ފީފާ ވޯލްޑް ކަޕް 2026 ގެ ކުއާޓާ ފައިނަލުގައި ފްރާންސާއި މޮރޮކޯ ބައްދަލުކުރާ މެޗުގެ ދަނޑުމަތީގެ ހުރިހާ އޮފިޝަލުން އާޖެންޓީނާއިން ކަނޑައެޅުމާ ގުޅިގެން ސަޕޯޓަރުންގެ މެދުގައި ބޮޑު ބަހުސެއް އުފެދިއްޖެއެވެ.

ބޮސްޓަން ސްޓޭޑިއަމުގައި ޖުލައި 10 ވަނަ ދުވަހު ކުޅުމަށް ހަމަޖެހިފައިވާ މި މެޗުގެ ރެފްރީއަކީ އާޖެންޓީނާގެ ފަކުންޑޯ ޓެލޯއެވެ. އެސިސްޓެންޓް ރެފްރީންގެ ގޮތުގައި ހުވާން ޕާބްލޯ ބެލައްޓީ އާއި ގެބްރިއެލް ޗާޑޭ ހަމަޖައްސާފައިވާ އިރު ހަތަރު ވަނަ އޮފިޝަލަކީ ޑާރިއޯ ހެރޭރާއެވެ. ރިޒާވް އެސިސްޓެންޓް ރެފްރީއަކީ ކްރިސްޓިއަން ނަވާރޯއެވެ. މިއީ މި މުބާރާތުގައި ދަނޑުމަތީގެ ފަސް އޮފިޝަލުން އެއް ޤައުމަކުން ކަނޑައެޅި ފުރަތަމަ ފަހަރެވެ. ވީއޭއާރު އޮފިޝަލުން އަދި ކަށަވަރެއް ނުކުރެއެވެ.

މި ނިންމުމާ މެދު ސޯޝަލް މީޑިއާގައި ސަޕޯޓަރުން ވަގުތުން ފާޑުކިޔައިފައިވެއެވެ. އެއް ސަޕޯޓަރަކު ލިޔެފައިވެއެވެ. "ފީފާ ދެން އެކަން ފޮރުވާކަށްވެސް ނޫޅޭ. ހުސް އާޖެންޓީނާ ވީއޭއާރު ޗެކްކުރަންވެސް މެސީ ގެންނަންވީނު." އެހެން ސަޕޯޓަރަކު ބުނެފައިވެއެވެ: "ފްރާންސް މެޗަކަށް ހުސް އާޖެންޓީނާ ރެފްރީން ފީފާ އަނެއްކާވެސް އާޖެންޓީނާއަށް ވޯލްޑް ކަޕް ހޯދައިދޭން މި އުޅެނީ."

ނަމަވެސް ފީފާއިން މުޅި މުބާރާތުގައިވެސް ވަނީ އެއް ޤައުމެއްގެ ރެފްރީންނާއި އެސިސްޓެންޓް ރެފްރީން ކަނޑައަޅާފައެވެ. އިނގިރޭސިވިލާތުން 3-2 އިން މެކްސިކޯ ބަލިކުރި މެޗުގައި ރެފްރީ ޓީމު ނެގީ އޮސްޓްރޭލިއާއިންނެވެ. ހަމައެހެންމެ އާޖެންޓީނާ 3-2 އިން މިޞްރު ބަލިކުރި ގަދަ 16 ގެ މެޗުގައި ރެފްރީކަން ކުރީ ފްރާންސްގެ ފްރާންސުވާ ލެޓެކްސިއޭ އާ އެކު ފްރާންސްގެ ދެ އެސިސްޓެންޓް ރެފްރީންނެވެ. އަދި ވީއޭއާރު އޮޕަރޭޝަނުގައިވެސް ފްރާންސްގެ ދެ އޮފިޝަލަކު ބައިވެރިވެފައިވެއެވެ. ފީފާ އިން ފްރާންސާއި މޮރޮކޯ މެޗުގެ އޮފިޝަލުން ކަނޑައެޅީ ހޯމަ ދުވަހު އާޖެންޓީނާއާއި މިޞްރު މެޗުގެ ކުރިންނެވެ.

އެންމެފަހުން އާޖެންޓީނާ-މިޞްރު މެޗުގައި ހިނގާދިޔަ ކަންތައްތަކާ ގުޅިގެން ރެފްރީންގެ ނިންމުންތަކަށް ވަނީ ވަރަށް ބޮޑު ފާޑުކިޔުންތައް އަމާޒުވެފައެވެ. އެގޮތުން ވީއޭއާރު ބެލުމަށްފަހު މިޞްރުން ޖެހި ގޯލެއް، ގޯލެއް ނޫންކަމަށް ނިންމިއިރު މުޙައްމަދު ޞަލާޙަށް ކުރި ފައުލަކާ ގުޅިގެން ލިބެންޖެހޭ ޕެނަލްޓީއެއްގެ މައްސަލަވެސް ވަނީ ބޮޑުވެފައެވެ. މެޗަށްފަހު ރެފްރީންގެ އަމަލުތަކާމެދު ނިހާޔަތަށް ކަންބޮޑުވާކަމަށް މިސްރު ޓީމުންވެސް ވަނީ ބުނެފައެވެ.