މިއަހަރުގެ މިނިވަން ދުވަހުގެ މުނާސަބަތުގައި ބާއްވާ ޖަލްސާގައި ދިވެހި ދައުލަތަށް ޚިދުމަތްކުރުމުގެ އިނާމު 66 ބޭފުޅަކަށް އެރުވުމަށް ޤައުމީ އިނާމާބެހޭ ކޮމިޓީން ނިންމައިފިއެވެ.
އިނާމު އެރުވުމަށް ހަމަޖެހިފައިވަނީ ދިވެހި ދައުލަތަށް 41 އަހަރަށްވުރެ ދިގު މުއްދަތަކަށް ޚިދުމަތްކުރައްވައިފައިވާ ބޭފުޅުންގެ ތެރެއިން މިހާތަނަށް އިނާމު އަރުވާފައިނުވާ ބޭފުޅުންނަށެވެ. މި ބޭފުޅުން އިނާމަށް ހަމަޖެއްސުމުގެ ކުރިން ރައީސުލްޖުމްހޫރިއްޔާ ނިންމަވައި އެ ބޭފުޅުންގެ ރެކޯޑުތައް ރައީސުލްޖުމްހޫރިއްޔާގެ އޮފީހުން ހޯއްދަވައި އެ މަޢުލޫމާތު ޤައުމީ އިނާމާބެހޭ ކޮމިޓީއަށް ފޮނުއްވިއެވެ.
ފޮނުވި މަޢުލޫމާތުތައް ކޮމިޓީން ދިރާސާކުރައްވައި ބޭފުޅުންނާ ބައްދަލުކުރައްވައި ޝަރުޠު ފުރިހަމަވި ބޭފުޅުން ކަނޑައެޅުއްވިއެވެ.
ދައުލަތަށް ޚިދުމަތްކުރުމުގެ އިނާމު ދޭން ފެށްޓެވި ފަހުން ވަކި މުއްދަތަކަށް ޚިދުމަތްކުރައްވާފައިވާ ބޭފުޅުންގެ ނަންފުޅުތައް ކޮންމެ އަހަރަކުވެސް ޤައުމީ އިނާމާބެހޭ ކޮމިޓީއަށް ރައީސުލްޖުމްހޫރިއްޔާ ފޮނުއްވަމުން ގެންދަވައެވެ. މިހާތަނަށް 42 އަހަރަށްވުރެ ދިގު މުއްދަތެއްގައި ޚިދުމަތްކުރައްވާފައިވާ ބޭފުޅުންގެ ނަންފުޅުތައް ފޮނުއްވުމާ ގުޅިގެން އެ ބޭފުޅުންނަށް މި އިނާމު އަރުވާފައިވެއެވެ.
ދައުލަތަށް ޚިދުމަތްކުރުމުގެ އިނާމަށް މިއަހަރު ފުރުޞަތު ހުޅުވައިލެއްވުމުން މިދިޔަ ޖޫން މަހުގެ 11 ވަނަ ދުވަހުގެ ނިޔަލަށް 130 ފޯމު ހުށަހަޅާފައިވެއެވެ. މި ފޯމުތައް ޤައުމީ އިނާމާބެހޭ ކޮމިޓީން ބައްލަވައި އިންޓަރވިޔު ކުރެއްވުމަށްފަހު ޝަރުޠު ހަމަވާ ފަރާތްތަކަށް އިނާމު ދެއްވުމަށް ހަމަޖެހިފައިވަނީ މިއަހަރުގެ ޖުމްހޫރީ ދުވަހުގެ މުނާސަބަތުގައި ބާއްވަވާ ރަސްމީ ޖަލްސާގައެވެ.
Advertisement
This content is created and paid for by advertisers and does not involve Voice Journalists
