ހުޅުމާލޭގެ ދެވަނަ ފިޔަވަހީގައި އެސްޖޭ ކޮންސްޓްރަކްޝަނުން ބިނާކުރަމުން އަންނަ މިސްކިތް ނިންމުން ލަސްވާ މައްސަލާގައި، އެ ކުންފުނީގެ ދިފާޢުގައި އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ނުކުންނަވައިފިއެވެ. 

ރައްޔިތުންގެ މަޖިލީހުގެ މިއަދުގެ ޖަލްސާގައި ހުޅުމާލެ އުތުރު ދާއިރާގެ މެންބަރު ޙުސައިން ޝަރީފު ކުރެއްވި ސުވާލަކަށް ޖަވާބު ދެއްވަމުން ވަޒީރު ވިދާޅުވީ، އެ މިސްކިތް ބިނާކުރުމުގެ ކަންކަމާގުޅޭ އިދާރީ މަސައްކަތާއި އަދި މިސްކިތުގެ ޑިޒައިނާއި ގުޅިގެން، މަސައްކަތްކުރިއަށް ގެންދާ ކުންފުންޏަށް ބޮޑެތި ދަތިތަކާ ކުރިމަތިލާންޖެހިފައިވާ ކަމަށެވެ.

އެހެންކަމުން އެޗްޑީސީއާއި އެހެނިހެން އިދާރާތަކާއި މަޝްވަރާކޮށް، އެ ގޮންޖެހުންތަކާއި ދަތިތަކަށް މިހާރު ހައްލު ހޯދިފައިވާ ކަމަށް ޝަހީމް ވިދާޅުވިއެވެ. 

މަޖިލީހުގެ މިއަދުގެ ޖަލްސާގައި، ވަޒީރު ޝަހީމް މެންބަރުންގެ ސުވާލު ތަކަށް ޖަވާބު ދެއްވަނީ- ފޮޓޯ/ މަޖިލިސް

"އެހެންކަމުން އިންޖިނޭރުންގެ އާ ނަޒަރިއްޔާތަކާ އެކުގައި އެ ޑިޒައިނަށް މިހާރު ވަނީ ބަދަލުތަކެއް ގެންނަވާފައި އެޗްޑީސީއާ މަޝްވަރާކުރެވިގެން އަޅުގަނޑުމެން މި އުއްމީދުކުރަނީ الله އިރާދަކުރެއްވިއްޔާ މިއަހަރު ނިމުމުގެ ކުރިން އެ މަޝްރޫއު ނިމޭނެކަމަށް. އަމަލީ ގޮތުން މިހާރު ކުރިއަށް އެބަދޭ މަސައްކަތް. އިރާދަކުރެއްވިއްޔާ އެ މަސައްކަތް ނިންމުމަކީ މި ސަރުކާރުގެ ޢަޒުމެއް. އަޅުގަނޑުމެން އެ މަސައްކަތް ނިންމާފައި އެތަން ހުޅުވައިދޭނަން އިންޝާ الله" ޝަހީމް އިތުރަށް ވިދާޅުވިއެވެ.

އެސްޖޭ ކުންފުނިން ހުޅުމާލޭގައި އަޅާ މިސްކިތް- ފޮޓޯ/ ވޮއިސް

ހިޔާ ފްލެޓުތައް ކައިރީ ސަލާޙުއްދީން ސްކޫލާ ޖެހިގެން އޮންނަ ބިމުގައި އެ މިސްކިތް ބިނާކުރުމުގެ އެއްބަސްވުމުގައި އިސްލާމީ ކަންތައްތަކާ ބެހޭ ވުޒާރާއާއި އެސްޖޭ ކޮންސްޓްރަކްޝަނާ ދެމެދު ސޮއިކޮށްފައި ވަނީ ޖެނުއަރީ 2022 ގައެވެ.

އެ މިސްކިތް ބިނާކުރަން އެސްޖޭ ކުންފުންޏާ ހަވާލުކުރީ މާލޭގެ ޒިކުރާ މިސްކިތް ހެދުމަށް އެސްޖޭއާ އެކު ހެދި އެއްބަސްވުން ބާޠިލުކުރުމުން ބަދަލުގެ ގޮތުގައި 141 މިލިއަން ރުފިޔާ ހޯދަން އެ ކުންފުނިން ހުށަހެޅުމާ ގުޅިގެން ކުރީ ސަރުކާރާއެކު ވެވުނު ސެޓްލްމަންޓް އެގްރީމެންޓެއްގެ ދަށުންނެވެ.

އެ އެއްބަސްވުމުގެ ދަށުން 420 ދުވަހުގެ ތެރޭގައި މަސައްކަތް ނިންމަން ކަނޑައެޅި ނަމަވެސް އެ މުއްދަތު ފާއިތުވެ ތިން އަހަރުވެގެން ދިޔައިރުވެސް މިސްކިތް ނުނިމެއެވެ. 

އެސްޖޭ މިސްކިތް ނުނިންމާ އެ ކުންފުނިން އެ ސައިޓް އެހެން ބޭނުންތަަކަށް ގެންނަ މުދާ ބަަހައްޓާ ތަނަކަށް ހަދާފައިވާތީއާ މިސްކިތް ނުނިމި ދިގުލައިގެންދާތީ އާންމުން ފާޑުކިޔާތާވެސް އެތައް ދުވަހެއް ވެއްޖެ އެވެ.

އެ މިސްކިތް ނިންމުމުގެ އެންމެ ފަހު ތާރީހެއްގެ ގޮތުގައި އެކުންފުންޏަށް ދީފައިވަނީ މިދިޔަ ޑިސެމްބަރުމަހެވެ.