ޔަމަނުގެ ހޫތީ ޖަމާޢަތުން ރެޑް ސީ ހުރަސްކޮށް ދަތުރުކުރަމުން ދިޔަ ސަޢޫދީ ޢަރަބިއްޔާގެ ދެ ތެޔޮ ޓޭންކަރަކަށް ބެލިސްޓިކް އަދި ކްރޫޒް މިސައިލާއި ޑްރޯން ބޭނުންކޮށްގެން ހަމަލާ ދީ އެ ދެ އުޅަނދުގައި އަލިފާން ރޯކޮށްލައިފިއެވެ.

ޙޫތީ ޖަމާޢަތުގެ އަސްކަރީ ތަރުޖަމާނު ޔަޙްޔާ ސަރީޢު ބުދަ ދުވަހު ހާމަކުރި ގޮތުގައި ހަމަލާ އަމާޒުކޮށްފައި ވަނީ "އެންސީލިއާ" އާއި "ލައިލާ" ނަމަކަށް ކިޔާ ދެ ޓޭންކަރަށެވެ. ޙޫތީންގެ ހަތިޔާރު އެޅި ފައުޖުން ނެރެފައިވާ ކަނޑުގެ ދަތުރުފަތުރު ބަންދުކުރުމުގެ ނިންމުމާ އެ ދެ އުޅަނދު ޚިލާފުވެފައިވާ ކަމަށް ސަރީޢު ބުންޏެވެ. މީގެ އިތުރުން ގާތްގަނޑަކަށް ދިހައެއްހާ ބޯޓު މަގުން އެއްކައިރިކޮށް އަނބުރާ ފޮނުވައިލެވިފައިވާ ކަމަށް ވެސް އޭނާ ބުންޏެވެ.

ޙޫތީ ޖަމާޢަތުން ޖުލައި 20 ގައި ސަޢޫދީ ޢަރަބިއްޔާގެ މައްޗަށް ކަނޑުގެ ދަތުރުފަތުރު ބަންދުކުރުމުގެ ފިޔަވަޅު ވަނީ އިޢުލާނުކޮށްފައެވެ. މި ފިޔަވަޅު އެޅީ ޔަމަނުގެ ސަރުކާރުން ޙޫތީ ޖަމާޢަތުގެ ބާރުގެ ދަށުގައިވާ ޞަންޢާ އެއާޕޯޓަށް ބޮން އެޅުމާ ގުޅިގެންނެވެ. އީރާނުގެ މަތިންދާ ބޯޓެއް ޖެއްސިޔަ ނުދިނުމަށް ދިން އެ ހަމަލާ ވެގެން ދިޔައީ ހަތަރު އަހަރުތެރޭ ޔަމަނަށް ކުރިމަތިވި އެންމެ ގެއްލުން ބޮޑު ހަމަލާތަކަށެވެ. ޙޫތީ ޖަމާޢަތުން ސިފަކުރީ މިއީ "ލޮލަކަށް ލޮލެއް"ގެ ސިޔާސަތެއް ކަމަށެވެ.

އެ ޖަމާޢަތުން ތުހުމަތުކޮށްފައި ވަނީ ސަޢޫދީ ވެރިން 12 ވަރަކަށް އަހަރު ވަންދެން "އަނިޔާވެރި ޙިޞާރެއް" ހިންގައި ބަނދަރުތަކާއި ވައިގެ ބަނދަރުތައް ބަންދުކޮށް ވަސީލަތްތައް ފޭރިގަންފައިވާ ކަމަށެވެ.

ޙޫތީ ޖަމާޢަތުގެ މެންބަރެއް ކަމުގައިވާ ޙުސައިން އަލް ބުޚައިތީ ބުނީ "އަންޞާރު الله ގެ ކަނޑުގެ ބަންދުގެ އެންމެ ފަހު ލަނޑުދަނޑިއަކީ ޙޫތީންގެ ބާރުގެ ދަށުގައިވާ ބަނދަރުތަކާއި ވައިގެ ބަނދަރުތަކުގެ މައްޗަށް ސަޢޫދީ ޢަރަބިއްޔާ އިން އަޅާފައިވާ ދަތިކުރުމުގެ ފިޔަވަޅުތައް ނެގުމަށް  މަޖުބޫރުކުރުން" ކަމަށެވެ.

މީގެ ކުރިން ރެޑް ސީ ބަންދުކޮށް އިސްތިއުމާރީ އިޒްރޭލުގެ ބަނދަރުތަކަށް ދަތުރުކުރާ ބޯޓުފަހަރު ހުއްޓުވައިލި ކާމިޔާބީ ފާހަގަކުރައްވައި ބުޚައިތީ ބުނީ "އެ ފިޔަވަޅުގެ ނަތީޖާއެއްގެ ގޮތުން ދެކުނު އިޒްރޭލުގެ އީލާތު ބަނދަރު ބަންދުކުރަން ޖެހުނު" ކަމަށާއި "އެންމެ ފަހުން ޢުމާނުގެ މެދުވެރިކަމުގެ ދަށުން އެމެރިކާއަށް ޙޫޘީންނާ އެކު އެއްބަސްވުމެއް ހަދަން ޖެހުނު" ކަމަށެވެ.

ހުރްމުޒް ކަނޑުއޮޅި ބަންދުވެފައި ވުމާ އެކު ސަޢޫދީ ޢަރަބިއްޔާ ދިޔައީ ރެޑް ސީ އާއި ބާބުލް މަންދަބު ކަނޑުއޮޅި މެދުވެރިކޮށް ތެޔޮ ބޭރުކުރެވޭނެ ބަދަލު މަގުތައް ހޯދަމުންނެވެ. ނަމަވެސް ޙޫތީންގެ ބަންދުގެ ސަބަބުން އެ މަގުތަކަށް ވެސް ވަނީ ބޮޑު ނުރައްކަލެއް ކުރިމަތިވެފައެވެ.

ޔަމަނާއި ޖިބޫޓީ އަދި އެރިޓްރީއާ ދެމެދު ހުންނަ ބާބުލް މަންދަބް ކަނޑުއޮޅީގެ އެންމެ ހަނި ހިސާބުގެ ފުޅާ މިނުގައި ހުންނަނީ އެންމެ 29 ކިލޯމީޓަރެވެ. ސުއޭޒް ކެނެލް ބޭނުންކުރާ ބޯޓުފަހަރު ވަންނައި ނުކުންނަން ލިބެނީ ދެ ޗެނަލެވެ. 2024 ވަނަ އަހަރު އެ ކަނޑުއޮޅި ހުރަސްކޮށް ގާތްގަނޑަކަށް 4.1 ބިލިއަން ފީފާ ސާފުނުކުރާ ތެލާއި ސާފުކޮށްފައިވާ ޕެޓްރޯލިއަމް ދަތުރުކޮށްފައިވެއެވެ. އެއީ ދުނިޔޭގެ ޖުމްލައިގެ ގާތްގަނޑަކަށް ފަސް އިންސައްތައެވެ.

ބާބުލް މަންދަބް ވެސް ބަންދުވެއްޖެ ނަމަ ދުނިޔޭގެ ތެލާއި ގޭހުގެ ސަޕްލައިގެ 25 އިންސައްތަ ހުއްޓުމަކަށް އައުމުގެ ބިރު އެބައޮތެވެ. ޙޫތީ ޖަމާޢަތުން ވަނީ 2023 ވަނަ އަހަރުގެ އޮކްޓޫބަރުގައި ޣައްޒާއާ ދެކޮޅަށް ފެށި ޤަތުލްއާއްމަށް ފަހު ބާބުލް މަންދަބު ސަރަޙައްދުގައި ބޯޓުފަހަރަށް ހަމަލާ ދީ ބައިނަލްއަޤުވާމީ ވިޔަފާރި ދަތުރުތައް ހުއްޓުމަކަށް ގެނެސްފައެވެ.