އިރާނާ ދެކޮޅަށް އެމެރިކާއިން ކުރިއަށްގެންދާ ހަނގުރާމައާ ނުރުހޭކަމަށް އެޤައުމުގެ ގިނަ ރައްޔިތުން ބުނެފިއެވެ.

މި ހަނގުރާމައަށް އެމެރިކާގެ ރައްޔިތުން ނުރުހޭކަމަށް ބުނެފައިވަނީ، މަޝްހޫރު އިކޮނޮމިސްޓް ނޫހާއި، ޔޫގަވް ގުޅިގެން ނެގި ހިޔާލް ހޯދުމުގެ ވޯޓުގައެވެ. މި ޕޯލަށް ވޯޓުދިން އެމެރިކާގެ 57 އިންސައްތަ މީހުން ގަބޫލުކުރަނީ އީރާނާ ދެކޮޅަށް ހަނގުރާމަ ފެށުމަކީ އެޤައުމުގެ ސަރުކާރުން ނިންމި ގޯސް އަމަލެއް ކަމަށެވެ. އެއީ ރަނގަޅު ނިންމުމެއްކަމަށް ބުނެފައިވަނީ ޕޯލްގައި ބައިވެރިވި މީހުންގެ ތެރެއިން 27 އިންސައްތަ އެވެ. 

ޕޯލްގައި ކުރިއަށްގެންދިޔަ ސާވޭއިން ދެއްކިގޮތުގައި ހަނގުރާމަ އަދި އެއް އަހަރަށް ނުވަތަ އެއަށްވުރެ ދިގު މުއްދަތަކަށް ދެމިގެންދާނެ ކަމަށް އެމެރިކާގެ 46 އިންސައްތަ މީހުން ގަބޫލުކުރާ ކަމަށް ވަނީ ހާމަވެފައެވެ.

އީރާނާ ދެކޮޅަށް ކުރަމުންގެންދާ ހަނގުރާމައާ ގުޅިގެން އެމެރިކާގައި މުޒާހަރާތައް ކުރިއަށްދާއިރު، މުޒާހަރާ ކުރާ މީހުން ބުނެފައިވަނީ،  ހަނގުރާމައަކީ ސުލްހައަށް އޮތް މަގެއް ނޫނެވެ. އަދި އެމެރިކާއާއި އިސްރާއީލުން އީރާނާ ދެކޮޅަށް ކުރަމުންދާ ހަނގުރާމައަކީ ޤާނޫނާ ޚިލާފު، އެއްވެސް އުުދުވާނެއް ނެތް ހާލަތެއްގައި ފެށި، އަދި މަޖުބޫރުވެގެން ކުރާ ކަމެއްވެސް ނޫނެވެ. 

މިއަހަރުގެ ފެބްރުއަރީ 28 ވަނަ ދުވަހު، އެމެރިކާއާއި އިސްރާއީލުން ވަނީ އީރާނުގެ ސިޓީތަކަށް ބޮން އަޅައި، އެ ގައުމުގެ ވެރިކަން ބަދަލުކުރުމަށް ގޮވާލައި އުދުވާނީ ހަނގުރާމައެއް ފަށާފައެވެ. ފުރަތަމަ ދިން ހަމަލާތަކުގައި، ސްކޫލަކަށް އަމާޒުވި ހަމަލާއެއްގައި މަދުވެގެން 175 މީހުން ޝަހީދުވިއިރު، އޭގެ ތެރޭގައި ގިނައީ ކުޑަކުދިންނެވެ. މީގެ އިތުރުން އީރާނުގެ ރޫހީ ލީޑަރު އާޔަތުﷲ އަލީ ޚާމަނައީ ވެސް ވަނީ ވައިގެ ހަމަލާއެއްގައި އަވަހާރަކޮށްލާފައެވެ.