ނޯވޭގެ ފޯވަޑް އާލިން ހާލަންޑް ވޯލްޑް ކަޕު ނިންމައި އެނބުރި ޤައުމަށް އައިއިރު 750 ޑޮލަރުގެ ޓެކްސިޑަރމީ ރެކޫނެއް ހިފައިގެން އައުމުން ގިނަ ބައެއްގެ ސަމާލުކަން ލިބިއްޖެއެވެ. 

އިނގިރޭސިވިލާތާ ދެކޮޅަށް ކުއާޓާ ފައިނަލުގައި ނޯވޭ ބަލިވުމުން ހާލަންޑް ގައުމަށް ދިޔައީ އާދިއްތަ ދުވަހުއެވެ. ހޯމަ ދުވަހު އޮސްލޯގެ ގާޑަރމޮއެން އެއާޕޯޓުން ފައިބައިގެން އައިއިރު އޭނާގެ އެއް އަތުގައި ރެކޫނު އަދި އަނެއް އަތުގައި ޑޮލްޗޭ އެންޑް ގަބާނާގެ ޓޯޓް ބޭގެއް ވެއެވެ.

ރެކޫނާ ބެހޭ ގޮތުން އެކްސްގައި ކުރި ޕޯސްޓެއްގައި ސަމާސާ ގޮތަކަށް "އޭތި އޭނާގެ ފަހަތުން އައީ" ކަމަށް ހާލަންޑް ބުނެފައިވެއެވެ.

މި ރެކޫނަކީ ޑަލަސްގައި ހުންނަ ވައިލްޑް ބިލްސް ވެސްޓަން ސްޓޯރ ކިޔާ ފެމިލީއަކުން ހިންގާ ފިހާރައަކުން ހޯދި އެއްޗެއް ކަމަށާއި ޖުލައި މަހުގެ ކުރީކޮޅު ހާލަންޑް އެ ފިހާރައަށް ޒިޔާރަތްކޮށްފައިވާ ކަމަށް އެ ފިހާރައިގެ އިންސްޓަގްރާމް ޕޯސްޓެއްގައި ބުނެފައިވެއެވެ.

ފިހާރައިގެ ވެބްސައިޓުގައިވާ ގޮތުން އެ ފިހާރައަކީ 40 އަހަރަށްވުރެ ގިނަ ދުވަހު ހިންގަމުން އަންނަ ފިހާރައެކެވެ. 

މެންޗެސްޓާ ސިޓީގެ 25 އަހަރުގެ ފޯވަޑް ހާލަންޑަކީ ގޯލް ޖެހުމުގެ ހުނަރާއެކު ފެޝަން ސްޓައިލުންވެސް ސޯޝަލް މީޑިއާ ސަމާލުކަން ހޯދާފައިވާ ކުޅުންތެރިއެކެވެ. އެގޮތުން އެކިއެކި ނަން މަޝްހޫރު ބްރޭންޑްތަކުގެ ލަގްޒަރީ އައިޓަމްތައް އޭނާ ގެންގުޅެއެވެ.