ސިހުރުވެރިޔާ ކޮންމެ ފަދަ ސިހުރެއް ހެދި ނަމަވެސް، މާތް الله ކަނޑައަޅުއްވާފައިވާ ކަމެއް މެނުވީ އިންސާނާއަށް ނުޖެހޭނެކަން ޔަގީންކަމާއެކު ގަބޫލުކުރުމަށް މިއަދުގެ ހުކުރު ޚުތުބާގައި ހަނދާންކޮށްދީފިއެވެ.
"ސިހުރު ހާހޫރައިގެ ނުބައިކަން" މި މައުޟޫއަށް ރާއްޖޭގެ އެކި ކަންކޮޅުތަކުގައި މިއަދު އިއްވި ހުކުރު ޚުތުބާގައި ވަނީ ސިހުރަކީ އޭގައި ހަގީގަތެއްވާ ކަމެއްކަން ކީރިތި ގުރުއާނާއި ސުންނަތުން އެނގެން އޮތް ނަމަވެސް، އެކަމުން ރައްކާތެރިވުމަށް އޮތް އެންމެ ވަރުގަދަ އައްޑަނައަކީ މާތް اللهއަށް ވަކީލުކުރުން ކަމަށް ބުނެފައެވެ.
ޚުތުބާގައި ބުނި ގޮތުގައި، ސިހުރުހާހޫރައަކީ ސިހުރުވެރިޔާ ފުމޭ ފުމުންތަކަކާއި، ކުރާ ކިޔެވުންތަކަކާއި، ޖަހާ އަކަތަކާއި ގޮށްތަކެއްގެ އެހީގައި މީހާގެ ހަށިގަނޑަށް ނުވަތަ ވިސްނުމަށް އަސަރުކުރުވާ ކަންކަމެވެ. އަދި ސިހުރު ހެދުމަކީ އެންމެ ބޮޑެތި ފާފަތަކުގެ ތެރޭގައި ހިމެނޭ ޝިރުކުގެ އަމަލެއްކަން ޚުތުބާގައި ފާހަގަކުރިއެވެ.
ސިހުރުވެރިއަކަށް ވެވެނީ ޝައިތާނާއަށް ކިޔަމަންވުމަށް އަހުދުކަށަވަރު ހިފައި، ނަޖިސް ތަންތަނުގައި އުޅުމާއި، ކީރިތި ގުރުއާނަށް އިހާނެތިކޮށް ހިތުން ފަދަ ބޮޑެތި މުންކަރާތްތަކަށް އަރައިގަނެގެން ކަމަށްވެސް ޚުތުބާގައި ބުންޏެވެ.
މުސްލިމުންގެ އަގީދާއާ ގުޅޭގޮތުން ޚުތުބާގައި ބުނީ، ފެންނަ ހުވަފެނެއް ނުވަތަ ގައިގައި އަޅާ ވޭނެއް ނުވަތަ ކައިވެނި ލަސްވުން ފަދަ ކަންކަމަކީ ހަމައެކަނި ސިހުރުގެ ސަބަބުން މެދުވެރިވާ ކަންކަން ކަމަށް ގަބޫލުކޮށްގެން ނުވާނެ ކަމަށެވެ. އޭގެ ބަދަލުގައި، ކޮންމެ ނިއުމަތަކާއި މުސީބާތެއްވެސް ޖެހެނީ މާތް الله މިންވަރުފުޅުންކަން ގަބޫލުކުރަންޖެހެއެވެ.
މުސްލިމުންގެ ޢަޤީދާއަކީ ކޮންމެ ނިޢުމަތަކާއި ކޮންމެ މުޞީބާތެއް ޖެހެނީ މާތް اللهގެ މިންވަރުފުޅުންކަން ގަބޫލުކުރުމެވެ. ފަރުޟު ފަސް ނަމާދު އޭގެ ވަގުތުގައި އަދާކުރުމާއި، ހެނދުނާއި ހަވީރުގެ ޛިކުރުތަކަށް ރައްކާތެރިވުމާއި، ގޭތެރޭގައި ކީރިތި ޤުރްއާން (ޚާއްޞަކޮށް ސޫރަތުލްބަޤަރާ) ކިޔެވުން ގިނަކުރުމަކީ ޝައިޠާނާގެ މަގުތައް ބަންދުވެ، ހިތުގައިވާ ވަހުމުތައް ފިލައިދާ ކަމެކެވެ. ބަލިމަޑުކަމެއް ދިމާވާ އިރު ފުރަތަމަ ވެސް މާތް اللهގެ މަތީން ހަނދުމަކޮށް، އެކަލާނގެ ޙަޟުރަތުން ރައްކާތެރިކަމަށް އެދުމަކީ މުއުމިނުންގެ ސިފައެކެވެ.
ޚުތުބާ
ސިހުރުވެރިޔާގެ ފާފައިގެ ބޮޑުކަމާއި ފަސާދައިގެ ބޮޑުކަމުން އޭނާ ޤަތުލުކުރުމަށް ޞަޙާބީންނާއި ތާބިޢީ ބޭކަލުންގެ ތެރެއިން ޖަމާޢަތެއްގެ ބޭކަލުންގެ އަރިހުން ސާބިތުވާކަމުގައި އިބުނު ޤުދާމާ އެކަލޭގެފާނުގެ "އަލްމުޣްނީ"އޭ ކިޔުނު ފޮތުގައި ބަޔާންކުރައްވާފައިވާ ކަމަށް ޚުތުބާގައި ވެއެވެ.
ސިހުރުވެރިންގެ ގާތަށް ދިއުމުގެ ނުރައްކާތެރިކަމަށް އަލިއަޅުވާލަމުން ޚުތުބާގައި ބުނީ، ބައްޔެއްވެގެން ނުވަތަ އަޖުމަބަލައިލަންވެސް ސިހުރުވެރިއެއް ނުވަތަ ކާހިނެއްގެ ގާތަށް ގޮސް ސުވާލުކޮށްފި މީހާގެ ނަމާދު 40 ދުވަސް ވަންދެން ގަބޫލުނުކުރައްވާނެ ކަމަށެވެ. އަދި އެފަދަ މީހަކު ބުނާ ބަސް ގަބޫލުކޮށްފިނަމަ، ކީރިތި ރަސޫލާގެ މައްޗަށް ބާވައިލެއްވުނު ދީނަށް އެމީހަކު ކާފަރުވެއްޖެ ކަމަށް ހަދީޘްފުޅުތަކުން ސާބިތުވާކަމަށް ޚުތުބާގައި ހަނދާންކޮށްދިނެވެ.
ބައްޔެއްވެގެން ނުވަތަ އަޖުމަބަލައިލުމުގެ ނިޔަތުގައި ނަމަވެސް ސިހުރުވެރިޔެއް ނުވަތަ ކާހިނެއްގެ ގާތަށް ގޮސް ކަމަކު އެދުމާއި ސުވާލުކުރުމާއި އެ މީހުންގެ ބަސް ޤަބޫލުކުރުން ވެސް ނަހީކުރައްވައިފައި ވެއެވެ. ކީރިތި ރަސޫލާ ﷺ ޙަދީޘްކުރައްވައިފައިވާ ބަސްފުޅެއްގެ މާނައިގައި ވެއެވެ. "ކާހިނެއްގެ ގާތަށް ގޮސް ކަމަކާ މެދު ސުވާލުކޮށްފި ނަމަ ސާޅީސް ދުވަސް ވާންދެން އޭނާގެ ނަމާދު ޤަބޫލުނުކުރައްވާނެއެވެ." އަދި އެފަދަ މީހަކު ބުނާ ބަހެއް ޤަބޫލުކުރާ މީހާއާ މެދު ކީރިތި ރަސޫލާ ﷺ ޙަދީޘްކުރައްވައިފައި ވެއެވެ. (مَنْ أَتَى عَرَّافًا أَوْ كَاهِنًا فَصَدَّقَهُ بِـمَا يَقُوْلُ، فَقَدْ كَفَرَ بِـمَا أُنْزِلَ عَلَى مُحَمَّدٍ) މާނައީ: "ސިޙުރުވެރިޔެއް ނުވަތަ ކާހިނެއް ކުރެން ކަމަކާ މެދު ސުވާލުކޮށް، އޭނާގެ ވާހަކަ ޤަބޫލުކޮށްފި ނަމަ، މުޙައްމަދުގެފާނުގެ މައްޗަށް ބާވައިލެއްވުނު ތަކެއްޗަށް އޭނާ ކާފަރުވެއްޖެކަން ކަށަވަރެވެ."
ޚުތުބާ
ޚުތުބާގައި ވަނީ ސިހުރަށް ފަރުވާއެއް ހޯދާނަމަ، ސުންނަތުން ސާބިތުވާ ޝަރުޢީ ރުޤުޔާގެ މަގު އިޚްތިޔާރުކުރުމަށް އެދިފައެވެ.
ޝަރުޢީ ރުޤުޔާއަކީ ކީރިތި ޤުރްއާނުގެ އާޔަތްތަކާއި، ކީރިތި ރަސޫލާ ﷺ އަރިހުން ސާބިތުވެފައިވާ ދުޢާތަކާއި ޒިކުރުތައް ބޭނުންކޮށްގެން ކުރެވޭ ފަރުވާއެކެވެ. މީގެ ތެރޭގައި އެއްވެސް ކަހަލަ ސިއްރު ކިޔެވުމެއް، ނުވަތަ ނޭނގޭ ބަސްތަކެއް ނުވެއެވެ. ޞައްޙަ ގޮތުގައި ރުޤްޔާކުރާ މީހާ، މައިންބަފައިންގެ ނަމެއް ނާހާނެއެވެ. ގޮތްނޭނގޭ ފޮތިގަނޑުތަކާއި، ތަވީދުތަކާއި، ކަރުދާސްކޮޅުތައް ގެންގުޅޭކަށް ނުބުނާނެއެވެ. އަދި މާތް الله ފިޔަވައި އެހެން ފަރާތަކަށް ކަތިލުމަކަށް ނުވަތަ ދީނުގެ އަދަބާ ޚިލާފު އެއްވެސް ކަމެއް ކުރުމަކަށް ނޭދޭނެއެވެ. މި ފަދަ ކަންކަމަކީ ސިހުރުވެރީން ކުރާ ކަންކަމެވެ.
ޚުތުބާ
ޚުތުބާ ނިންމާލަމުން ވަނީ، މިފަދަ ބާތިލު ވަހުމްތަކުން ހިތްތައް ސަލާމަތްކޮށް، ދީނުގެ ސައްހަ އަގީދާގެ މަތީގައި ސާބިތުވެ ތިބުމަށް އެންމެހާ މުސްލިމުންނަށް އިލްތިމާސްކޮށްފައެވެ.
Advertisement
This content is created and paid for by advertisers and does not involve Voice Journalists
