ބިންހެލުމެއް އަންނަން އުޅޭކަމަށް މީސްމީޑިއާގައި ފެތުރެމުންދާ ވާހަކަތަކުގައި އެއްވެސް ކަހަލަ އަސްލެއްނެތްކަމަށް މޯލްޑިވްސް މީޓިއޮލޮޖިކަލް ސެންޓަރުން ބުނެފިއެވެ.
ބިންހެލުމެއް އަންނަން އުޅޭކަމަށް މީސްމީޑިއާގައި ދައުރުވަމުންދާ ޕޯސްޓަކާ ގުޅިގެން މެޓުން މިއަދު ނެރުނު މައުލޫމާތުގެ ޕޯސްޓެއްގައި ބުނެފައިވަނީ ބިންހެލުންތައް ސއިްޓިފިކް ގޮތުން ކުރިއަލާ ދެނެގަނެވޭނެ އެއްވެސް ގޮތެއް އަދި ހޯދިފައިނުވާކަމަށެވެ.
ދިގު މުއްދަތަކަށް ބަލާއިރު، ބިންހެލުންތައް އައުން ގާތް ސަރަހައްދުތައް ސައިންސްވެރިންނަށް ކަނޑައަޅަން އެނގުނު ނަމަވެސް، ބިންހެލުން އަންނާނޭ ސީދާ ވަގުތެއް ތާރީހެއް ނުވަތަ އަންނާނޭ ސީދާ ތަނެއް ދެނެގަނެވޭނެ ހޯދުމެއް އަދި ނެތްކަމަށް މެޓުން ފާހަގަކުރިއެވެ.
މޯލްޑިވްސް މީޓިއޮލޮޖިކަލް ސަރވިސް އިން ބިންހެލުންތަކުގެ މައުލޫމާތުތައް މެދުކެނޑުމެއްނެތި ބަލަމުން އަންނައިރު، ދިވެހިރާއްޖެއަށް އަސަރެއް ކޮށްފާނެ ބިންހެލުމެއް އަތުވެއްޖެނަމަ އެމްއެމްއެސްއިން އެ މައުލޫމާތެއް ލަސްނުކޮށް އާންމުނަށް ހިއްސާކުރަމުންދާނޭ ކަމަށްވެސް އެ އިދާރާއިން ބުންޏެވެ.
މެޓު އޮފީހުން އަންނަނީ ގަވާއިދުން ރާއްޖޭގެ މޫސުމާ ބެހޭ ހާލަތު މޮނިޓަރކޮށް އެ މައުލޫމާތުތައް އާއްމުކޮށް ޕޯސްޓްކުރަމުންނެވެ. މީގފެ އިތުރުން ބިންހެލުންތަކާ ބެހޭ މައުލޫމާތުވެސް އެ އިދާރާގެ ވަސީލަތްތައް މެދުވެރިކޮށް އާންމުންނާ ހަމަޔަށް ގެނެސްދެމުން އަންނަކަން ފާހަގަކޮށްލެވެއެވެ.
Advertisement
This content is created and paid for by advertisers and does not involve Voice Journalists
