ސަރުކާރު ސްކޫލްތައް އޭސީކުރުމަށް ހިންގާ ކޫލް ސްކޫލް މަޝްރޫޢު ލަސްވާ މައިގަނޑު ސަބަބަކީ ގިނަ ރަށްރަށުގެ ކަރަންޓު ވިއުގައިގައި އެ ވަރުގެ ލޯޑެއް ނެގޭނެ ޤާބިލުކަން ނެތުން ކަމަށް ފެނަކައިގެ މެނޭޖިން ޑިރެކްޓަރު މުޙައްމަދު އަފީފް ވިދާޅުވެއްޖެއެވެ.
ދިވެހިރާއްޖޭގެ އަޑުގެ "އަހާށޭ ބުނާނަން" ޕްރޮގްރާމުގައި ވާހަކަދައްކަވަމުން އަފީފް ވިދާޅުވީ ސްކޫލްތަކުގައި އޭސީ ބެހެއްޓުމުގެ ކުރިން ބައެއް ރަށްރަށުގެ ޑިސްޓްރިބިއުޝަން ވިއުގަ މުޅިން ބަދަލުކުރަން ޖެހޭ ކަމަށެވެ. އެ މަސައްކަތަށް ބޭނުންވާ ކޭބަލް ފަދަ ސާމާނު ރާއްޖެއިން ލިބެން ނެތުމުން ބޭރުން ގެންނަން ޖެހޭ ކަމަށާއި ގެންނަ ތަކެތީގެ ފެންވަރު ޔަގީންކުރުމަށް ފެނަކައިގެ މުވައްޒަފުން ރާއްޖެއިން ބޭރަށް ދާން ޖެހޭ ކަމަށް ވެސް އެ މަނިކުފާނު ވިދާޅުވިއެވެ.
"އަޅުގަނޑުމެން ރަށްރަށުގެ ސްކޫލުތަކުގައި އެއާކޮންޑިޝަން ހަރުކުރަން ބަލާއިރު އެ ސަރަހައްދެއްގެ ހުރިހާ ކްލާސްރޫމަކަށް ބޭނުންވާ އޭސީ ހަރުކުރަން ބޭނުންވާ ވަރުގެ ނެޓްވޯކެއް ނެތް. އަޅުގަނޑުމެންނަށް އެ ނެޓްވޯކް ފުޅާކުރެވޭނެ ގޮތެއް ވެސް ނެތް" އަފީފް ވިދާޅުވިއެވެ.
ސަރުކާރުގެ ހުރިހާ ސްކޫލެއްގެ ކްލާސްރޫމުތަކާއި ހޯލްތައް ދެ އަހަރު ތެރޭ އޭސީކުރުމުގެ އަމާޒުގައި 2024 ވަނަ އަހަރުގެ ޖޫން މަހު ފެށި މި މަޝްރޫޢު ފެނަކައާ ހަވާލުކޮށްފައިވަނީ 54 މިލިއަން ރުފިޔާއަށެވެ.
Advertisement
This content is created and paid for by advertisers and does not involve Voice Journalists
