ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) އާއި މޯލްޑިވްސް ރެޑް ކްރެސެންޓް (އެމްއާރްސީ) ގުޅިގެން ބޭއްވި ބޭސިކް ސައިކޮލޮޖިކަލް ފަސްޓް އެއިޑް ތަމްރީނު ޕްރޮގްރާމް ފުރިހަމަކުރި 100 ދަރިވަރުންގެ ލީޑަރުންނަށް ސެޓްފިކެޓް ދިނުމުގެ ރަސްމިއްޔާތެއް ބާއްވައިފިއެވެ.
މޯލްޑިވްސް ރެޑް ކްރެސެންޓްގެ ސެޓްފައިޑް ޓްރެއިނަރުންގެ ބެލުމުގެ ދަށުން ދެ ދުވަހުގެ މުއްދަތަށް ހަތަރު ބެޗަކަށް ބަހާލައިގެން ކުރިއަށްގެންދިޔަ މި ޕްރޮގްރާމުގައި ދަތިކަން ތަޙައްމަލްކުރާ މީހުންނަށް ވަގުތުން ދޭ ނަފްސާނީ އެހީތެރިކަން ފޯރުކޮށްދިނުމުގެ ހުނަރާއި ފަންނީ ފަރާތްތަކަށް ފޮނުވަންޖެހޭ ފަދަ ހާލަތްތައް ދެނެގަތުމުގެ ޤާބިލުކަން ދަރިވަރުންނަށް ދަސްކޮށްދީފައިވެއެވެ.
މީގެ އިތުރުން ބައިނަލްއަޤުވާމީ ފެންވަރުގައި ބަލައިގަނެފައިވާ "ބަލާ އަޑުއަހާ ގުޅުވާ" ހަރުފަތްތަކުގެ ބޭނުންކުރާނެ ގޮތާއި ދާދި ފުން ނަފްސާނީ ރިއެކްޝަންތައް ދެނެގަނެ ރެފަރަލްކުރާނެ ގޮތް ޑިމޮންސްޓްރޭޝަނާއި ރޯލް ޕްލޭ މެދުވެރިކޮށް ދަރިވަރުންނަށް ފަރިތަކޮށްދިނެވެ.
ސެޓްފިކެޓް ދިނުމުގެ ރަސްމިއްޔާތުގައި ވާހަކަދައްކަވަމުން އެމްއެންޔޫގެ ވައިސް ޗާންސެލަރ ފާހަގަކުރެއްވީ ދަތި ދަނޑިވަޅުތަކުގައި އެއްބައިވަންތަކަމާއި ހަމްދަރުދީއާއެކު އިތުބާރާއެކު ޢަމަލުކުރެވޭނެ ޔުނިވަރސިޓީ ކޮމިއުނިޓީއެއް ބިނާކުރުމުގެ މުހިންމުކަމެވެ.
ދަރިވަރު ލީޑަރުންނަށް ސައިކޮލޮޖިކަލް ފަސްޓް އެއިޑްގެ ހުނަރު ދަސްކޮށްދިނުމުގެ ސަބަބުން ރައްކާތެރި އެހީތެރި އަދި ދެމެހެއްޓެނިވި ކެމްޕަހެއް ބިނާކުރުމުގެ ޤާބިލުކަން ޔުނިވަރސިޓީން ވަރުގަދަކުރަމުންދާ ކަމަށާއި ދަރިވަރުންނަށް އެކުވެރިންނާއި މުޖުތަމަޢުއަށް އެހީތެރިވެދޭނެ ފަރާތްތަކަށް ވުމުގެ ފުރުޞަތު ލިބިގެންދާނެ ކަމަށް އެ ރަސްމިއްޔާތުގައި ބަޔާންކުރައްވާފައިވެއެވެ.
Advertisement
This content is created and paid for by advertisers and does not involve Voice Journalists
