އިދިކޮޅު ތިން ރައީސުން ގުޅިގެން ފަށާފައިވާ މަސައްކަތް މަޑުޖެހިފައިވާ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.

ނަޝީދު މިހެން ވިދާޅުވީ މިއަދު އޮތް ނޫސްވެރީންގެ ބައްދަލްވުމުގައި ތިން ރައީސުންގެ މަސައްކަތާއި ގުޅޭގޮތުން ނޫސްވެރީން ކުރި ސުވާލުތަކަށް ޖަވާބު ދެއްވަމުންނެވެ. އެމަނިކުފާނު ވިދާޅުވީ ތިން ރައީސުން އެކުގައި ފެށި މަސައްކަތް ނުހުއްޓޭ ކަމަށެވެ. ނަމަވެސް އެ މަސައްކަތް ބާރު ސްޕީޑްގައި ކުރިއަށް ނުދާ ކަމަށް ވިދާޅުވި އެެވެ.

ކުރީގެ ރައީސުން ކަމުގައިވާ އަބްދުالله ޔާމީން އާއި ކުރީގެ ރައީސް މުހައްމަދު ނަޝީދާއި ކުރީގެ ރައީސް އިބްރާހިމް މުހައްމަދު ސޯލިހް އެކުގައި މަސައްކަތް ފެއްޓެވި ނަމަވެސް ބައްދަލު ކުރެވުނީ އެންމެ ފަހަރަކު އެވެ. އެ ބޭފުޅުންގެ މަންދޫބުން ދެ ފަހަރަކު ވަނީ ބައްދަލު ކުރައްވާފަ އެވެ.

ތިން ރައީސުންގެ ދެވަނަ ބައްދަލްވުމަކަށް އެެޖެންޑާކުރި ނަމަވެސް އެ ބައްދަލްވުން ބޭއްވިފައެއް ނުވެ އެވެ.

އަނެއްކޮޅުން ދާދި ފަހުން ރައީސް ޔާމީން ދެއްކެވި ވާހަކަތަކަކާއި ގުޅިގެން ނަޝީދުގެ ސަޕޯޓަރުން ވަނީ ޔާމީނާއި ދެކޮޅަށް އެކި ޝުއޫރުތައް ފާޅުކޮށްފަ އެވެ. ޔާމީންގެ ސަޕޯޓަރުން ވެސް ވަނީ ރުޅިގަދަވެ ނަޝީދަށް ފާޑުކިޔާފަ އެވެ.

މީގެ އިތުރުން ރައީސް ނަޝީދާއި ރައީސް ސޯލިހްގެ ގުޅުން ވެސް އެހާ ރަނގަޅެއް ނޫނެވެ.