓުގައި އާންމުކޮށްފިއެވެ.
އެ ކުންފުނިން ބުނި ގޮތުގައި ސަރުކާރު ހިއްސާވާ ކުންފުނިތަކުގެ ތެރެއިން މިކަން ކުރި ފުރަތަމަ ކުންފުންޏަކީ އެޗްޑީސީއެވެ.
އެޗްޑީސީން ނެރުނު ބަޔާނުގައިވާ ގޮތުން އާރުޓީއައި ގާނޫނުގެ 37 ވަނަ މާއްދާގައި ދައުލަތުގެ މުއައްސަސާތަކުން އަމިއްލަ އިސްނެގުމުގައި 13 ބާވަތެއްގެ މައުލޫމާތު ހާމަކުރުން ލާޒިމުކޮށްފައިވެއެވެ. އޭގެ ތެރޭގައި އިދާރާގެ މަސްއޫލިއްޔަތުތަކާއި އޮނިގަނޑާއި ވާޖިބުތަކާއި އަހަރީ ބަޖެޓާއި ރާވާފައިވާ ހަރަދުތަކާއި މުވައްޒަފުންނަށް ވަކިވަކިން ދޭ އުޖޫރައާއި ނިންމުންތައް ނިންމާ މަރުހަލާތައް ހިމެނެއެވެ.
އެ ކުންފުނިން ބުނީ މިއީ ރައްޔިތުންގެ މަސްލަހަތަށްޓަކައި މަދުވެގެން އަހަރަކު އެއްފަހަރު އާންމުކުރަން ގާނޫނުން ލާޒިމުކުރާ މައުލޫމާތު ކަމަށެވެ. މި މައުލޫމާތު ފަސޭހައިން ބެލޭ ގޮތް ހެދުމަށްޓަކައި އެ ކޯޕަރޭޝަނުގެ ރަސްމީ ވެބްސައިޓުގައި ހާއްސަ އިންފޮމޭޝަން ޑައިރެކްޓްރީއެއް ވަނީ ގާއިމުކޮށްފައެވެ.
އެޗްޑީސީން އިތުރަށް ބުނި ގޮތުގައި ސަރުކާރުގެ ހުރިހާ ވުޒާރާތަކުން ވެސް މިހާރު މި މައުލޫމާތު އާންމުކޮށްފައިވާ ކަމަށާއި މިއީ 2014 ވަނަ އަހަރު މި ގާނޫނަށް އަމަލުކުރަން ފެށި ފަހުން ދައުލަތުގެ އިދާރާތަކުން މި ގޮތަށް މައުލޫމާތު ހާމަކުރި ފުރަތަމަ ފަހަރެވެ. އެ ކުންފުނިން ބުނީ އަބަދުވެސް މަސައްކަތް ކުރަނީ ވީހާ ވެސް ހާމަކަން ބޮޑު ގޮތެއްގައި ކުންފުނީގެ ކަންކަން ހިންގައި ރައްޔިތުންނަށް ރަނގަޅު ހިދުމަތެއް ފޯރުކޮށްދިނުމަށް ކަމަށެވެ.
Advertisement
This content is created and paid for by advertisers and does not involve Voice Journalists
