މޯލްޑިވްސް ނެޝަނަލް ޔުނިވަރސިޓީ (އެމްއެންޔޫ) އިން ޞިއްޙީ ޚިދުމަތުގެ ދާއިރާއިން ތިން އާ އަންޑަރގްރެޖުއޭޓް ޕްރޮގްރާމެއް ރަސްމީކޮށް ތަޢާރަފުކޮށްފައިވެއެވެ.

އަލަށް ތަޢާރަފުކުރި ޕްރޮގްރާމްތަކަކީ ބެޗެލާ އޮފް ސައިންސް އިން ޕެރަމެޑިކް ސައިންސަސް (3 އަހަރު) ބެޗެލާ އޮފް ސައިންސް އިން ސްޕީޗް-ލެންގުއޭޖް ޕެތޮލޮޖީ (އޮނާޒް) (4 އަހަރު) އަދި ބެޗެލާ އޮފް އޮކިއުޕޭޝަނަލް ތެރަޕީ (އޮނާޒް) (4 އަހަރު) އެވެ. މި ޕްރޮގްރާމްތައް ތަޢާރަފުކޮށްފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުތަކާ އެއްގޮތަށް ޤައުމުގެ ތަރައްޤީއަށް މުހިންމު ދާއިރާތަކުގެ ޤާބިލުކަން ވަރުގަދަކުރުމުގެ މަޤުޞަދުގައި ކަމަށް އެ ޔުނިވަރސިޓީން ބުނެފައިވެއެވެ. ރާއްޖޭގައި ސްޕީޗް-ލެންގުއޭޖް ތެރަޕީ އޮކިއުޕޭޝަނަލް ތެރަޕީ އަދި ހޮސްޕިޓަލަށް ގެންދިޔުމުގެ ކުރިން ދޭ އިމަޖެންސީ ފަރުވާގެ ދާއިރާއިން ތަމްރީނު ލިބިފައިވާ ފަންނީ މީހުން މަދުކަން އެ ޔުނިވަރސިޓީން ފާހަގަކޮށްފައިވެއެވެ.

ނޫސްވެރިންގެ ބައްދަލުވުމުގައި ވައިސް ޗާންސެލަރ ޑރ. ޢާއިޝަތު ޝެހެނާޒް އާދަމް ވިދާޅުވީ "މިއީ ހަމައެކަނި އާ އެކެޑެމިކް ޕްރޮގްރާމްތަކެއް ތަޢާރަފުކުރުމެއް ނޫން މިއީ ރާއްޖޭގެ ޞިއްޙީ ދާއިރާގެ މުސްތަޤުބަލު ބައްޓަންކުރުން" ކަމަށެވެ. "ޤައުމީ ފެންވަރުގައި އެންމެ ބޮޑަށް ބޭނުންވާ ދާއިރާތަކުން ޚާއްޞަ ތަޢުލީމުގެ މަގު ފަހިކޮށްދީގެން އަޅުގަނޑުމެން މި އިންވެސްޓުކުރަނީ ރައްޔިތުންނަށް ޞިއްޙީ ނިޒާމު ވަރުގަދަކުރުމަށް އަދި ޤައުމުގެ ތަރައްޤީއަށް މާނަހުރި ގޮތެއްގައި ޙިއްޞާކުރާނެ ހުނަރުވެރި ޖީލެއް ބިނާކުރުމަށް" ކަމަށް ވެސް ވިދާޅުވިއެވެ.

ތިން ޕްރޮގްރާމް ވެސް މޯލްޑިވްސް އެލައިޑް ހެލްތް ކައުންސިލުން އެކްރެޑިޓްކޮށްފައިވާ ކަމަށާއި ޕްރޮގްރާމް ފުރިހަމަކުރާ ދަރިވަރުންނަށް ރާއްޖޭގައި ޕްރެކްޓިސް ކުރުމުގެ ލައިސަންސް ލިބޭނެ ކަމަށް އެ ޔުނިވަރސިޓީން ބުނެފައިވެއެވެ. ޕެރަމެޑިކް ސައިންސަސް ޕްރޮގްރާމުގައި ހޮސްޕިޓަލަށް ގެންދިޔުމުގެ ކުރިން ދޭ އެޑްވާންސްޑް ލައިފް ސަޕޯޓާއި އިމަޖެންސީ ފަރުވާތަކަށް ޚާއްޞަ އިސްކަމެއް ދޭނެ ކަމަށް ވެސް ބުނެފައިވެއެވެ. މީގެ އިތުރުން މެރިޓައިމް ސްޓަޑީޒް ސޯޝަލް ސައިންސަސް އިންޖިނިއަރިން ލޯ އަދި ބިޒްނަސް އެޑްމިނިސްޓްރޭޝަން ފަދަ ދާއިރާތަކުން މާސްޓާޒް އަދި ޕީއެޗްޑީ ޕްރޮގްރާމްތައް ތައްޔާރުކުރަމުންދާ ކަމަށް ވެސް އެ ޔުނިވަރސިޓީން ހާމަކޮށްފައިވެއެވެ. މި ޕްރޮގްރާމްތަކަށް ކުރިމަތިލުމުގެ ފުރުޞަތު މިހާރު ހުޅުވާލެވިފައިވާއިރު 2026 ޖުލައި 30 ވަނަ ދުވަހުގެ 14:00 ގެ ކުރިން އެމްއެންޔޫ ޕޯޓަލް މެދުވެރިކޮށް ހުށަހެޅޭނެއެވެ. އިތުރު މަޢުލޫމާތު އެ ޔުނިވަރސިޓީގެ ހޮޓްލައިން 1445 އިން ލިބޭނެއެވެ.