އިންޑިއާގެ ތައުލީމީ ވަޒީރު ދަރުމެންދުރަ ޕްރަދާން އިސްތިއުފާ ދެއްވުމަށް ގޮވާލައި، މަޝްހޫރު އެކްޓިވިސްޓް ސޯނަމް ވަންގްޗުކް ކުރަމުންދިޔަ 26 ދުވަހުގެ ބަނޑުހައިހޫނުކަމުގެ ހަޅުތާލު ނިންމާލައިފިއެވެ.

އުމުރުން 59 އަހަރުގެ ވަންގްޗުކް ބުރާސްފަތި ދުވަހުގެ ރޭ 'އެކްސް' ގައި ކުރި ޕޯސްޓެއްގައި ބުނީ، އޭނާގެ ހަޅުތާލު ހުއްޓާލީ އެކި ޝަރުތުތަކާ މެދު ކުރެވުނު ދިގު މަޝްވަރާތަކަށް ފަހު އަދި ގައުމުގައި ހަމަނުޖެހުން ހިނގައިފާނެ ކަމުގެ ބިރު އޮތުމުން ކަމަށެވެ.

ވަންގްޗުކް ބަނޑުހައިހޫނުކަމުގެ ހަޅުތާލު ފެށީ ޖޫން 28 ގައި މެޑިކަލް ކޮލެޖަށް ވަނުމުގެ އިމްތިޙާނު ޕޭޕަރުތައް ލީކުވެ އެތައް މިލިއަން ދަރިވަރުންނެއް އަލުން އިމްތިޙާނު ހަދަން ޖެހުނު މައްސަލައިގައެވެ.

އިންޑިއާގެ ޒުވާނުން އިސްވެ އުފައްދާފައިވާ ކޮކްރޯޗް ޖަންތާ ޕާޓީ (ސީޖޭޕީ) ގެ ޙަރަކާތާ ގުޅިގެން ވަންގްޗުކް ކުރިއަށް ގެންދިޔަ މި ހަޅުތާލު ނިންމާލާފައި މިވަނީ، ބޮޑުވަޒީރު ނަރެންދުރަ މޯދީ ވީޑިއޯ މެދުވެރިކޮށް ދިން ހިތާބެއްގައި، އިމްތިހާނު ކަރުދާސް ލީކުވާ މައްސަލަ ހުއްޓުވުމަށް ހަރުކަށި ގާނޫނެއް ހަދާނެ ކަމަށް ބުނެފައިވާ ދަނޑުވަޅެއްގައެވެ.

އެގޮތުން މޯދީ ވަނީ ބައިވެރިވި ފަރާތްތަކާ ދެކޮޅަށް ކޯޓުގެ ޝަރީޢަތްތައް އަވަސްކުރުމަށް ސަރުކާރުން މަސައްކަތްކުރަމުންދާ ކަމަށާއި ހުކުރު ދުވަހު ކެބިނެޓުގައި މި މައްސަލަ މަޝްވަރާ ކުރާނެ ކަމަށް މޯދީ ބުނެފައެވެ. މޯދީ ޕޭޕަރު ލީކުވި މައްސަލަ ސިފަކުރީ އެތައް ސަތޭކަ ހާސް ދަރިވަރުންނަށް "ވަރަށް ބޮޑު ހިތާމައެއް" ގެ ގޯތުގައެވެ. ނަމަވެސް ވަޒީރު ޕްރަދާންގެ ނަން އެއްގޮތަކަށް ވެސް ނުގެނެއެވެ.

ސީޖޭޕީއަށް ތާއީދުކުރާ އެތައް ހާސް ބަޔަކު ނިއު ދޭލީގެ ޖަންތަރް މަންތަރް މައިދާނުގައާއި އިންޑިއާގެ އެކި ސިޓީތަކުގައި މުޒާހަރާ ކުރަމުން ގެންދެއެވެ. މޯދީ 2024 ވަނަ އަހަރު ތިންވަނަ ދައުރަކަށް ހޮވިފަހުން ކުރިމަތިވި އެންމެ ބޮޑު ގޮންޖެހުމަކަށް މި އިހުތިޖާޖުތައް ވެފައިވެއެވެ.

މި ހަފުތާގެ ކުރީކޮޅު ޖަންތަރު މަންތަރު ސަރަހައްދުގައި ހިނގި މުޒާހަރާތަކުގެ ތެރެއިން ފުލުހުން ވަނީ ކަރުނަގޭސް ޖަހައި ބާރުގެ ބޭނުންކޮށްފައެވެ. ފުލުހުންގެ މި އަމަލުތަކާއި އިންޓަނެޓްގެ ހިދުމަތް ކަނޑާލާފައިވާތީ ހިއުމަން ރައިޓްސް ވޮޗް އަދި އެމްނެސްޓީ އިންޓަނޭޝަނަލުން ވަނީ އެކަން ކުށްވެރިކޮށްފައެވެ.

ވަންގްޗުކް ހަޅުތާލު ނިންމައިލުމާ ގުޅިގެން ސީޖޭޕީގެ ބާނީ އަބީޖީތް ދީޕްކޭ ބުރާސްފަތި ދުވަހުގެ ރޭ ބުނީ ވަންގްޗުކް ހަޅުތާލު ނިންމައިލީތީ "ހިތްހަމަޖެހި ޝުކުރުވެރިވާ" ކަމަށެވެ.

"ސޯނަމް ސާރގެ ހިތްވަރާއި ޤުރުބާނީއަށް ޝުކުރު ދަންނަވަން. އަމިއްލަ ފުރާނަ ނުރައްކަލަށް ލައިގެން މުޅި ޤައުމުގެ ޟަމީރު ހޭލައްވައިލައިދެއްވައިފި. ސާރގެ ފުރާނައަކީ މި ޤައުމަށް ނުހަނު އަގުބޮޑު އެއްޗެއް" ކަމަށެވެ.

ނަމަވެސް، ތައުލީމީ ވަޒީރު ދަރުމެންދުރަ ޕްރަދާން އިސްތިއުފާ ދެއްވަންދެން ޖަންތަރު މަންތަރުގައި ކުރިއަށްދާ ސުލްހަވެރި އިހުތިޖާޖުތައް ކުރިއަށްދާނެ ކަމަށް އޭނާ ބުންޏެވެ.