ސެންޓަރ އެންޓަރޕްރައިސަސް އިން ދައުލަތުގެ ބައެއް އިދާރާތަކަށް ފޯރުކޮށްދިން ހިދުމަތްތަކަށް ފައިސާ ނުދައްކާކަމަށް ބުނެ އެކުންފުނިން ހުށަހެޅި މައްސަލަތަކުގެ ލިޔެކިޔުންތަކުގައި ބޮޑެތި އޮޅުވާލުންތަކެއް އުޅޭކަމަށް ފާހަގަކުރެވޭތީވެ އެކުންފުންޏާ ދެކޮޅަށް ޖިނާއީ ފޔރިހަމަ ތަހްގީގެއް ކުރުމަށް ދައުލަތުގެ އޮޑިޓަރ ޖެނެރަލް އެދިއްޖެއެވެ.

އޮޑިޓަރ ޖެނެރަލްގެ އޮފީހުން ވަނީ ސެންޓަރ އެންޓަރ ޕްރައިސަސް އިން ދައުލަތުގެ އިދާރާތަކަށް ފޯރުކޮށްދިންކަމަށް ބުނާ ތަކެތީގެ އަގު ހޯދުމަށް ހުށަހަޅާފައިވާ މައްސަލަތަކާ ގުޅޭ ހާއްސަ ރިޕޯޓް އާއްމުކޮށްފައެވެ. މީގެ ތެރެއިން މި ރިޕޯޓްގައި ވަނީ މިނިސްޓްރީ އޮފް ހެލްތުގެ ދަށުން ކުރިން ހިންގި ޑީއެމްއެސް އަށް ސެންޓަރ އެންޓަރ ޕްރައިސަސްއިން 2008 ވަނަ އަހަރުގެ ތެރޭގައި ސަޕްލައިކޮށްދީފައިވާ ކަމަށް ބުނާ ބޯފެން ރައްކާކުރާ 900 ކަޅުހަމުގެ އަގާއި ޖޫރިމަނާއަށްވާ ޖުމްލަ 25.3 މިލިއަން ރުފިޔާ ހޯދުމަށް ހުށަހަޅާފައިވާ މައްސަލާގައި ފާހަގަކުރެވުނު ކަންކަން ބަޔާންކޮށްފައެވެ.

އެގޮތުން އެކުންފުނިން ހުށަހެޅި ލިޔެކިޔުންތަކުގައި އެ މަސައްކަތަކީ ފިނޭންސް މިނިސްޓްރީން ކުރިއަށްގެންދިޔަ ޕްރޮޖެކްޓެއްގެ ދަށުން ކުރިއަށްގެންދިޔަ މަސައްކަތެއްކަމަށް ބަޔާންކުރިނަމަވެސް އެފަދަ ޕްރޮޖެކްޓެއް މިނިސްޓްރީން ކުރިއަށް ގެންދިޔަކަން އެނގެން ނެތްކަމަށް އޮޑިޓްގައި ވަނީ ފާަހަގަކޮށްފައެވެ. މީގެ އިތުރުން އެކުންފުންޏަށް ލިބެންޖެހޭ ފައިސާކަން ސާބިތުކުރުމަށް އެކުްނފުނިން ހުށަހަޅާފައިވާ ލިޔެކިޔުންތަކުގައި ޑިއެމްއެސްގެ މުވައްޒަފުންގެ ގޮތުގައި ދެ ނަމެއްގައި ސޮއިކޮށްފައިވީނަމަވެސް އެ ނަންނަމުގައި އެއްވެސް މުއައްޒަފަކު ޑީއެމްއެސް އަދި ހެލްތު މިނިސްޓްރީގައި ވަޒީފާ އަދާކުރިކަން އެނގެން ނެތްކަމަށް ވަނީ ބަޔާންކޮށްފައެވެ. 

ޑީއެމްއެސްއަށް ފޯރުކޮށްދިންކަމަށް ބުނާ މެޑިކަލް އިކުއިޕްމަންޓްގެ އަގާއި ޖޫރިމަނާގެ ގޮތުގައި ހޯދުމަށް ހުށަހަޅާފައިވާ 83.94 މިލިއަން ރުފިޔާގެ މައްސަލާގައި ބުނެފައިވަނީ، މީގެ ތެރެއިން ޖޫރިމަނާ ނުހިމަނައި ހޯދަން ހުށަހަޅާފައިވަނީ 32.7 މިލިއަން ރުފިޔާ ކަމަށެވެ. އޮޑިޓުން އެނގޭ ގޮތުގައި މި ފައިސާ ހޯދުމަށް އެކުންފުނިން ހުށަހަޅާފައިވާ ލިޔުންތަކަކީ ހިނގާފައިވާ މުއާމަލާތެއްކަން ދެއްކުމަށް އުފައްދާފައިވާ ލިޔުންތަކެއްކަމަށް ބެލެވޭ ގިނަ ކަންކަން ފާހަގަކުރެވިފައިވާކަމަށެވެ. އަދި މިކަމާ ގުޅިގެން ތަކެތި ސަޕްލައިކޮށްދިންކަން ދެއްކުމަށް ތައްޔާރުކޮށްފައިވާ 12.4 މިލިއަން ރުފިޔާގެ އިންވޮއިސްއަކީވެސް ސައްހަނޫން އިންވޮއިސްތަކެއްކަމަށް އެނގޭކަމަށް ރިޕޯޓްގައި ވަނީ ބުނެފައެވެ. މީގެ އިތުރުންވެސް އޮޑިޓަރ ޖެނެރަލްގެ ރިޕޯޓްގައި ވަނީ އެކުންފުނިން މިކަމުގައި ކޮށްފައިވާ ސައްހަނޫން ގިނަ މުއާމަލާތްތަކެއް ފާަހަގަކޮށްފައެވެ.

ސެންޓަރ އެންޓަރ ޕްރައިސަސް އިން ދައުލަތުގެ އިދާރާތަކަށް ފޯރުކޮށްދިންކަމަށް ބުނާ ތަކެތީގެ އަގު ހޯދުމަށް ހުށަހަޅާފައިވާ މައްސަލަތަކާ ގުޅޭ ހާއްސަ ރިޕޯޓްގައި އޮޑިޓަރ ޖެނެރަލް ވަނީ، އެކުންފުނިން ހުށަހެޅި ލިޔެކިޔުންތަކުގެ ފޮރެންސިކް އެނަލިސިސް ހަދައި މިކަމުގައި ޝާމިލްވާ އެންމެހައި ފަރާތްތަކާމެދު ފިޔަވަޅު އެޅުމަށްޓަކައި މި މައްސަލަތަކާ ގުޅޭ ފުރިހަމަ ޖިނާއީ ތަހްގީގެއް ކުރިއަށްގެންދިއުމަށް އެދިފައެވެ.