ނޭވާ ހިފަހައްޓާލަން ޖެހުނު 75 މިނެޓަށްފަހު ވަރލްޑްކަޕް ގަދަ 16 ގެ ޖާގައެއް އިނގިރޭސިން ހޯދައިފިއެވެ.

ވަރލްޑްކަޕް ނޮކްއައުޓް ބުރުގައި އިނގިރޭސިން ރޭ ނިކުތީ ޑިމޮކްރެޓިކް ރިޕަބްލިކް އޮފް ކޮންގޯ އާ ދެކޮޅަށެވެ. ފޯރިގަދަ ކުޅުމެއް ފެނިގެންދިޔަ މިމެޗް އިނގިރޭސިން ކާމިޔާބުކުރިނަމަވެސް މެޗްގެ ބޮޑު ބައި ލީޑްގައި އޮތީ ކޮންގޯއެވެ. ކޮންގޯއިން ލަނޑު ޖަހާފައިވަނީ، މެޗުގެ ހަތްވަނަ މިނެޓުގައި ބްރަޔަން ސިޕެންގާ ކާމިޔާބުކޮށްދިން ލަނޑުންނެވެ. މިއީ އިނގިރޭސިންގެ ޑިފެންސްލައިނަށް ހެދުނު ގޯހެއްގެ ފައިދާ ނަގައި ސިޕެންގާ ޖެހި ލަނޑެކެވެ.

މި ލަނޑަށްފަހު ފުރަތަމަ ހާފް ނިމުނީވެސް ކޮންގޯ ކުރީގައި އޮވެގެންނެވެ. ދެވަނަ ހާފްގައި އިނގިރޭސިވިލާތުގެ ކޯޗް ތޯމަސް ޓުޗިލް ވަނީ ޓީމަށް ބަދަލުތަކެއް ގެނެސްފައެވެ. ނަތީޖާއަކަށް ވެގެން ދިޔައީ، މެޗުގެ ފަހު 15 މިނެޓަށް ވެފައިވަނިކޮށް، ބަދަލު ކުޅުންތެރިއެއްގެ ގޮތުގައި ކުޅެން ނިކުތް އެންތަނީ ގޯޑަން ތަނަވަސްކޮށްދިން ފުރުސަތަކުން ހަރީ ކޭން ލަނޑެއް ޖެހުމެވެ. 

މެޗްގައި ހަރީކޭންގެ ފުރަތަމަ ލަނޑު ފެނިގެން ގޮސްފައިވަނީ މެޗްގެ ފަހު ފަނަރަ މިނެޓަށް ވީފަހުންނެވެ. ފުރަތަމަ ލަނޑު 75 ވަނަ މިނެޓް ތެރޭގައި ޖެހިއިރު، މެޗުން މޮޅުވި ލަނޑު ކޭން ޖަހާފައިވަނީ 86 ވަނަ މިނެޓް ތެރޭގައެވެ. ކޭންގެ މި ދެ ލަނޑާއެކު މި މުބާރާތުގައި މިހާތަނަށް އޭނާ ޖެހި ލަނޑުގެ އަދަދު ވަނީ 5 ކަށް އަރާފައެވެ.

މިއީ ވަރލްޑްކަޕްގެ ތާރީހުގައިވެސް ނޮކްއައުޓް ސްޓޭޖުގައި ކޮންގޯ ކުޅުނު ފުރަތަމަ ފަހަރެވެ. ވަރލްޑްކަޕް ގަދަ 16 ގައި އިނގިރޭސިން ނިކުންނާނީ މުބާރާތް ބާއްވާ އެއް ޤައުމުކަމަށްވާ މެކްސިކޯއާ ދެކޮޅަށެވެ. މިމެޗް ކުޅޭނީވެސް މެކްސިކޯ ސިޓީގައެވެ.