ހުޅުމާލޭ ސެންޓްރަލް ޕާކުގައި ޖުލައި 2 އިން 4 އަށް ބާއްވާ މޯލްޑިވްސް ފައިނޭންޝަލް އެކްސްޕޯ 2026 ގައި އުރީދޫ މޯލްޑިވްސްގެ ފިންޓެކް ޚިދުމަތްތައް ދައްކާލާނެ ކަމަށް އެ ކުންފުނިން ހާމަކޮށްފިއެވެ.

މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އިންތިޒާމުކުރާ މި އެކްސްޕޯގައި އުރީދޫގެ ސްޓޯލުން ދައްކާލާ ޚިދުމަތްތަކުގެ ތެރޭގައި ދާދިފަހުން ތަޢާރަފުކުރި އެމް-ފައިސާ އާއި ޕޭޕަލް ގުޅާލުމުގެ ޚިދުމަތް ހިމެނެއެވެ. މި ޚިދުމަތުގެ ސަބަބުން ކަސްޓަމަރުންނަށް ޕޭޕަލް މެދުވެރިކޮށް ލިބޭ ޑޮލަރުގެ ފައިސާ ސީދާ އެމް-ފައިސާ ވޮލެޓަށް ޖަމާކުރެވެއެވެ.

އެ ކުންފުނިން ބުނި ގޮތުގައި މިއީ ފްރީލާންސަރުންނާއި އަމިއްލަ މަސައްކަތްކުރާ ފަރާތްތަކާއި ކުދި އަދި މެދު ފަންތީގެ ވިޔަފާރިތަކަށް ޑިޖިޓަލް އިޤުތިޞާދުގައި ބައިވެރިވުމަށް ލިބޭ ބޮޑު ފުރުޞަތެކެވެ.

މީގެ އިތުރުން އުރީދޫ މޯލްޑިވްސްގެ ހެޑް އޮފް ފިންޓެކް އަޙްމަދު ނޫމާން ޑިޖިޓަލް ޕޭމަންޓްތަކާއި މާލީ އީޖާދުތަކުގެ މުސްތަޤުބަލާ ބެހޭ ގޮތުން ބާއްވާ ޕެނަލް މަޝްވަރާއެއްގައި ބައިވެރިވެވަޑައިގަންނަވާނެއެވެ.

މި މަޝްވަރާގައި ޑިޖިޓަލް މާލީ ޚިދުމަތްތަކުގެ ސަބަބުން މާލީ ދާއިރާގައި އެންމެންގެ ބައިވެރިވުން އިތުރުވަމުންދާ ގޮތާއި ބައިނަލްއަޤުވާމީ ބާޒާރުތަކަށް މަގުފަހިވަމުންދާ ގޮތުގެ މައްޗަށް ތަޖުރިބާ ޙިއްޞާކުރައްވާނެއެވެ.

ކޮންމެ ދުވަހަކު ހަވީރު 3:00 އިން ރޭގަނޑު 10:00 އަށް ކުރިއަށްދާ މި އެކްސްޕޯގެ އުރީދޫ ސްޓޯލަށް ޒިޔާރަތްކުރުމަށް އެ ކުންފުނިން ވަނީ ޢާންމުންނަށް ދައުވަތު އަރުވައިފައެވެ.

އުރީދޫއިން ބުނިގޮތުގައި، މިއީ އެމް-ފައިސާއާ ބެހޭ އިތުރު މަޢުލޫމާތު ހޯދުމަށާއި، އުރީދޫގެ ފުޅާވަމުންދާ ޑިޖިޓަލް މާލީ ނިޒާމުގެ އެހީގައި ރާއްޖޭގެ އެކި ކަންކޮޅުތަކުގައި ތިބި އަމިއްލަ ފަރުދުންނާއި ވިޔަފާރިތަކަށް ކުރިއެރުން ލިބެމުންދާ ގޮތް ދެނެގަތުމަށް ލިބޭ ރަނގަޅު ފުރުޞަތެކެވެ.