އެމަނިކުފާނަކީ ކުރިން މަރުގެ ޙުކުމް ތަންފީޒު ކުރަން ތާއީދު ކުރެއްވި ބޭފުޅެއް ކަމަށާ ނަމަވެސް މިހާރު އެކަމަށް ތާއީދު ނުކުރައްވާ ކަމަށް ކުރީގެ ރައީސް ޔާމީން އަބްދުލްޤައްޔޫމް ވިދާޅުވެއްޖެއެވެ.
ރޭ ބޭއްވި ޕީއެންއެފްގެ ބައްދަލުވުމުގައި ވާހަކަދައްކަވަމުން އެޕާޓީގެ މެންބަރު އަދި ގާނޫނީ ވަކީލު ޝާހު ވަނީ ނުހައްގުން މީހުން ޖަލަށް ލުމާއި، މުވައްސަސާތަކުން ނުހައްގުން މީހުންނަށް އަދަބުދޭ މައްސަލާގައި އެކަން ކުރާ މީހުންނަށް ޖަލުގެ އަދަބާއި މަރުގެ އަދަބު ދެވޭ ގޮތަށް ގާނޫނުތައް އިސްލާހް ކުރާނެ ކަމަށް ވިދާޅުވިއެވެ.
އެގޮތުން ފަނޑިޔާރުންނާއި އެނޫން ފަރާތްތައްވެސް ނުހައްގުން މީހުންނަށް އަދަބުދޭ ނަމަ، އެފަދަ އަދަބު ދޭނެ ކަމަށް ވިދާޅުވުއެވެ.
ޝާހުގެ އެ ވާހަކައާއި ގުޅިގެން ވާހަކަދައްކަވަމުން ޔާމީން ވަނީ ފަނޑިޔާރުންގެ ޢަދުލުވެރިކަމާއި އިންސާފުވެރިކަމާއިމެދު ބޮޑެތި ސުވާލުތަކެއް އުފައްދަވާފައެވެ. އަދި ޝަރީޢަތްތައް ހިންގަވަނީ ޢަދުލުވެރި ފަނޑިޔާރުން ނޫން ކަމަށްވާއިރު މަރުގެ ޙުކުމްކުރައްވާނީވެސް އެ ފަނޑިޔާރުން ކަމަށް ވިދާޅުވުއެވެ.
ކަން މިހެން ހުރުމުން ފަނޑިޔާރުންގެ ނިޒާމް އެފަދައިން އޮއްވާ މަރުގެ ޙުކުމް ތަންފީޒު ކުރުމަށް ތާއީދު ނުކުރައްވާނެ ކަމަށް ވިދާޅުވިއެވެ.
އަޅުގަނޑަކީ ކުރީގައި މަރުގެ ހުކުމް ތަންފީޒު ކުރުމަށް ވަކާލާތު ކުރި މީހެއް. އެކަމަކު ފަނޑިޔާރުންގެ ނުކުޅެދުންތެރިކަން، ޢަދުލުވެރިކަންނެތްތަން ފެނުނީމާ އަޅުގަނޑު މަރުގެ ހުކުމާ ދެކޮޅު މިހާރު. އަޅުގަނޑަކަށް ނުކެރޭނެ މީހުންގެ މައްޗަށް މަރުގެ ހުކުމް ގެންނާކަށް ފަނޑިޔާރުން، މިހާރު މިތިބަ ފަނޑިޔާރުންގެ ތެރެއިން ކުރުވަން ހެޔޮނުވާނެ އިނގޭތޯ.
ކުރީގެ ރައީސް ޔާމީން
ކަން މިހެން ހުރުމުން ޕީއެންއެފްގެ މެނިފެސްޓޯގައި އެކަން ނުހިމަނާނެ ކަމަށްވެސް ޔާމީން ވިދާޅުވިއެވެ.
”އެހެންވީމާ ތީކީ (މަރުގެ ހުކުމް ތަންފީޒު ކުރުމަކީ) އަޅުގަނޑުމެންގެ މެނިފެސްޓޯގައި އޮންނާނެ ވާހަކައެއް ނޫން. އަޅުގަނޑަކަށް ލާހިކެއްނޫން މީހުންނަށް މަރުގެ ހުކުމް ދޭކަން. އެއީ އެކަން ކޮށް ފައިސަލާކުރަން މިތިބެނީ އެއްކަލަ ފަނޑިޔާރުންނޭ. ކިހިނެއްތޯ އެމީހުންގެ މައްޗަށް މިކަން ދޫކޮށްލާނީ.“ ޔާމީން ވިދާޅުވިއެވެ.
ޔާމީން އަކީ މީގެ ކުރިން މަރުގެ އަދަބު ދިނުމަށް ތާއީދު ކިރެއްވި ބޭފުޅެކެވެ. އެމަނިކުފާނު ވެރިކަމުގައި މަރުގެ ހުކުމް ތަންފީޒު ކުރުމުގެ މަސައްކަތްވެސް ކޮންމެވެސް ވަރަކަށް ކުރެވުނެވެ. ނަމަވެސް އެކަން ކޮށްފައެއް ނުވެއެވެ.
މި ސަރުކާރުން ބުނަނީ މި ސަރުކާރުން އެކަން ކުރާނެ ކަމަށެވެ. ޚާއްސަކޮށް ވަކި ވަރަކަށްވުރެ ގިނައިން މަސްތިވާތަކެތި އެތެރެކުރާ މީހުންނަށް އެ އަދަބު ދެއްވާނެ ކަމަށެވެ.
Advertisement
This content is created and paid for by advertisers and does not involve Voice Journalists
