ޕާކިސްތާނުގެ ބާނީ ޤާއިދުލް އައުޒަމް މުޙައްމަދު ޢަލީ ޖިނާޙްގެ 150 ވަނަ އަހަރީ ދުވަސް ފާހަގަކުރުމުގެ ގޮތުން ޕާކިސްތާން ހައި ކޮމިޝަނާއި ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) ގުޅިގެން މިއަދު ޚާއްޞަ ރަސްމިއްޔާތެއް ބާއްވައިފިއެވެ.
މި ރަސްމިއްޔާތަކީ ޖިނާޙްގެ ލީޑަރޝިޕާއި ތަޞައްވުރާއި ތާރީޚީ ޚިދުމަތްތަކުގެ ހަނދާންތައް އާކުރުމަށް ދަރިވަރުންނާއި އިއްޒަތްތެރި މެހެމާނުންނާއި އާންމުންނަށް އަމާޒުކޮށްގެން ބޭއްވި ހަރަކާތެއް ކަމަށް ޕާކިސްތާން ހައި ކޮމިޝަނުން ނެރުނު ނޫސް ބަޔާނުގައި ބުނެފައިވެއެވެ.
ރަސްމިއްޔާތު ފެށުނީ ޕާކިސްތާނުން ދިވެހިރާއްޖެއަށް ކަނޑައަޅުއްވާފައި ހުންނަވާ ހައި ކޮމިޝަނަރު ވައިސް އެޑްމިރަލް (ރިޓަޔަރޑް) ފައިޞަލް ރަސޫލް ލޯދީ ދެއްވި މަރުޙަބާގެ ބަސްފުޅުންނެވެ. މީގެ އިތުރުން ޖިނާޙްގެ ޙަޔާތްޕުޅާއި ޤައުމީ ޚިދުމަތްތަކުގެ މައްޗަށް ތައްޔާރުކޮށްފައިވާ ވީޑިއޯ ޕްރެޒެންޓޭޝަނެއް ވެސް ދައްކާލެވުނެވެ.
އެ ބަޔާނުގައިވާ ގޮތުން ރަސްމިއްޔާތުގެ އެންމެ ފާހަގަކޮށްލެވޭ އެއް ބަޔަކީ ދަރިވަރުންގެ މެދުގައި ބޭއްވި ބަހުސް ސެޝަނެވެ. އެ ސެޝަނުގެ ސަބަބުން ލީޑަރޝިޕާއި ވެރިކަން ހިންގުމުގެ ނިޒާމާއި ތާރީޚީ ކަންކަމާ ގުޅޭ ގޮތުން ފުންކޮށް މަޝްވަރާކޮށް ޚިޔާލު ބަދަލުކުރުމުގެ ފުރުޞަތު ދަރިވަރުންނަށް ލިބިގެންދިޔައެވެ. ޕާކިސްތާނު މުޖުތަމަޢުގެ އިސް ބޭފުޅުންނާއި އެ ދާއިރާގެ ތަޖުރިބާކާރުން ވެސް މި ޕްރޮގްރާމުގައި ބައިވެރިވެފައިވެއެވެ.
ރަސްމިއްޔާތުގައި ޤައުމީ ޔުނިވަރސިޓީގެ އިސް ބޭފުޅުންނާއި ޑިޕްލޮމެޓިކް ދާއިރާގެ މަންދޫބުންނާއި ދަރިވަރުންގެ އިތުރުން ދަޢުވަތު އެރުވުނު މެހެމާނުން ބައިވެރިވެވަޑައިގެންނެވިއެވެ. ހަރަކާތް ނިންމާލީ ބަހުސްގެ ނަތީޖާ އިޢުލާންކޮށް ދަރިވަރުންނަށް އިނާމު ދިނުމާއި ސަގާފީ ހަރަކާތްތައް ދައްކާލުމާއި ހަނދާނީ ފިލާ އެރުވުމުގެ ރަސްމިއްޔާތަކުންނެވެ.
Advertisement
This content is created and paid for by advertisers and does not involve Voice Journalists
