ފެނަކަ ކޯޕަރޭޝަން ރައިޓްސައިޒް ކުރުމުގެ މަސައްކަތުގެ ތެރެއިން ރިޑަންޑަންސީ އުސޫލާ އެއްގޮތަށް އަމިއްލައަށް ވަކިވާން އެދުނު މުވައްޒަފުންނަށް އުސޫލުގެ ތެރެއިން ފައިސާ ދީފައިވާނޭކަމަށް ފެނަކައިން ބުނެފިއެވެ.

މިކަމާ ގުޅިގެން ދެކެެވެމުންދާ ވާހަކަތަކާ ގުޅިގެން ފެނަކައިން ނެރުނު ނޫސްބަޔާނުގައި ބުނެފައިވަނީ އަމިއްލައަށް އެދިގެން ވަކިވި އެކުންފުނީގެ މުއައްޒަފުންނަށް ހަތަރު މަހުގެ މުސާރައަށްވާ ފައިސާ ދީފައިވާ ކަމަށެވެ. އެގޮތުން އަމިއްލައަށް ވަކިވުމަށް 108 މުއައްޒަފަކު ހުށަހެޅިކަމަށް ވަނީ ބުނެފައެވެ.

ފެނަކައިން ބުނީ ކުންފުނީގެ މާލީ ޙާލަތު ރަނގަޅުކޮށް ދެމެހެއްޓެނިވި ގޮތެއްގައި ރައްޔިތުންނަށް ޚިދުމަތް ފޯރުކޮށްދިނުމުގެ ބޭނުމުގައި ރިޑަންޑަންސީ އުސޫލެއް އެކުލަވައިލީ މުވައްޒަފުންނަށް ޝަރަފުވެރިކަމާ އެކު އިނާޔަތަކާ އެކީ ވަކިވެވޭނެ މަގެއް ހޯދައިދިނުމުގެ މަޤުޞަދުގައި ކަމަށެވެ. އެގޮތުން މި ފުރުޞަތު މިދިޔަ ޖޫން މަހުގެ ދެ ވަނަ ދުވަހު ހުޅުވާލިކަން ފާހަގަކުރަމުން ފެނަކައިން ބުނީ، އެކަމުގެ ތަފުސީލް އިންޓާނަލް މެމޯއެއް މެދުވެރިކޮށް މުވައްޒަފުންނަށް އެންގި ކަމަށެވެ.

ވަކިވާން ބޭނުންވާ މުވައްޒަފުން ލިޔުމުން ޝައުޤުވެރިކަން ހުށަހެޅުމުން ކުންފުންޏާއި މުވައްޒަފާ ދެމެދު ވެވޭ އެއްބަސްވުމެއްގެ ދަށުން ވަޒީފާއިން ވަކިކުރާ ކަމަށް ފެނަކައިން ބުނެފައިވެއެވެ. އެ އެއްބަސްވުންތަކާ އެއްގޮތަށް ހަތަރު މަހުގެ މުސާރައަށްވާ ފައިސާ މިހާރު ދޫކޮށް ނިމިފައިވާ ކަމަށް ވެސް ބަޔާނުގައި ފާހަގަކޮށްފައިވެއެވެ.

ފެނަކައިން ބުނީ އެކުންފުނިން މުވައްޒަފުންނަށް އޮޅުވާލާ ކަމަށް ދޭހަވާ ގޮތަށް ބައެއް މީޑިއާތަކާއި ޢާންމު ފަރާތްތަކުން ފަތުރަމުން ގެންދަނީ ޙަޤީޤަތާ ޚިލާފު ވާހަކަތައް ދޮގުކޮށްފައެވެ. އެގޮތުން އެ ކުންފުނިން އެކަށައަޅާ އުސޫލަކާ ޚިލާފަށް ނުވަތަ އެއްވެސް ފަރާތަކަށް ގެއްލުންވާ ގޮތަށް ޢަމަލު ނުކުރާނެ ކަމުގެ ޔަޤީންކަން ވެސް ފެނަކައިން ވަނީ ދީފައެވެ.