ފީފާ ވަރލްޑްކަޕް ކުއާޓާ ފައިނަލުގެ ޖާގައެއް ކޮލަމްބިއާ ބަލިކޮށް ސްވިޒަރލޭންޑުން ހޯދައިފިއެވެ.
ސްވިޒަރލޭންޑް ކުއާޓާ ފައިނަލަށް ދަތުރުކުރީ ކޮލަމްބިއާގެ މައްޗަށް ޕެނަލްޓީން ކުރި ހޯދައިގެންނެވެ. މެޗްގެ 90 މިނެޓް ކުޅުމާއި އިތުރު ވަގުތުގެ ކުޅުން ނިމުނުއިރުވެސް އެއްވެސް ޓީމަކަށް ލަނޑެއް ޖެހޭގޮތެއް ނުވިއެވެ. އެހެންކަމުން މެޗްގެ ނަތީޖާ ނެރެފައިވަނީ ޕެނަލްޓީ ޖަހައިގެންނެވެ.
މެޗުގެ ފުރިހަމަ ވަގުތަށްވުރެ އިތުރު ވަގުތުގެ ކުޅުމުގައި ފޯރިގަދަވެގެން ދިޔައިރު، ދެޓީމަށްވެސް ލަނޑުޖަހާނެ ފުރުސަތުތައް ލިބިގެންދިޔައެވެ. އެގޮތުން ކޮލަމްބިއާގެ ޖޯން ލުކޫމީ ބޮލުން ފޮނުވާލި ހަމަލާއެއް ގޯލުގެ ހުރަސް ދަނޑީގައި ޖެހުނުއިރު، ޖެމިންޓަން ކަމްޕާޒަށް ލިބުނު ރަނގަޅު ފުރުސަތެއްގެ ބޭނުން އޭނާއަށް ހިފޭގޮތެއް ނުވިއެވެ.
ޕެނަލްޓީގައި ކޮލަމްބިއާގެ ޑޭވިންސަން ސަންޗޭޒް ޖެހި ޕެނަލްޓީ ނާކާމިޔާބުވި ނަމަވެސް، ސްވިޒަލޭންޑުގެ މެނުއަލް އަކަންޖީ ޖެހި ޕެނަލްޓީ ގޯލާ އަމާޒުނުވެ މަތިން ދިއުމުން ކޮލަމްބިއާއަށް އުންމީދެއް ލިބުނެވެ. ނަމަވެސް، ކޫޗޯ ހެނާންޑޭޒް ފޮނުވާލި ޕެނަލްޓީ ސްވިޒަލޭންޑުގެ ކީޕަރު ގްރެގޯ ކޯބެލް ވަރަށް ހުޝިޔާރުކަމާއެކު ދިފާއުކުރުމުން، ވަރްގަސްއަށް މެޗު ކާމިޔާބުކޮށްދިނުމުގެ ފުރުސަތު ލިބުނެވެ.
ވަރލްޑްކަޕް ކުއާޓާ ފައިނަލުގެ ޖާގައެއް ސްވިޒަރލޭންޑުން ހޯދިއިރު މިއީ ވޯލްޑް ކަޕް ތާރީޚުގައި އެޓީމް ޕެނަލްޓީ ޝޫޓްއައުޓަކުން ހޯދި ފުރަތަމަ މޮޅެވެ. އަދި މިއީ 1954 ވަނަ އަހަރު އަމިއްލަ ގައުމުގައި ބޭއްވި ވޯލްޑް ކަޕަށްފަހު އެ ގައުމުން ކުއާޓާ ފައިނަލަށް ދަތުރުކުރި ފުރަތަމަ ފަހަރެވެ.
Advertisement
This content is created and paid for by advertisers and does not involve Voice Journalists
