ކްރޮއޭޝިއާ ބަލިކޮށް ވަރލްޑްކަޕް ގަދަ 16 ގެ ޖާގައެއް ޕޯޗްގަލް ހޯދައިފިއެވެ.
ވާދަވެރި ކުޅުމެއް ފެނިގެންދިޔަ މިމެޗް ކްރޮއޭޝިއާގެ މައްޗަށް ޕޯޗުގަލުން ކުރި ހޯދީ 2-1 ގެ ނަތީޖާއިންނެވެ. މިމެޗްގެ ތަރިއަކަށްވީ ގޮންޒާލޯ ރާމޯސް އެވެ. މިމެޗުން ޕޯޗްގަލް މޮޅުވީ ބަދަލު ކުޅުންތެރިއެއްގެ ގޮތުގައި ކުޅެން ނިކުތް ރާމޯސް، މެޗްގެ ފަހުވަގުތުގައި ކާމިޔާބުކޮށްދިން ލަނޑުންނެވެ.
މެޗްގައި ފެނިގެންދިޔަ ހުރިހާ ލަނޑެއްވެސް ޖަހާފައިވަނީ ފަހު ހާފްގެ ކުޅުމުގައެވެ. ފުރަތަމަ ހާފުގައި ދެ ޓީމުންވެސް ރަނގަޅު ރޭވުންތަކަކާއެކު ކުޅުނު ނަމަވެސް، ފެންވަރުގެ ގޮތުން ބަލާއިރު މާ ނުރައްކާތެރި ހަމަލާތަކެއް ފެނިފައެއް ނުވެއެވެ. ރޮނާލްޑޯއަށް ލަނޑު ޖަހާނެ ބައެއް ފުރުސަތުތައް ލިބުނުކަން ފާހަގަކޮށްލެވެއެވެ. މެޗްގައި އެންމެ ފުރަތަމަ ލަނޑެއް ޖަހައި ކުރި ހޯދީ ކްރޮއޭޝިއާ އެވެ. މި ލަނޑު ޖަހައިދިނީ 53 ވަނަ މިނެޓް ތެރޭގައި ތަޖުރިބާކާރު ކުޅުންތެރިޔާ އިވާން ޕެރިސިޗް އެވެ.
ޕޯޗުގަލުން މެޗް އެއްވަރުކުރީ 68 ވަނަ މިނެޓް ތެރޭގައެވެ. މި ލަނޑު ރޮނާލްޑޯ ކާމިޔާބުކުރީ ރެނާޓޯ ވޭގާއަށް އޭރިއާ ތެރޭގައި ކުރި ފައުލަކަށް ލިބުނު ޕެނަލްޓީއަކުންނެވެ. މެޗު ނިމެން ދަނިކޮށް ފަހުވަގުތު ކޮރްއޭޝިއާއިން ވަނީ އިތުރު ލަނޑެއްވެސް ޖަހާފައެވެ. ނަމަވެސް، ވީއޭއާރު (VAR) ބެލުމަށްފަހު ރެފްރީ ނިންމީ އެއީ އޮފްސައިޑް ލަނޑެއް ކަމަށެވެ. އެއީ މާރިއޯ ޕަސަލިޗް، ޔޮސްކޯ ގްވާޑިއޯލްއަށް ބޯޅަ ދިންއިރު އޮފްސައިޑްގައި ހުރުމުންނެވެ.
މުބާރާތުގެ ގަދަ 16 ގައި ޕޯޗްގަލް ނިކުންނާނީ، ވާދަވެރި ސްޕެއިން އާ ދެކޮޅަށެވެ
Advertisement
This content is created and paid for by advertisers and does not involve Voice Journalists
