ދިވެހި ފުލުހުންގެ ޚިދުމަތުގެ ވާޖިބު އަދާކުރަނިކޮށް ނިޔާވި ފުލުހުންގެ ޒިކުރާ އައުކޮށް އެ ފަރާތްތަކުގެ ޚިދުމަތުގެ އަގު ވަޒަންކުރުމަށް ބާއްވާ ޕޮލިސް މެމޯރިއަލް ޑޭގެ ރަސްމީ ހަރަކާތްތައް ރޭ ފަށައިފިއެވެ.
ހަރަކާތްތައް ފެށުމުގެ ގޮތުން ރޭ ދަންވަރު 12:00 ގައި އިސްކަންދަރު ބިލްޑިންގުގައި ނަގާފައިވާ ދިވެހި ފުލުހުންގެ ޚިދުމަތުގެ ދިދަ ބައިދަނޑިއަށް ތިރިކޮށްފައިވެއެވެ.
ޖުލައި 23 ވަނަ ދުވަހަކީ ކޮންމެ އަހަރަކުވެސް ފުލުހުންގެ މެމޯރިއަލް ދުވަހުގެ ގޮތުގައި ފާހަގަކުރަން ކަނޑައަޅާފައިވާ ދުވަހެވެ.
މި ދުވަސް ޚާއްޞަކޮށްފައިވަނީ ޑިއުޓީގެ ތެރެއިން ކުރިމަތިވި ހާދިސާތަކުގައި ފުރާނަ ގެއްލިގެން ދިޔަ ފުލުހުން ޤައުމަށްޓަކައި ވީ ގުރުބާނީ ހަނދާނަށް ގެނެސް އެ ފަރާތްތަކުގެ ޚިދުމަތް ފާހަގަކުރުމަށެވެ.
މާލޭގެ އިތުރުން ރާއްޖޭގެ އެކި ކަންކޮޅުތަކުގައި ހުރި ހުރިހާ ޕޮލިސް ސްޓޭޝަނެއްގައިވެސް މިއަދު ފުލުހުންގެ ޚިދުމަތުގެ ދިދަ ބައިދަނޑިއަށް ތިރިކުރާ ގޮތަށް ވަނީ ހަމަޖައްސައިފައެވެ.
ޚިދުމަތުގައި ދެމިތިއްބައި ވަކިވެދިޔަ ފުލުހުންގެ ހަނދާން އައުކުރުމުގެ ގޮތުން ދިވެހި ފުލުހުންގެ ޚިދުމަތުން ކޮންމެ އަހަރަކުވެސް މިފަދަ ހަރަކާތްތައް ބާއްވަމުން ގެންދެއެވެ.
Advertisement
This content is created and paid for by advertisers and does not involve Voice Journalists
