އީރާނާއި އެމެރިކާގެ ރައީސުން ސޮއިކުރި އެއްބަސްވުމާ ވޮޝިންގްޓަނުން ތަކުރާރުކޮށް ޚިލާފުވެފައިވާ ކަމަށް ބުނެ އެމެރިކާގެ ރައީސް ޑޮނަލްޑް ޓްރަމްޕްގެ ސޮއިގެ އެއްވެސް އިތުބާރެއް ނެތް ކަމަށް އީރާނުގެ ރޫޙާނީ ލީޑަރު މުޖުތަބާ ޚާމަނައީ ބުނެފިއެވެ.
ޚާމަނައީ ނެރުނު ބަޔާނެއްގައި ބުނީ ދެ ޤައުމުގެ ރައީސުންގެ ދެމެދުގައި ސޮއިކުރެވުނު ފަހުމުނާމާ (މެމޮރެންޑަމް އޮފް އަންޑަސްޓޭންޑިން) އާ ޚިލާފަށް އެމެރިކާ ތަކުރާރުކޮށް ޢަމަލުކޮށްފައިވާ ކަމަށެވެ. އެކަމުން ދައްކުވައިދެނީ ޓްރަމްޕްގެ ސޮޔަކީ "މުޅިން ބޭކާރު އިތުބާރު ގެއްލިފައިވާ" އެއްޗެއް ކަމަށެވެ.
މީގެ އިތުރުން ޚާމަނައީ ވަނީ އެމެރިކާއަށް އިންޒާރެއް ދީފައެވެ. އެގޮތުން ބުނީ އީރާނުގެ ރައްޔިތުންނާއި "ރެސިސްޓެންސް ފްރަންޓް"ގެ ފަރާތުން އެމެރިކާއަށް "ހަނދާން ނުނެތޭނެ ފިލާވަޅުތަކެއް" ދޭނެ ކަމަށެވެ.
މިދިޔަ ހަފުތާގައި ދެ ފަރާތުން ވެފައިވާ ހަމަލާ ބަދަލުކުރުން ހުއްޓައިލުމުގެ އެއްބަސްވުން ރޫޅިގެން ދިޔުމާ ގުޅިގެން ވޮޝިންގްޓަނާއި ތެހެރާނުން ދަނީ ޙަމަލާ ބަދަލުކުރަމުންނެވެ. މި ޙާލަތުގެ ސަބަބުން ބޮޑު ހަނގުރާމައެއް ފެށިދާނެ ކަމުގެ ބިރު ވަނީ އިތުރުވެފައެވެ.
Advertisement
This content is created and paid for by advertisers and does not involve Voice Journalists
