މިއަދުވެސް ރާއްޖޭގެ މޫސުން ގޯސްވާނޭކަމަށް މޫސުމާ ބެހޭ ޤައުމީ އިދާރާ، މޯލްޑިވްސް މީޓިއޮލޮޖިކަލް ސެންޓަރުން ބުނެފިއެވެ.

މެޓް އޮފީހުން މިއަދު ހެނދުނު ނެރެފައިވާ މޫސުމީ މައުލޫމާތަށް ބަލާއިރު، ރާއްޖޭގެ އެކި ހިސާބުތަކަށް ވިއްސާރަކޮށް ގުގުރުން އެކަށީގެންވާކަމަށް ވަނީ ލަފާކޮށްފައެވެ. ވައި ހުންނާނެކަމަށް ލަފާކޮށްފައިވަނީ، ގަޑިއަކު 13 މޭލާއި 23 މޭލާ ދެމެދުގެ ބާރުމިނެއްގައެވެ. އަދި ވިލާގަނޑުގައި 40 މޭލު ބާރުމިނުގައި ވައި ގަދަވުން އެކަށީގެންވާކަމަށް ވަނީ ބުނެފައެވެ.

ރާއްޖޭގެ ކަނޑުތައް ގަދަވާނޭކަމަށް ލަފާކޮށްފައިވާއިރު ރާޅުގެ އުސްމިން ހުންނާނޭކަމަށް ބެލެވެނީ 4 ފޫޓާއި 7 ފޫޓާ ދެމެދުގެ އުސްމިނެއްގައެވެ. 

މިހާރު ކުރަމުންދާ މޫސުމީ ވިއްސާރާގައި ވައި އެންމެ ގަދަވި ރަށްރަށުގެ ތެރޭގައި ހިމެނެނީ ފ.ނިލަންދޫ، ހދ.ކުޅުދުއްފުށި އަދި ބ.ދަރަވަންދޫ އާއި ކާށިދޫއެވެ. 

މޫސުް ގޯސްވެ އިއްޔެ ކަނޑުމަތީގެ ނުރައްކާތެރި ހާދިސާތައް ހިނގާފައިވާއިރު، މާފުށީ ތޮށިމައްޗަށް ސަފާރީއެއް އަރައި ސަފާރީ އެއްކޮށް ހަލާކުވިއިރު އަލިހުރަސްކަނޑަށް ކޮޅުވެއްޓިއެއް ފެތި ބަޔަކު ވަނީ ކަނޑުވެފައެވެ.