ހުޅުމާލޭ ޚާންޖީ ރެސްޓޯރެންޓުގައި މަސައްކަތް ކުރި ވެއިޓަރަކު މަރާލި މައްސަލާގައި ދައުވާ އުފުލާފައިވާ ޕާކިސްތާނު ކައްކާ، މުޙައްމަދު އާބިދުގެ މައްޗަށް ކުށް ސާބިތުވެއްޖެއެވެ.
މި މައްސަލާގައި ދައުލަތުގެ ފަރާތުން އާބިދުގެ މައްޗަށް ދައުލަތުން އުފުލާފައިވަނީ، ގަސްތުގައި މީހަކު މަރާލިކަމުގެ ދައުވާއެވެ. މި މައްސަލާގައި ގޮތެއް ނިންމުމަށް ކްރިމިނަލް ކޯޓުގައި ކުރިއަށްގެންދިޔަ ޝަރިއަތުގެ މަޖިލިސް ބައްވާފައިވަނީ މިދިޔަ ބުދަދުވަހެވެ. ކްރިމިނަލް ކޯޓުގެ ގާޒީ އަހުމަދު ޝާފިއު ބެއްލެވި މި މައްސަލާގެ ނިޔާ އިއްވަވަމުން ގާޒީ ވަނީ ގަސްތުގައި މީހަކު މަރާލިކަމުގެ ދައުވާ ސާބިތުވާކަމަށް ހުކުމް އިއްވާފައެވެ.
އާބިދުގެ މައްޗަށް އުފުލި ދައުވާއަށް އޭނާ ވަނީ އިންކާރުކޮށްފައެވެ. އެގޮތުން ހިނގިކަމެއް ހިނގީ އޭނާގެ އަމިއްލަ ނަފްސުގެ ދިފާއުގައި އަތްހޫރާލި ވަގުތުގައި ކަމަށާއި، އޭރު އަތުގައި ވަޅިއެއް އޮތްކަން ނޭނގޭކަމަށް އޭނާ ވަނީ ބުނެފައެވެ.
މިކަމެއް ހިނގާފައިވަނީ، ޕާކިސްތާނުގެ ކެއުންތަކަށް ހާއްސަ 'ހާންޖީ' ރެސްޓޯރަންޓުގެ ތެރޭގައި 2022 ވަނަ އަހަރުގެ އޭޕްރިލްމަހުގެ 16 ވަނަ ދުވަހެވެ. މި ހާދިސާގައި މަރާލާފައިވަނީ، ބަންގްލަދޭޝް ވެއިޓަރެއް ކަމަށްވާ އެމްޑީ ޝަމީމެވެ. މި ހާދިސާއަށްފަހު އާބިދު، ހައްޔަރުކުރީ ފިލައިގެން އުޅެނިކޮށް އެ ދުވަހުގެ ރޭ ދަންވަރު، ހުޅުމާލޭ ދެވަނަ ފޭސްގެ އަތިރިމަތީގައި ހުއްޓަ އެވެ.
Advertisement
This content is created and paid for by advertisers and does not involve Voice Journalists
