ބޭންކް އޮފް މޯލްޑިވްސް (ބީއެމްއެލް)ގެ ސީއީއޯ އަދި މެނޭޖިން ޑައިރެކްޓަރު މުޙައްމަދު ޝަރީފް އޭޝިއަން ބޭންކަރސް އެސޯސިއޭޝަން (އޭބީއޭ)ގެ ޗެއާމަންކަމަށް އައްޔަންކުރައްވައިފިއެވެ.

ދިވެއްސަކު މި މަޤާމު ފުރައްވާ މިއީ ފުރަތަމަ ފަހަރެވެ. އޭބީއޭގެ ބޯޑުގެ ނިންމެވުމާ އެއްގޮތަށް ޝަރީފް ރަސްމީކޮށް މަޤާމާ ހަވާލުވެވަޑައިގެންފައިވަނީ މިއަދުން ފެށިގެންނެވެ. ޝަރީފް ވަނީ ކުރިންވެސް އެ ޖަމިއްޔާގެ ލީޑަޝިޕްގައި ޙަރަކާތްތެރިވެވަޑައިގެންފައެވެ. އެގޮތުން 2018 އިން 2020 އަށް ވައިސް ޗެއާމަންކަން އަދާކުރައްވައި ސަރަޙައްދީ މެންބަރު ބޭންކުތަކުގެ ގުޅުން ވަރުގަދަކުރެއްވުމާއި ޖަމިއްޔާގެ ސްޓްރެޓެޖިކް ލަނޑުދަނޑިތައް ހާސިލުކުރެއްވުމުގައި މުހިންމު ދައުރެއް އަދާކުރެއްވިއެވެ. އެ ލީޑަޝިޕަށް އޮތް އިތުބާރުގެ ސަބަބުން 2025 ވަނަ އަހަރު ވައިސް ޗެއާމަންކަމަށް އަނެއްކާވެސް އައްޔަންކުރެއްވީއެވެ.

ޗެއާމަންކަމަށް ހޮވިވަޑައިގަތުމާ ގުޅިގެން ޝަރީފް ވިދާޅުވީ "އޭޝިއަން ބޭންކަރސް އެސޯސިއޭޝަންގެ ބޯޑާއި މެންބަރު ބޭންކުތަކުން އަޅުގަނޑަށް ކުރައްވާފައިވާ އިތުބާރަށްޓަކައި ނުހަނު ޝުކުރުވެރިވަން. އަޅުގަނޑުގެ ތަޖުރިބާއާއެކު މި މަޤާމުގައި އޭބީއޭއަށް ޚިދުމަތްކޮށްދިނުމަކީ ލިބޭ ޝަރަފެއް. އަދި އުއްމީދަކީ ބޭންކުތަކުގެ މެދުގައި އޮތް ގުޅުން އިތުރަށް ބަދަހިކޮށް އޭޝިއާގެ ބޭންކިންގ ސިނާއަތުގެ ކުރިއެރުމަށް މަގުފަހިކުރުމަށްޓަކައި ބޯޑާއި ސެކްރެޓޭރިއަޓް އަދި މެންބަރު މުއައްސަސާތަކާ ގުޅިގެން ވީހާވެސް ގާތުން މަސައްކަތްކުރުން" ކަމަށެވެ.

އޭބީއޭގެ ސެކްރެޓަރީ ޓްރެޜަރާ ޑރ. ޑަރސަން ޗިއު ވަނީ ޝަރީފް ޖަމިއްޔާގެ އަސާސްތައް ހިފެހެއްޓެވުމަށް ކުރައްވާ ބުރަ މަސައްކަތް ފާހަގަކުރައްވައި ލަނޑުދަނޑިތައް ހާސިލުކުރެއްވުމުގައި ސެކްރެޓޭރިއެޓުގެ ފުރިހަމަ އެއްބާރުލެއްވުން ލިބިވަޑައިގަންނަވާނެ ކަމުގެ ޔަޤީންކަން ދެއްވައިފައެވެ.

1981 ވަނަ އަހަރު އުފެއްދި އޭބީއޭ އަކީ އޭޝިއާ ސަރަޙައްދުގެ ބޭންކުތަކާއި ބޭންކިން ޖަމިއްޔާތައް ތަމްސީލުކުރާ އެންމެ ބޮޑު އެއް ސަރަޙައްދީ މުއައްސަސާއެވެ. އެ ޖަމިއްޔާގެ މައިގަނޑު މަސައްކަތަކީ ބޭންކިން ދާއިރާގެ އިސްވެރިންނާއި ރެގިއުލޭޓަރުންނާއި ބައިނަލްއަޤުވާމީ މާލީ މުއައްސަސާތައް ގުޅުވައިދީ ސިޔާސަތު ކަނޑައެޅުމާއި ޤާބިލުކަން ބިނާކުރުމާއި ރަނގަޅު އުސޫލުތައް ހިއްސާކުރުމެވެ. މިއަހަރުގެ އޭބީއޭ ކޮންފަރެންސް ސެޕްޓެމްބަރު 1 އިން 3 އަށް ބީއެމްއެލްގެ ފަރާތުން ދިވެހިރާއްޖޭގައި ބާއްވާ ގޮތަށް ވަނީ ހަމަޖެހިފައެވެ.