ބެންކް އޮފް މޯލްޑިވްސް އިން ބޭރުގެ ޕްރޮފެޝަނަލް ކޯސްތަކާއި ސަނަދުތައް ހާސިލުކުރުމަށް ބޭނުންވާ ފަރާތްތަކަށް އެއްވެސް ރަހުނެއް ބެހެއްޓުމަކާ ނުލައި ޑޮލަރުން ފައިނޭންސް ލިބޭ ގޮތަށް ކިޔަވާ ލޯނަށް ބޮޑެތި ބަދަލުތަކެއް ގެނެސްފިއެވެ.
ބީއެމްއެލުން ކިޔަވާ ލޯނަށް ގެނައި މި ބަދަލާއެކު، ބައިނަލްއަޤުވާމީ ގޮތުން ޤަބޫލުކުރެވޭ ތަމްރީނު ޕްރޮގްރާމްތައް ފުރިހަމަކުރުމާއި އެ ޕްރޮގްރާމްތަކާ ގުޅިފައިވާ ސެޓިފިކޭޝަން ފީ ދެއްކުމަށް ޑޮލަރު ފައިނޭންސިން ބޭނުންކުރެވޭނެއެވެ. މީގެ ސަބަބުން ބޭރު ފައިސާގެ މުޢާމަލާތްތައް ކުރިއަށް ގެންދިޔުމުގައި ދަރިވަރުންނަށް ފަސޭހަ މަގެއް ފަހިވެގެންދާނެ ކަމަށް ބީއެމްއެލުން ބުންޏެވެ.
މި ފައިނޭންސިންގެ އިންތިޒާމު ހަމަޖެހިފައިވާ ގޮތުން ކޯސް ފީ ޓެލެގްރެފިކް ޓްރާންސްފާ (ޓީޓީ) މެދުވެރިކޮށް ތަޢުލީމީ މަރުކަޒަށް ނުވަތަ ކަމާ ގުޅޭ އިދާރާއަށް ބޭންކުން ސީދާ ފޮނުވައިދޭނެއެވެ. އެއާ އެކު ދަރިވަރުންނަށް ހަމަޖެހޭ ސްޓައިޕެންޑް (އެލަވަންސް) ޖަމާ ކުރެވޭނީ ކަސްޓަމަރުގެ އެކައުންޓަށް ސީދާ ގޮތުންނެވެ.
ބީއެމްއެލްގެ ސީއީއޯ އަދި މެނޭޖިން ޑައިރެކްޓަރު މުޙައްމަދު ޝަރީފް ވިދާޅުވީ "ބޭންކުގެ ޚިދުމަތްތައް އިތުރަށް ހަރުދަނާކުރުމަށް ކުރަމުންދާ މަސައްކަތުގެ ތެރެއިން ކިޔަވާ ލޯނަށް މި ގެނައި ބަދަލަކީ ކަސްޓަމަރުންގެ ބޭނުންތަކަށް ރިއާޔަތްކޮށް ގެނައި ބަދަލެއް ކަމަށެވެ. އަދި ރަހުނަކާ ނުލައި ޑޮލަރުން ލިބޭ މި ފުރުސަތަކީ މަތީ ތައުލީމާއި ޕްރޮފެޝަނަލް ސަނަދުތައް ހާސިލުކުރަން ބޭނުންވާ ފަރާތްތަކަށް ލިބިގެންދާނެ ބޮޑު ލުޔެއްކަމަށް ޝަރީފް ކަމަށެވެ.
Advertisement
This content is created and paid for by advertisers and does not involve Voice Journalists
