މި މަހުގެ ނުވަ ވަނަ ދުވަހުގެ ރޭ މާލެ ކައިރީ ކަނޑުމަތީ ހިނގި އެކްސިޑެންޓަށް ފަހު، މަޑުނުކޮށް ދިޔަ އުޅަނދު އަދިވެސް ނުފެންނަ ކަމަށާއި އެ އުޅަނދު ހޯދުމުގެ މަސައްކަތް ކުރަމުން އަންނަ ކަމަށް ފުލުހުން މިއަދު ބުނެފިއެވެ.

މިމަހު 9 ވަނަ ދުވަހު، މެރިން ޕޮލިސް އިން މައުލޫމާތު ދިން ގޮތުގައި، މި ނުރައްކާތެރި އެކްސިޑެންޓް ހިނގާފައިވަނީ ލޯންޗަކާއި ދޯންޏެއް ޖެހިގެންނެވެ. މި ހާދިސާ ހިނގާފައިވަނީ މާލޭގެ އެއް ނަންބަރު ޖެޓީއާ ދިމާ ބޭރުން ކަނޑުމަތީގައެވެ.

ފުލުހުންނަށް މި ހާދިސާގެ ރިޕޯޓް ލިބިފައިވަނީ އެރޭގެ 9:10 ހާއިރު އެވެ.

ފުލުހުން ބުނި ގޮތުގައި، މި އެކްސިޑެންޓުގައި ހިމެނޭ "ލީޖަން 1" ނަމަކަށް ކިޔާ ލޯންޗު، ބޮޑުތަކުރުފާނުމަގު އިއްޒުއްދީން ފާލަން ކައިރިއަށް މަޑުކޮށްފައިވާ ކަމުގެ މައުލޫމާތު އެރޭ 9:16 ހާއިރު ވަނީ ލިބިފައެވެ.

ނަމަވެސް، މި އެކްސިޑެންޓްގައި ހިމެނޭ އަނެއް އުޅަނދު (ދޯނި) ވަނީ އެކްސިޑެންޓަށް ފަހު މަޑުނުކޮށް އެ ސަރަހައްދުން ގޮސްފައެވެ. އެ އުޅަނދު ދެނެގަތުމަށް ފުލުހުން އަންނަނީ ތަހުގީގު ކުރަމުންނެވެ.

ފުލުހުން މިއަދު ވޮއިސް އަށް މައުލޫމާތު ދިން ގޮތުގައި އެ ދޯނި އަދިވެސް ފެނިފައެއް ނުވެއެވެ.

މި ހާދިސާގައި ލޯންޗުން ދަތުރުކުރި ފަސް މީހަކަށް އެކިވަރުގެ އަނިޔާ ލިބިގެން އައިޖީއެމް ހޮސްޕިޓަލުގައި ވަނީ ފަރުވާ ދީފައެވެ. އަނިޔާވި މީހުންގެ ތެރޭގައި ހިމެނެނީ ހަތަރު ބިދޭސީ ފިރިހެނުންނާއި ދިވެހި ފިރިހެނެކެވެ.

މި މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.