އިންސާނުންގެ ގުނަވަން ޓްރާންސްޕްލާންޓް ކުރުމާ ބެހޭ ބިލް މަޖިލީހުން މިއަދު ފާސްކޮށްފިއެވެ.
މަޖިލީހުގެ މިއަދުގެ ޖަލްސާގައި މި ބިލް ފާސްކޮށްފައިވަނީ ހާޒިރުވި 58 މެންބަރުންގެ ވޯޓުންނެވެ. ބިލާ ދެކޮޅަށް އެއްވެސް މެމްބަރަކު ވޯޓު ނުދެއްވައެވެ.
ގުނަވަން ޓްރާންޕްލާންޓް ކުރާ ބިލު، މީގެ ކުރިންވެސް މަޖިލީހުން ފާސްކުރިއެވެ. ނަމަވެސް ބިލުގައި ހިމެނޭ ބައެއް ކަންކަން އިސްލާހްކުރަން ރައީސް މުޢިއްޒު ވަނީ އެ ބިލު ތަސްދީނުކުރައްވައި އަނބުރާ މަޖިލީހަށް ފޮނުއްވާފައެވެ.
އެގޮތުން ބިލާމެދު ވިސްނެވުމަށްފަހު ބަންޑާރަ ނާއިބުގެ ލަފާއާއެކު ބިލު މަޖިލީހަށް ފޮނުއްވި ސަބަބު ހާމަކުރައްވައި ރައީސް މަޖިލީހަށް ފޮނުއްވި ސިޓީގައި ރައީސް ވިދާޅުވީ، ބިލުގެ 7 ވަނަ މާއްދާގެ ށ ގައި ގުނަވަން ހަދިޔާ ކުރާ މީހާގެ ޝަރުތުތަކުގެ ތެރޭގައި، "ދައުލަތުގެ ބެލުމުގެ ދަށުގައި ހުރި މީހެއްކަމުގައި ނުވުން" އަދި "ކުށުގެ ތުހުމަތުގައި ނުވަތަ ޝަރުއީ ހުކުމެއް ތަންފީޒުކުރަމުންދާ މީހެއް ކަމުގައި ނުވުން" އެ ދެ ޝަރުތު އުނިކޮށްފައިވާ ކަމަށެވެ.
ރައީސް ވިދާޅުވިގޮތުގައި ސަރުކާރުން އެ ބިލު ހުށަހެޅިއިރު އެ ދެ ޝަރުތު ވާނީ ހިމަނާފައެވެ. އަދި އެ ޝަރުތު ހިމެނުއްވީ ގައިދީންނާއި ބަންދުގައި ތިބޭ މީހުންނަކީ އެއްވެސް މަޖުބޫރުކަމެއް ނެތި، ފުރިހަމަ މިނިވަން ރުހުމެއްގެ ދަށުން ގުނަވަން ހަދިޔާކުރެވިދާނެ ބައެއް ކަމަށް ގަބޫލުނުކުރެއްވޭތީ އެވެ. ނަމަވެސް، މަޖިލީހުން ބިލު ފާސްކުރިއިރު އެ ދެ ޝަރުތު ވަނީ އުނިކޮށްފައެވެ.
ރައީސްގެ ސިޓީގައި އިތުރަށް ވިދާޅުވީ، ”ބަންދެއްގައި ތިބޭ މީހުންނަކީ އަމިއްލަ އިޚްތިޔާރާއި މިނިވަންކަން ހަނިވެ، ވަކި ޚާއްސަ ޙާލަތެއްގައި ތިބޭ ބަޔަކަށް ވާއިރު، އެމީހުންނަކީ ފުރިހަމަ ރުހުމާއެކު، އެއްވެސް ބާވަތެއްގެ މަޖުބޫރުކަމެއް ނެތި ގުނަވަން ހަދިޔާކުރުން ފަދަ ކަމަކަށް ރުހުން ދެވިދާނެ ބަޔަކަށް ބެލެވިދާނެ ކަމަށް ނުފެންނަ“ ކަމަށެވެ.
އަދި އެއްވެސް މަޖުބޫރުކަމެއް ނެތި ރުހުމުގައި ގުނަވަން ހަދިޔާކުރުން ކަށަވަރުކުރުމަކީ ޑިމޮކްރަޓިކް މުޖުތަމައުތަކުގައިވެސް ބަލައިގަންނަ ބައިނަލްއަގުވާމީ މިންގަނޑެއްކަމަށާ، ބަންދުގައި ތިބޭ މީހުން ގުނަވަން ހަދިޔާ ކުރެވޭ ގައުމުތަކުގައިވެސް އެކަން ކުރަނީ ވަރަށް ގިނަ ކަންކަން ފުރިހަމަވޭތޯ ބަލައި ކަށަވަރުކުރުމަށްފަހުގައި ކަން އެމަނިކުފާނު ފާހަގަކުރެއްވިއެވެ.
ކަންމިހެން ހުރުމުން، ބަންދުގައި ތިބޭ މީހުން ގުނަވަން ހަދިޔާ ކުރުމާގުޅޭ އިތުރު ހަރުދަނާ އުސޫލުތަކެއް ކަނޑައެޅުމެއް ނެތް ގޮތަށް އެމީހުންނަށް ގުނަވަން ހަދިޔާކުރުމުގެ ފުރުސަތު ދިނުމަކީ ގާނޫނު ތަންފީޒުކުރުމުގައި ގިނަ ގޮންޖެހުންތަކެއް ކުރިމަތިވެދާނެ ކަމެއް ކަމަށްވެސް ރައީސް ވިދާޅުވިއެވެ.
މި މާއްދާގެ އިތުރުންވެސް އިތުރު ދެ މާއްދާއަކަށް މަޖިލީހުން ގެނެސްފައިވާ ބަދަލުތަކުގެ ސަބަބުން ޤާނޫނު ތަންފީޒުކުރުމުގައި ދިމާވާނެ ދަތިތައް ފާހަގަކުރައްވައި އެކަންކަން ހައްލުކުރުމަށް ރައީސުލްޖުމްހޫރިއްޔާ ވަނީ އެދިވަޑައިގެންފައެވެ.
މަޖިލީހުގެ މިއަދުގެ ޖަލްސާގައި އިޖުތިމާޢީ ކޮމިޓީގެ މުޤައްރިރު އަސްމާ ވަނީ، އެ ބިލުން އޭރު އުނި ކުރިބައި އިތުރުކޮށް، އަދި އަނެއް ދެ މާއްދާއަށްވެސް ބަދަލު ގެންނަވާފައިވާކަން ފާހަގަކުރައްވާފައެވެ.
Advertisement
This content is created and paid for by advertisers and does not involve Voice Journalists
