ރާއްޖޭގެ ބަށިބޯޅަ ކުރިއަރުވައި، މި ކުޅިވަރުގެ އަމިއްލަވަންތަކަން ހިމާޔަތްކުރުމަށްޓަކައި ކުރިން "ނޭޝަނަލް ބަށިބޯޅަ އެސޯސިއޭޝަން" (އެންބީއޭ) ގެ ނަމުގައި ހިންގަމުންދިޔަ ޖަމްއިއްޔާގެ ނަން "ބަށިބޯޅަ އެސޯސިއޭޝަން އޮފް މޯލްޑިވްސް" (ބީއޭއެމް) އަށް ބަދަލުކޮށް، އެ އެސޯސިއޭޝަންގެ އައު ޤަވާއިދު މިއަދު އާންމުކޮށްފިއެވެ.
ބަށިބޯޅަ އެސޯސިއޭޝަން އޮފް މޯލްޑިވްސް އިން ހާމަކުރި ގޮތުގައި، މި ބަދަލާއެކު އެކުލަވާލެވުނު އައު ޤަވާއިދަކީ ކުރީގެ އެންބީއޭ އިން ނެރެފައިވާ ބަށިބޯޅަ ކުޅުމުގެ ޤަވާއިދުތަކަށް ބައެއް އިސްލާހުތައް ގެނެސްގެން އެކުލަވާލާފައިވާ ފުރަތަމަ ޤަވާއިދެވެ. މި ޤަވާއިދު އާންމުކުރުމާއެކު، ކުރީން އެކުލަވާލާފައިވާ ހުރިހާ ޤަވާއިދުތަކެއް މިހާރު ވަނީ އުވިފައެވެ.
އެ އެސޯސިއޭޝަނުން ވަނީ މީގެ ފަހުން އެއްވެސް ފަރާތަކުން "ނޭޝަނަލް ބަށިބޯޅަ އެސޯސިއޭޝަން" ނުވަތަ އެންބީއޭގެ ނަން އެއްވެސް ގޮތަކަށް ބޭނުންކުރުމާއި، އެ ނަމުގައި ހުރި ކުރީގެ ޤަވާއިދުތައް ބޭނުންކުރުން މަނާކޮށްފައެވެ.
މި ބަދަލު ގެންނަން ޖެހުނު މައިގަނޑު ސަބަބެއް ކަމަށް ބީއޭއެމް އިން ފާހަގަކުރީ، އެކި ފަރާތްތަކުން އެކި ޤަވާއިދުތަކަށް ބަށިބޯޅަ މުބާރާތްތައް ރާވައި ހިންގުމުގެ ސަބަބުން ކުޅިވަރުގެ ކުރިމަގަށް ބުރޫއަރައި، ކުޅުންތެރިންގެ ރައްކާތެރިކަން ގެއްލެމުންދާތީއެވެ. އެހެންކަމުން، އެސޯސިއޭޝަންގެ އެއްވެސް މެންބަރަކު ބީއޭއެމްގެ ރަސްމީ ޤަވާއިދު ނޫން އެހެން ޤަވާއިދަކަށް މުބާރާތްތައް ހިންގުމާއި ކުޅުމަކީ މަނާކަމެއް ކަމަށް ވަނީ ކަނޑައަޅާފައެވެ.
މީގެ އިތުރުން، ބަށިބޯޅައަކީ ޒަމާނުއްސުރެ ދިވެހި އަންހެނުންނަށް ޚާއްޞަ ކުރެވިފައިވާ ސަގާފީ ކުޅިވަރަކަށްވާތީ، މި ކުޅިވަރުގެ ސަގާފީ އަމިއްލަވަންތަކަން ހިމާޔަތްކުރުމުގެ ގޮތުން ފިރިހެނުން މުބާރާތްތަކުގައި ކުޅުމާއި ޓީމުތަކުގައި ހިމެނުމަކީވެސް އައު ޤަވާއިދުގެ ދަށުން މަނާކަމެކެވެ.
ބަށިބޯޅަ އެސޯސިއޭޝަން އޮފް މޯލްޑިވްސް އިން ވަނީ މުބާރާތްތައް ރާވާ ހިންގާ ފަރާތްތަކުންނާއި، ކުޅުންތެރިން އަދި ސަރުކާރުގެ ކަމާބެހޭ އިދާރާތަކުން މި އައު ޤަވާއިދަށް ސަމާލުކަން ދިނުމަށް އިލްތިމާސްކޮށްފައެވެ.
13 އޮގަސްޓް 2015 ގައި އުފެދުނު މި އެސޯސިއޭޝަނަކީ ރާއްޖޭގެ ސަގާފީ ކުޅިވަރެއް ކަމަށްވާ ބަށި، ޒަމާނީ "ބަށިބޯޅަ" އެއްގެ ގޮތުގައި ކުރިއަރުވަން މަސައްކަތްކުރާ މައި އިދާރާއެވެ.
Advertisement
This content is created and paid for by advertisers and does not involve Voice Journalists
