އެކިއެކި ފަރާތްތަކުގެ އަތުން ސްޓެލްކޯއަށް ނުލިބިވާ ފައިސާގެ އަދަދު ބިލިއަން ރުފިޔާ އާ ގާތްކުރާކަމަށް ސްޓެލްކޯގެ މާލީ ބަޔާންތަކުން ދައްކައިފިއެވެ.

އޮޑިޓަރ ޖެނެރަލްގެ އޮފީހުން ނެރެފައިވާ ސްޓެލްކޯގެ 2025 ވަނަ އަހަރުގެ މާލީ ބަޔާނަށް ބަލާއިރު އެ އަހަރު ނިމުނުއިރު ސްޓެލްކޯއަށް ލިބެންޖެހޭ ފައިސާގެ އަދަދު ހުރީ 948.6 މިލިއަން ރުފިޔާގައެވެ. މިއީ އޭގެ ކުރީ 2024 ވަނަ އަހަރާ އަޅާބަލާއިރު، 201 މިލިއަން ރުފިޔާގެ އިތުރުވުމެކެވެ.

މާލީ ބަޔާނަށް ބަލާއިރު ސްޓެލްކޯއަށް އެންމެގިނައިން ފައިސާ ދައްކަންޖެހޭ ފަރާތެއްގެ ގޮތުގައި އޮތީ ފިނޭންސް މިނިސްޓްރީއެވެ. ފިނޭންސުން ސްޓެލްކޯއަށް 333.3 މިލިއަން ރުފިޔާ ދައްކަން ޖެހޭއިރު، ދެން އެންމެ ބޮޑު އަދަދެއް ދައްކަންޖެހެނީ ދައުލަތުގެ ޕަބްލިކް ސާވިސް މީޑިއާއިންނެވެ. ޕީއެސްއެމުން ސްޓެލްކޯއަށް 163.3 މިލިއަން ރުފިޔާ ދައްކަން އެބައޮތެވެ.

1. ފިނޭންސް މިނިސްޓްރީ: 333.3 މިލިއަން ރުފިޔާ

2. ޕީއެސްއެމް: 163.3 މިލިއަން ރުފިޔާ

4. މާލެސިޓީ ކައުންސިލް: 53.8 މިލިއަން ރުފިޔާ

5. ހައުސިން މިނިސްޓްރީ: 43.4 މިލިއަން ރުފިޔާ

6. އެޗްޑިސީ: 33.4 މިލިއަން ރުފިޔާ

7. އެމްޑަބްލިއުއެސްސީ: 24.3 މިލިއަން ރުފިޔާ

ސްޓެލްކޯގެ މާލީބަޔާނަށް ބަލާއިރު ލިބެންޖެހޭ ފައިސާ ނުލިބިގެން ލިބުނު ގެއްލުމުގެ ގޮތުގައި 161.2 މިލިއަން ރުފިޔާ ޕްރޮވިޝަން ހަދާފައި އެބައޮތެވެ. މާނައަކީ އެފައިސާ އަކީ ކައިރި މުސްތަގްބަލެއްގައި ލިބޭނޭކަމުގެ ޔަގީންކަން ނެތް ފައިސާއެވެ.

ސްޓެްލްކޯއަށް 2025 ވަނަ އަހަރު އާމްދަނީގެ ގޮތުގައި 3.3 ބިލިއަން ރުފިޔާ ލިބިފައިވާއިރު ތެލަށާއި ހަރަދުތަކަށް 2.6 ބިލިއަނަށްވުރެ ގިނަ ރުފިޔާ ހަރަދުކުރަންޖެހުނެވެ. އެއަހަރު ސްޓެލްކޯއަށް ސާފްފައިދާގެ ގޮތުގައި ލިބިފައިވަނީ، 238.7 މިލިއަން ރުފިޔާއެވެ.