މިލްކީވޭ ގެލެކްސީގެ މެދުތެރޭގައިވާ ކާއިނާތުގެ ހިރަފުހާއި ގޭސްތަކުގެ ތެރެއިން، ގުދުރަތީ ހަކުރުގެ ބާވަތެއް ފަލަކީ އިލްމުވެރިން ފުރަތަމަ ފަހަރަށް ހޯދައިފިއެވެ.

"އެރިތްރިއުލޯސް"ގެ ނަމުން ނަންދެވިފައިވާ މި ހަކުރަކީ އާންމުކޮށް ރާސްބެރީ ފަދަ މޭވާތަކުން ފެންނަ، ހަތަރު ކާބަން އެޓަމް އެކުލެވޭ މާއްދާއެކެވެ.

މި ހޯދުމަކީ ދިރުންތަކަށް ބޭނުންވާ މުހިންމު މާއްދާތައް ތަރިތަކުގެ ދެމެދުގައިވާ ހުސްމިނުގައި އުފެދިދާނެކަން ސާބިތުކޮށްދިން ފުރަތަމަ ފަހަރެވެ. މީގެ ސަބަބުން ދިރުންތަކުގެ އަސްލާ ގުޅޭ އެހެން މުހިންމު މޮލިކިއުލްތައް ފަޒާގެ ތެރެއިން ފެނިދާނެ ކަމުގެ އުންމީދު ވަނީ ބޮޑުވެފައެވެ.

ދިރުން ހުންނަ ތަކެތީގައި ހަކުރަކީ ހަކަތަ ފޯރުކޮށްދިނުމަށާއި، ބަޔޮލޮޖިކަލް އޮނިގަނޑުތައް ބިނާކުރުމުގެ އިތުރުން އާރް.އެން.އޭ އަދި ޑީ.އެން.އޭ ފަދަ ޖެނެޓިކް މާއްދާތައް އުފެދުމުގައި މުހިންމު ދައުރެއް އަދާކުރާ އެއްޗެކެވެ.

ސްޕެއިންގެ ސެންޓަރ ފޯ އެސްޓްރޯބަޔޮލޮޖީގެ އިލްމުވެރިން އިސްވެ ތިބެ ކުރި މި ދިރާސާގައި ބޭނުންކޮށްފައިވަނީ ސްޕެއިންގެ ދެ ސަރަހައްދެއްގައި ހުރި ރޭޑިއޯ ޓެލެސްކޯޕްތަކެކެވެ. އެއީ މެޑްރިޑްގެ އުތުރުގައިވާ ޔެބެސް އޮބްޒަވޭޓަރީ އާއި ސަރަ ނެވާޑާގައި ހުންނަ އައި.އާރް.އޭ.އެމް ޓެލެސްކޯޕެވެ. މި ޓެލެސްކޯޕްތައް ބޭނުންކޮށްގެން ސައިންސްވެރިން ދިރާސާކުރީ ގެލެކްސީގެ މެދުތެރޭގައިވާ "G+0.693−0.027" ނަމަކަށް ކިޔާ މޮލިކިއުލާ ކްލައުޑެކެވެ.

ދިރާސާގެ އިސް ސައިންސްވެރިޔާ އިޒަސްކުން ޖިމެނޭޒް-ސެރާ ވިދާޅުވި ގޮތުގައި، މި ހޯދުމަކީ ހީކުރި ވަރަށްވުރެ މާ ކުރިއަށް އެޅުނު ފިޔަވަޅެކެވެ. މީގެ ކުރިން ބެލެވިފައި އޮތީ ފަޒާގެ ތެރޭގައި ހުންނަ މޮލިކިއުލްތައް ބޮޑުވަނީ ވަރަށް ލަހުން ކާބަން އެޓަމްތައް އިތުރުވެގެން ކަމަށެވެ. ނަމަވެސް، މި ހޯދުމުން އެނގެނީ ތަރިތަކާއި ގްރަހެއް އުފެދުމުގެ ކުރިންވެސް ކާއިނާތުގެ ހުސްމިނުގައި މިފަދަ ކޮމްޕްލެކްސް ހަކުރު އުފެދިދާނެ ކަމެވެ.

އިމްޕީރިއަލް ކޮލެޖް ލަންޑަންގެ ޕްރޮފެސަރ މާކް ސެޕްޓަން ވިދާޅުވި ގޮތުގައި، މީގެ ކުރިން އެސްޓެރޮއިޑްތަކުން ހަކުރު ފެނިފައިވީ ނަމަވެސް، ފަޒާގެ ތެރެއިން މިފަދަ މާއްދާއެއް ފެނުމަކީ ދުނިޔެ ހިމެނޭ ސޯލާ ސިސްޓަމް އުފެދުނުއިރުވެސް ދިރުމަށް ބޭނުންވާ އޯގަނިކް މާއްދާތައް ފަޒާގައި ހުރިކަމުގެ ހެއްކެކެވެ. ސައިންސްވެރިން އަންދާޒާ ކުރާ ގޮތުގައި މީގެ 4 ބިލިއަން އަހަރު ކުރިން، އެސްޓެރޮއިޑްތައް ދުނިޔެއަށް ވެއްޓުނު ދުވަސްވަރު 0.5 މިލިއަނާއި 50 މިލިއަން މެޓްރިކް ޓަނުގެ ހަކުރު ދުނިޔޭގެ ސަތަހައަށް ފޯރާފައިވެދާނެއެވެ.

ނޭޗަރ އެސްޓްރޯނޮމީ ޖާނަލްގައި ޝާއިޢުކޮށްފައިވާ މި ދިރާސާގައި ބައިވެރިވި ކާލޯސް ބްރިއޯނެސް ވިދާޅުވީ، މި ހޯދުމުގެ ސަބަބުން އާރް.އެން.އޭ ގައި ހިމެނޭ "ރައިބޯސް" ފަދަ އެހެން މުހިންމު ހަކުރުގެ ބާވަތްތައް ފަޒާގެ ތެރެއިން ހޯދުމަށް މަގުފަހިވެގެންދާނެ ކަމަށެވެ. އެރިތްރިއުލޯސް އަކީ ހަމައެކަނި މޭވާގައި ހުންނަ އެއްޗެއް ނޫނެވެ. މިއީ ހަންގަނޑު މުށިކުރަން ބޭނުންކުރާ ބައެއް ކޮސްމެޓިކްސް އުފެއްދުމުގައިވެސް ބޭނުންކުރާ މާއްދާއެކެވެ.