މި ދައުރުގެ ތެރޭގައި ކީރިތި ޤުރުއާނާ ބެހޭ މަރުކަޒުގެ މަސައްކަތްތައް މުޅި ރާއްޖެއަށް ފުޅާ ކުރެވިގެންދާނެ ކަމަށް އިސްލާމީ ކަންތައްތަކާއި އައުޤާފާ ބެހޭ ވަޒީރު ޑރ މުހައްމަދު ޝަހީމް ޢަލީ ސަޢީދު ވިދާޅުވެއްޖެއެވެ. 

މަޖިލީހުގެ މިއަދުގެ ޖަލްސާގައި މެންބަރަކު ކުރެއްވި ސުވާލަށް ޖަވާބު ދެއްވަމުން ޝަހީމް ވިދާޅުވީ، ގުރުއާނާ ބެހޭ މަރުކަޒުގެ މަސައްކަތްތައް މުޅި ރާއްޖެއަށް ފުޅާ ކުރުމަކީ ސަރުކާރުގެ ވަރަށް ބޮޑު އަމާޒެއް ކަމަށެވެ. 

ޝަހީމް ވިދާޅުވީ މިހާރު ކުރިއަށްދަނީ އެކަމަށްޓަކައި ކުރަންޖެހޭ އިދާރީ މަސައްކަތްތައް ކަމަށެވެ. އަދި ގުރުއާނާ ބެހޭ މަރުކަޒުގެ ކްލާސްތައް ވަރަށް ގިނަ ރަށްރަށުގައި ހިންގުމުގެ މަސައްކަތް މިހާރުވެސް ކުރިއަށްދާ ކަމަށާ މިއަހަރު ތެރޭގައި އެ ކްލާސްތައް ހުޅުވިގެންދާނެކަން ވަޒީރު ފާހަގަކުރެއްވިއެވެ. 

”މި އަހަރުގެ ތެރޭގައި ވަރަށް ގިނަ ރަށްރަށުގައި ހުޅުވިގެންދާނެ. މި ދައުރުގެ ތެރޭގައި ހުރިބާ ރަށެއްގައިވެސް ގުރުއާނާ ބެހޭ މަރުކަޒުގެ މަސައްކަތެއް އޮންނާނެ ގޮތަށް އިރާދަކުރެއްވިއްޔާ ތަރުތީބު ކުރެވިގެންދާނެ“ ޑރ. ޝަހީމް ވިދާޅުވިއެވެ.

މަޖިލީހުގެ މިއަދުގެ ޖަލްސާގެ ތެރެއިން- ފޮޓޯ/ މަޖިލިސް

މީގެ އިތުރުން ޝަހީމް ވަނީ ރަށްރަށުގައި އިސްލާމީ މަރުކަޒުތައް ބިނާ ކުރުމަށް ކުރެވެމުންދާ މަަސައްކަތްތަކަށްވެސް މިއަދު އަލިއަޅުވާލައްވާފައެވެ.

އެގޮތުން ވިދާޅުވީ، އިސްލާމީ މަރުކަޒުތަކުގެ އައު ޑިޒައިންތައް ތައްޔާރު ކުރެވެމުންދާ ކަމަށާ، އެ ޑިޒައިންތައް ބިނާ ކޮށްފައިވަނީ އެ ރަށާ ގުޅޭ ގޮތަށް ކަމަށެވެ. އަދި މީގެ ކުރިން ބައެއް ރަށްރަށުގައި ހުރި އިސްލާމީ މަރުކަޒުތައް އެ ރަށަށް ބޭނުންވާ ވަރަށްވުރެ ބޮޑުކޮށް ހުރިކަން ފާހަގަކުރައްވައި ޝަހީމް ވަނީ ދެން ބިނާ ކުރާ މަރުކަޒުތައް ހުންނާނީ އެކަންކަމަށް ބަލައި، ޑިޒައިން ކުރެވިފައިކަމަށް ވިދާޅުވެފައެވެ.