ދިވެހިރާއްޖޭގެ ވެރިކަމުގެ ނިޒާމަށާއި ގާނޫނުއަސާސީއަށް ބަދަލުތައް ގެނައުމަށް ކުރީގެ ރައީސް މުޙައްމަދު ނަޝީދު އާއި އެމްޑީޕީގެ ކުރީގެ ޗެއާޕާސަން ފައްޔާޒު އިސްމާއީލް އިސްވެ ފެއްޓެވި "ބޮޑުބަދަލު" އަށް ތާއީދު ނުކުރައްވާ ކަމަށް ކުރީގެ ރައީސް އަބްދުالله ޔާމީން އަބްދުލް ޤައްޔޫމް ވިދާޅުވެއްޖެއެވެ.
”ސަންގު“ ޓީވީއަށް ދެއްވި ޚާއްސަ ބަސްދީގަތުމެއްގައި ރައީސް ޔާމީން ވިދާޅުވީ ނަޝީދުގެ ވިސްނުންފުޅަކީ ރާއްޖޭގެ ވެރިކަން ބަރުލަމާނީ ނިޒާމަކަށް ފުރޮޅާލުން ކަަމަށެވެ. އެއީ އެމަނިކުފާނު ބޭނުންފުޅުވާ ގޮތް ނޫން ކަމަށާ އެ ގޮތަށް ތާއީދު ވެސް ނުކުރައްވާނެ ކަމަށް ވިދާޅުވި އެވެ.
"ބޮޑު ބަދަލު" ގެ ނަމުގައި ވެސް ކުރައްވަނީ އެ މަަސަައްކަތްކަން ފާހަގަކުރައްވާ ޔާމީން ވިދާޅުވީ އެ ބަދަލަށް ތާއީދު ނުކުރައްވާނެ ކަމަށެވެ. އަދި އެ ނިޒާމަކީ ރާއްޖޭގައި ވޯކް ކުރާނެ ނިޒާމެއް ނޫން ކަމަށް ވެސް ވިދާޅުވި އެވެ.
އެ ސަބަބުވެސް ވިދާޅުވެ ދެއްވި އެވެ.
"[ވެރިކަމުގެ ބާރުތައް] ދެ މީހެއްގެ އަތުގައި [ރައީސުލްޖުމްްހޫރިއްޔާ އާއި ބޮޑުވަޒީރުގެ އަތުގައި] އޮންނާކަށް ނުޖެހޭ. ދެން އަޅުގަނޑެއް ގަބޫލެއް ނުކުރަން ރާއްޖެ ތައްޔާރު ކަމަކަށް ވެސް ބަރުލަމާނީ ނިޒާމަކަށް،" ޔާމީން ވިދާޅުވި އެވެ.
"ބޮޑުބަދަލު"އާ ގުޅޭ މައުލޫމާތު ދިނުމަށާއި، އެއަށް ރައްޔިތުންގެ ހިޔާލު ހޯދުމަށް ހާއްސަ ވެބްސައިޓެއް މިއަދު ވަނީ އިފްތިތާހު ކޮށްފަ އެވެ. އެމްޑީޕީން ވަނީ އަލަށް ލޯންޗުކުރި ވެބްސައިޓް މެދުވެރިކޮށް ވީހާވެސް ގިނަ ރައްޔިތުން އެ ބޭފުޅުންގެ ހިޔާލާއި މަޝްވަރާ ހިއްސާކުރުމަށް އެދިފައެވެ.
Advertisement
This content is created and paid for by advertisers and does not involve Voice Journalists
