ވަރލްޑްކަޕް ގަދަ 16 ގައި ރޭ ބްރެޒިލް އާއި ނޯވޭ ބައްދަލުކުރިމެޗް ނޯވޭ ކާމިޔާބުކޮށް މުބާރާތުން ކުއާޓާ ފައިނަލުގެ ޖާގައެއް ނޯވޭ ހޯދައިފިއެވެ.

މިމެޗް ބްރެޒިލްގެ މައްޗަށް ނޯވޭ ކުރިހޯދީ 2-1 ގެ ނަތީޖާއިންނެވެ. މެޗްގައި ފެނިގެންދިޔަ ހުރިހާ ލަނޑެއްވެސް ޖަހާފައިވަނީ ފަހު ހާފްގައެވެ. މެޗްގައި ނޯވޭގެ ފުރަތަމަ ލަނޑު ފެނިގެންގޮސްފައިވަނީ 79 ވަނަ މިނެޓް ތެރޭގައެވެ. އެއީ އާސެނަލްގެ ޑިފެންޑަރު ގަބްރިއެލްއަށްވުރެ މައްޗަށް އަރައި، ބޮލުން ގޯލްގެ ތެރެއަށް ބޯޅަ ވައްދާލައިގެންނެވެ. އަދި އޭގެ ކުޑައިރުކޮޅެއް ފަހުން، އޭރިއާ ބޭރުން ފޮނުވާލި ބާރު ހަމަލާއަކުން ހާލާންޑް ވަނީ ދެވަނަ ލަނޑެއް ކާމިޔާބުކޮށް ބްރެޒިލް ހާސްކޮށްލާފައެވެ.

މެޗްގައި ބްރެޒިލުން ލަނޑު ޖަހާފައިވަނީ އިތުރުވަގުތުގައި ލިބުނު ޕެނަލްޓީއަކުން ނޭމާއެވެ. މިއީ ނޭމާ މިފަހަރުގެ މުބާރާތުގއި ކުޅެންއެރި ދެވަނަ މެޗެވެ. މެޗްގައި ބްރެޒިލަށް ލަނޑުޖަހާނެ ރަނގަޅު ފުރުސަތުތައް ލިބުނެވެ. އެގޮތުން މެޗުގެ ކުރީކޮޅު ބްރޫނޯ ގިމަރޭސް ފޮނުވާލި ޕެނަލްޓީ ނޯވޭގެ ގޯލްކީޕަރު އޯޔަން ނައިލަންޑް ވަނީ ދިފާއުކޮށްފައެވެ. ނޯވޭ އާއި ބްރެޒިލް ކުޅުނު މި މެޗް އެންމެބޮޑަށް ވައްތަރުވެގެން ގޮސްފައިވަނީ 1998 ވަނަ އަހަރު ފްރާންސްގައި ބޭއްވި ވަރލްޑްގައި މި ދެޓީމް ބައްދަލުކުރި މެޗާއެވެ. އެފަހަރުގެ މެޗްވެސް 2-1 ގެ ނަތީޖާއަކުން ކާމިޔާބުކުރީ ނޯވޭއެވެ.

ރޭ ހާލާންޑް ޖެހި ދެ ލަނޑާއެކު ހާލާންޑް ވަނީ މެސީ އަދި އެމްބާޕޭ އާއެކު އެންމެ ގިނަ ލަނޑުޖެހި ކުޅުންތެރިންްގެ ތެރޭގައެވެ. އެހެންކަމުން ވަރލްޑްކަޕް ރަން ބޫޓު ހޯދުމުގެ ރޭހުގެ ފޯރިވަނީ ވަރަށް ގަދަވެފައެވެ. 

ކުއާޓާ ފައިނަލުގައި ނޯވޭއާ ދެކޮޅަށް ނުކުންނާނެ ޓީމެއް އެނގޭނީ އިންގްލެންޑާއި މެކްސިކޯ ބައްދަލުކުރާ މެޗަށް ފަހުގައެވެ.