މިދިޔަ އަހަރުގެ އޮޑިޓް ރިޕޯޓް ހުށައެޅި ޕާޓީތަކާއި ހުށަނާޅާ ޕާޓީތައް އިލެކްޝަންސް ކޮމިޝަނުން މިއަދު ހާމަކޮށްފި އެވެ.
ސިޔާސީ ޕާޓީތަކުގެ ދަފްތަރުގައި މިވަގުތު އޮތީ ހަތް ސިޔާސީ ޕާޓީ އެވެ. އެއީ ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ) އާއި އަދާލަތު ޕާޓީ (އޭޕީ) އާއި ޖުމްހޫރީ ޕާޓީ (ޖޭޕީ) އާއި މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ) އާއި ޕީޕަލްސް ނޭޝަނަލް ކޮންގްރެސް (ކޮންގްރެސް ޕާޓީ) އާއި މޯލްޑިވްސް ނެޝަނަލް ޕާޓީ (އެމްއެންޕީ) އާއި ޕީޕަލްސް ނޭޝަނަލް ފްރަންޓް (ޕީއެންއެފް) އެވެ.
އިލެކްޝަންސް ކޮމިޝަނުން ބުނީ މި ޕާޓީތަކުގެ ތެރެއިން އެމްޑީޕީ އާއި ޖޭޕީ އާއި އެމްޑީއޭ އާއި ކޮންގްރެސް ޕާޓީއާ ޕީއެންއެފުން 2025 ވަނަ އަހަރުގެ އޮޑިޓް ރިޕޯޓް ހުށައަޅާފައިވާ ކަމަށެވެ. ނަމަވެސް އެމްޑީޕީން ހުށައެޅީ ކަނޑައެޅިފައިވާ ތާރީހަށްވުރެ ފަހުންނެވެ.
އަދާލަތު ޕާޓީއާ އެމްއެންޕީން އޮޑިޓް ރިޕޯޓް ހުށައަޅާފައެއް ނުވެ އެވެ.
އިލެކްޝަންސް ކޮމިޝަނުން ބުނީ 2025 ވަނަ އަހަރުގެ އޮޑިޓް ރިޕޯޓް ހުށައަޅަން މެއި 20 ވަނަ ދުވަހުގެ ނިޔަލަށް ފުރުސަތު ދިން ކަމަށެވެ. ސިޔާސީ ޕާޓީތަކުގެ ގަވާއިދު ބުނާ ގޮތުން އޮޑިޓް ރިޕޯޓް ހުށަނާޅާ ޕާޓީތައް 50,000 ރުފިޔާއިން ޖޫރިމަނާ ކުރެވޭނެ އެވެ.
Advertisement
This content is created and paid for by advertisers and does not involve Voice Journalists
