މާލޭގައި ހިނގި އެކްސިޑެންޓަކާ ގުޅިގެން ބަލައި ފާސްކުރި ކާރަކުން މަސްތުވާތަކެތި ފެނުނު މައްސަލައެއްގައި 27 އަހަރުގެ ދިވެހި ޒުވާނަކު ފުލުހުން ހައްޔަރުކޮށްފިއެވެ.
ހައްޔަރުކުރި ޒުވާނާގެ ބަންދާމެދު ގޮތެއް ނިންމުމަށް ކޯޓަށް ހުށަހެޅުމުން، ކޯޓުން ވަނީ 15 ދުވަހު އޭނާ ބަންދުގައި ބެހެއްޓުމަށް އަމުރުކޮށްފައެވެ.
ކޯޓުން އޭނާ ބަންދުކުރުމަށް ނިންމި ސަބަބުތަކުގެ ތެރޭގައި، އޭނާގެ މައްޗަށް ތުހުމަތުކުރެވޭ މިންވަރަށް ހެކި ހުށަހަޅާފައިވުން ހިމެނެއެވެ. އެގޮތުން ހުށަހަޅާފައިވާ ހެކިތަކުގެ ތެރޭގައި:
ހާދިސާ ހިނގި ސީނަށް ދިޔަ ފުލުހެއްގެ ބަޔާން.
އެކްސިޑެންޓުވި ކާރުގެ މަތިން މަސްތުވާތަކެތި ކަމަށް ޝައްކުކުރެވޭ އެއްޗެއް ހުރި ރަބަރު ޕެކެޓެއް ފެނިފައިވުމާއި، އޭނާގެ އަތުން މަސްތުވާތަކެތި ކަމަށް ޝައްކުކުރެވޭ އެއްޗެއް ހުރި ފޮއިލްކޮޅެއް ފެނިފައިވުން.
އޭނާގެ ކުޑަކަމުދާތަކެތި ޓެސްޓުކުރުމުން މަސްތުވާތަކެތީގެ ބާވަތްތަކެއް ކަމަށްވާ ސީ.އޯ.ސީ އަދި އޯ.އެމް.ޕީ އަށް ފައްސި (ޕޮޒިޓިވް) ވެފައިވުން.
މި ބާވަތުގެ ކުށުގެ ރެކޯޑް އޭނާގެ އޮތުން.
ކޯޓު އަމުރުގައި ބުނީ، އޭނާ ބަންދުން ދޫކޮށްލައިފިނަމަ މުޖުތަމަޢުގެ ސަލާމަތަށް ނުރައްކަލެއް ކުރިމަތިވެދާނެ ކަމަށް ފެންނާތީ ބަންދުގައި ބަހައްޓަން ނިންމީ ކަމަށެވެ. އަދި އޭނާ ހައްޔަރުކޮށްފައިވަނީ ޤާނޫނީ އިޖުރާއަތުތަކާ އެއްގޮތަށް ކަމަށްވެސް ކޯޓުން ވަނީ ކަނޑައަޅާފައެވެ.
މީގެ އިތުރުން، މި ޒުވާނާ ވަކީލަކަށް އެދިފައިވާތީ، ވަކީލަކު އައްޔަންކުރުމުން އޭނާގެ ބަންދާމެދު އަލުން ގޮތެއް ނިންމުމަށް ކޯޓަށް ހުށަހެޅުމަށް ފުލުހުންގެ މައްޗަށް ވަނީ އަމުރުކޮށްފައެވެ. ފުލުހުން ދަނީ މި މައްސަލަ އިތުރަށް ތަޙުޤީޤު ކުރަމުންނެވެ.
Advertisement
This content is created and paid for by advertisers and does not involve Voice Journalists
