ދިވެހިރާއްޖޭގެ ތާރީޚުގައި ފުރަތަމަ ފަހަރަށް، އައްޑޫ ގަން އިންޓަރނޭޝަނަލް އެއާޕޯޓުން ސައުދީ އަރަބިއްޔާގެ ޖިއްދާއަށް ސީދާ އުމްރާ ފްލައިޓްތައް މިއަދު ފަށައިފިއެވެ.

މި ތާރީޚީ ދަތުރުތައް ފަށާފައިވަނީ ގައުމީ އެއާލައިން "މޯލްޑިވިއަން" ގެ އޭ330 (A330) މަރުކާގެ ބޯޓެއްގައެވެ. 

މިކަމާ ގުޅޭގޮތުން މިނިސްޓަރ އޮފް ސިވިލް އެވިއޭޝަން މުޙައްމަދު އަމީން އެކްސްގައި ކުރެއްވި ޕޯސްޓެއްގައި ވިދާޅުވީ، މިއީ ރާއްޖޭގެ ތާރީޚުގައި ފުރަތަމަ ފަހަރަށް ގަން އެއާޕޯޓުން ސީދާ ޖިއްދާއަށް އުމްރާ ފްލައިޓެއް ފުރި ފުރަތަމަ ފަހަރު ކަމަށެވެ. އަދި މިއީ އައްޑޫ ސިޓީއާއި ދެކުނުގެ ސަރަހައްދަށް ލިބުނު ވަރަށް ބޮޑު ކުރިއެރުމެއްގެ ގޮތުގައި މިނިސްޓަރ ފާހަގަކުރެއްވިއެވެ.

މިނިސްޓަރ އަމީން އިތުރަށް ވިދާޅުވީ، މި ތާރީޚީ ކާމިޔާބީއަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ދުރުވިސްނުންފުޅާއި، އެމަނިކުފާނުގެ ހަރުދަނާ ލީޑަރޝިޕްގެ ދަށުން ހާސިލްކުރެވުނު ކަމެއް ކަމަށެވެ. މި މަސައްކަތް ކާމިޔާބުކަމާއެކު ނިންމާލެވުނީތީ ރައީސް މުޢިއްޒަށް މިނިސްޓަރ ވަނީ ޚާއްސަ ޝުކުރެއް އަދާކުރައްވާފައެވެ.

މި ދަތުރުތައް ފެށުމާއެކު، މީގެ ކުރިން މާލެ މަގުން ދަތުރުކުރަން ޖެހުމުގެ ސަބަބުން އުފުލަންޖެހޭ އިތުރު ޚަރަދުތަކާއި ވަގުތު ސަލާމަތްވެ، ދެކުނުގެ ރައްޔިތުންނަށް ބޮޑު ލުޔެއް ލިބިގެންދާނެކަން ފާހަގަކޮށްލަންޖެހެއެވެ.

މިއީ މޯލްޑިވިއަން އާއި އުމްރާގެ ހިދުމަތްދޭ ޓްރެވަލް އެޖެންސީއެއް ކަމަށްވާ 'ދަ ޓްރެވަލާ' ގުޅިގެން ކުރިއަށްގެންދިޔަ ދަތުރެކެވެ. މި ދަތުރުގައި ޖުމްލަ 260 އުމްރާވެރިން ބައިވެރިވެފައިވެ އެވެ. މި ފްލައިޓް ފުރާފައިވަނީ ރޭ ފަތިހު 4:24 ގައެވެ. މި ދަތުރުގެ ބައިވެރިންނަށް މޯލްޑިވިއަންގެ ފަރާތުން ވަނީ ހާއްސަ ހަދިޔާތަކެއް ވެސް ދީފަ އެވެ.

މޯލްޑިވިއަން އިން ބުނީ، މިއީ ދެކުނުގެ އަތޮޅުތަކުގެ ރައްޔިތުންނަށް އުމްރާގެ އަޅުކަމަށް ދިއުމުގައި ލިބިގެންދިޔަ ވަރަށް ބޮޑު ލުޔެއް ކަމަށާއި، މިއީ މި ހިދުމަތުގެ ފެށުން ކަމަށެވެ. އަދި ކުރިއަށް އޮތް ތަނުގައި ވެސް މިފަދަ ސީދާ ދަތުރުތައް ބޭއްވުމަށް މަސައްކަތް ކުރަމުންދާނެ ކަމަށް އެ އެއާލައިނުން ފާހަގަކުރި އެވެ.