އެޓްލާންޓާ ސްޓޭޑިއަމްގައި އަންގާރަ ދުވަހު ކުޅުނު ވޯލްޑް ކަޕްގެ ގަދަ 16 ގެ ފޯރިގަދަ މެޗުގައި، މިޞްރުގެ މައްޗަށް 3-2 އިން ކުރިހޯދައި އާޖެންޓީނާ މުބާރާތުގެ ކުއާޓާ ފައިނަލަށް ވަނީ ދަތުރުކޮށްފައެވެ. ނަމަވެސް މި މެޗު ނިމިގެންދިޔައީ ރެފްރީގެ ނިންމުންތަކާ މެދު ބޮޑެތި ސުވާލުތަކެއް އުފެދި، ބޮޑު ހަމަނުޖެހުންތަކެއްގެ ތެރޭގައެވެ.

މެޗުގެ ބޮޑުބަޔަކު މިޞްރުން ދެ ލަނޑުގެ ލީޑެއްގައި އޮތްއިރު، ދުނިޔޭގެ ޗެމްޕިއަން އާޖެންޓީނާ މުބާރާތުން ވަކިވާން ޖެހިދާނެ ކަމުގެ ބިރު އޮތެވެ. އާޖެންޓީނާއިން މެޗުގެ ނަތީޖާ އަނބުރާލީ ފަހު 13 މިނެޓުގެ ތެރޭގައި ޖެހި ތިން ލަނޑުންނެވެ. އެގޮތުން 79 ވަނަ މިނެޓުގައި ކްރިސްޓިއަން ރޮމޭރޯ ފުރަތަމަ ލަނޑު ޖަހައިދިންއިރު، އޭގެ ހަތަރު މިނެޓު ފަހުން ލިއޮނަލް މެސީ ވަނީ ލަނޑެއް ޖަހައި ނަތީޖާ އެއްވަރުކޮށްފައެވެ. އާޖެންޓީނާ މޮޅުވި ލަނޑު އިތުރު ވަގުތުގެ ތިންވަނަ މިނެޓުގައި ޖަހައިދިނީ އެންޒޯ ފެނާންޑޭޒްއެވެ.

މި މެޗު އެންމެ ބޮޑަށް ހޫނުވީ މިޞްރުގެ މުޞްޠަފާ ޒީކޯ ޖެހި ލަނޑެއް ވީއޭއާރުއިން ބަލައި، އެ ލަނޑު ކެންސަލް ކުރުމާ ގުޅިގެންނެވެ. މިޞްރު 1-0 އިން ކުރީގައި އޮއްވައި، މުޙައްމަދު ޞަލާޙް ދިން ބޯޅައަކުން ޒީކޯ ޖެހި މި ލަނޑު ރެފްރީ ކެންސަލް ކުރީ، ލަނޑު ޖެހުމުގެ ކުރިން ފައުލެއް ހިނގާފައިވާ ކަމަށް ބުނެއެވެ.

ނަމަވެސް މެޗުގެ ކޮމެންޓޭޓަރުން ބުނި ގޮތުގައި އެ ހާދިސާ އަކީ ވީއޭއާރުގެ އިޚްތިޞާޞްގެ ތެރޭގައި ހިމެނޭ ކަމެއް ނޫނެވެ.

މެޗު އެންމެ ހޫނުވި އެއް ސަބަބަކީ ޒީކޯއަށް ދިމާވި ފަދަ ހާދިސާއެއް އާޖެންޓީނާއަށްވެސް ދިމާވިއިރު، އެފަހަރު ވީއޭއާރް މެދުވެރިކޮށް ރެފްރީ މައްސަލަ ނުބެލުމުންނެވެ.

މި ނިންމުމާ ގުޅިގެން މިޞްރުގެ ކޯޗު ޙުސާމް ޙަސަން ވަރަށް ބޮޑަށް ނުރުހުންވެ ވިދާޅުވީ، މިއީ ރޭވިގެން ކުރިއަށްދިޔަ ކަމެއް ކަމަށާއި މުޅި ދުނިޔެއަށް ވެސް އެކަން ފެނުނު ކަމަށެވެ.

"އާޖެންޓީނާ މޮޅުކޮށްދޭން އެހާ ބޭނުންވާނަމަ، އެހެން އެންމެން މި މުބާރާތަށް ގެނައުމުގެ ބޭނުމަކީ ކޮބައި؟" އޭނާ ސުވާލު އުފެއްދެވިއެވެ.

މީގެ އިތުރުން މިޞްރުގެ ކުރީގެ ތަރި މުޙައްމަދު އަބޫތްރީކާ ބުނީ ފީފާގެ ރައީސް އިންފަންޓީނޯ ފުޓްބޯޅަ ހަލާކުކޮށްލައިފި ކަމަށެވެ. އަދި ލަނޑު ޖެހި ޒީކޯ ބުނީ ރެފްރީ އަކީ އިންސާފެއް ނެތް މީހެއް ކަމަށާއި، ޤައުމެއްގެ ބުރަ މަސައްކަތް އޭނާ ބޭކާރުކޮށްލައިފި ކަމަށެވެ.

މަޝްހޫރު ކޮމެޑިއަން ޓްރެވަރ ނޯއާ ވެސް ވަނީ މިކަމާ ގުޅޭގޮތުން ޚިޔާލު ފާޅުކުރަމުން، އެހެން މެޗުތަކުގައި ނުލިބޭ ފުރުޞަތުތައް އަބަދުވެސް އާޖެންޓީނާއަށް ލިބޭ ކަމަށް ފާހަގަކޮށްފައެވެ.

އާޖެންޓީނާ އާއި މިޞްރު ބައްދަލުކުރި މެޗާ ގުޅޭގޮތުން ހޯސޭ މޮރީނިއޯ ވެސް ވަނީ ފީފާއަށް ފާދުކިޔާކިޔާފައެވެ. 

"މިއީ ދުވާލު މެންދުރު ހިންގި ބޮޑު 'ވައްކަމެއް' ފަދަ ބޭއިންސާފު ކަމެއް. ފުޓްބޯޅަ މިއަދު މިދާ މިސްރާބާ މެދު އަހަރެން ހިތާމަކުރަން. ކުޅުން ކުރިއަށް ގެންދަން ފުރުސަތު ދީ، ލަނޑު ޖެހުމަށްފަހު، އަލުން ފަހަތަށް ގޮސް އެ ލަނޑު ކެންސަލް ކުރަން ނިންމަނީ ކިހިނެއް؟ ފައުލެއް އޮތް ނަމަ، ޖެހޭނީ ވަގުތުން ކުޅުން ހުއްޓުވަން. ލަނޑު ޖަހަންދެން މަޑުކޮށްގެން ނުވާނެ.“ މޮރީނިއޯ ބުންޏެވެ.

”ދެން އަހަރެން އުފައްދާ އަނެއް ސުވާލަކީ، އާޖެންޓީނާގެ ފުރަތަމަ ލަނޑު އޮފްސައިޑް ކަމަށް ވަރަށް ބޮޑަށް ބެލެވޭއިރު، އެ ލަނޑު އެހާ ފަރުވާތެރިކަމާއެކު ރިވިއު ނުކުރީ ކީއްވެ؟ އާޖެންޓީނާއާ ގުޅުންހުރި ކޮންމެ ހާދިސާއެއް ވަރަށް ބޮޑަށް ބަލަމުންދާއިރު، މިޞްރަށް އެފަދަ ހަމަހަމަ އުސޫލެއް ގެންގުޅޭތީއެއް ނުފެނޭ.“ އޭނާ އިތުރަށް ބުންޏެވެ. 

އޭނާ ބުނީ، ވީއޭއާރުގެ ބޭނުމަކީ އިންސާފު ގާއިމުކުރުން ކަމަށާ، ކަންކަން އޮޅުންބޮޅުން ކުރުމެއް ނޫން ކަމަށެވެ. އަދި ރޭ ފެނިގެންދިޔައީ ހުރިހާ މުހިންމު ނިންމުންތަކެއް އާޖެންޓީނާގެ ފައިދާއަށް ނިންމި މަންޒަރު ކަމަށްވެސް ބުންޏެވެ. 

މި މައްސަލަ ހޫނުވެފައިވާއިރު، އާޖެންޓީނާ މިހާރު ތައްޔާރުވަމުންދަނީ ކުއާޓާ ފައިނަލް މެޗަށެވެ.