އައްޑޫގެ ގުޅިފައިވާ ރަށްތަކުގެ ކަރަންޓުގެ ދަތިކަމަށް ދާއިމީ ޙައްލެއް ގެނައުމަށް ބޭރުގެ ކުންފުންޏަކާ ޙަވާލުކޮށްގެން ހިންގާ ސެންޓްރަލް ޕަވާ ސްޓޭޝަން (ސީޕީއެސް) މަޝްރޫޢުގެ ބޮޑު ބައެއް މި އަހަރު ތެރޭ ނިމި އެއްކޮށް ފުރިހަމަވާނީ އަންނަ އަހަރު ކަމަށް ފެނަކައިގެ މެނެޖިން ޑިރެކްޓަރު މުޙައްމަދު އަފީފް ވިދާޅުވެއްޖެއެވެ.
ދިވެހިރާއްޖޭގެ އަޑުގެ "އަހާށޭ ބުނާނަން" ޕްރޮގްރާމުގައި ވާހަކަ ދައްކަވަމުން އަފީފް ވިދާޅުވީ އެ މަޝްރޫޢު ރަނގަޅު ދުވެއްޔެއްގައި ކުރިއަށްދާ ކަމަށެވެ. މިދިޔަ އެޕްރީލް 17 ގައި ފެނަކައިގެ އެމްޑީ ކަމާ ޙަވާލުވެވަޑައިގެންނެވިއިރު ވެސް އެ މަޝްރޫޢު އޮތީ ފެށިފައި ކަމަށާއި ރައީސް ޑރ. މުޙައްމަދު މުޢިއްޒުގެ އިރުޝާދުގެ ދަށުން ސަރުކާރުން މި މައްސަލައަށް ޙައްލު ހޯދުމަށް ގިނަ މަސައްކަތްތަކެއް ކުރަމުން އަންނަ ކަމަށް އޭނާ ވިދާޅުވިއެވެ.
"އަޅުގަނޑު މި މަގާމާ ހަވާލުވެގެން އެ ޕްރޮޖެކްޓްގެ ކަންކަން ކުރިއަށްދާ ގޮތް ބެލިބެލުުމުގައި އަޅުގަނޑަށް ފާހަގަކުރެވުނީ ރަނގަޅު ސްޕީޑުގައި އެ މަސައްކަތް ކުރިއަށް އެބަދާ ކަމަށް" އަފީފް ވިދާޅުވިއެވެ.
ރާއްޖެ އިން ބޭރުގައި ޖަނަރޭޓަރުތައް އުފެއްދުމުގެ މަސައްކަތް މިހާރު ހިނގަމުންދާ ކަމަށާއި އެ މަސައްކަތް ކުރިއަށްދާ ގޮތް ބެލުމަށް ފެނަކައިގެ ޓީމެއް ވަރަށް އަވަހަށް ފޮނުވާނެ ކަމަށް ވެސް އެމްޑީ ވިދާޅުވިއެވެ. މީގެ އިތުރުން މަޝްރޫޢު ފެށުނު ފަހުން ބައެއް އިޞްލާޙުތައް ގެނައުމުގެ މަސައްކަތް ވެސް އައްޑޫގައި ތިބި ސީޕީއެސް ޕްރޮޖެކްޓުގެ ފަންނީ ބޭފުޅުންނާއި ހެޑް އޮފީހުގެ ފަންނީ ފަރާތްތައް ގުޅިގެން ކުރަމުން އަންނަ ކަމަށް އަފީފް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
