ބާސެލޯނާގެ ސެންޓަރ ބެކް ރޮނާލްޑް އަރައޫހޯ ކުރިއަށް އޮތް ސީޒަނުގެ ނިޔަލަށް ލޯނު އެއްބަސްވުމެއްގެ ދަށުން ލިވަޕޫލާ ގުޅުމަށް ކުއްލި ގޮތަކަށް ނިންމައިފިއެވެ.

އުމުރުން 27 އަހަރުގެ އުރުގުއާއީ ޑިފެންޑަރަކީ 2031 ވަނަ އަހަރާ ހަމައަށް ބާސެލޯނާއާ އެކު ކޮންޓްރެކްޓެއް އޮތް ކުޅުންތެރިއެކެވެ. ނަމަވެސް މިފަހަރު ލިވަޕޫލާ ގުޅެނީ މި ސީޒަން ނިމެންދެން ލޯނު އުސޫލުންނެވެ.

ލިވަޕޫލުން ތަޖުރިބާކާރު ޑިފެންޑަރެއް ހޯދަން ޖެހުނީ ޑިފެންސް ލައިނަށް ދިމާވި ގިނަ މައްސަލަތަކެއްގެ ސަބަބުންނެވެ. އެ ޓީމުގެ މުހިންމު ސެންޓަރ ބެކް އިބްރަހިމާ ކޮނާޓޭ ވަނީ ރެއާލަށް ބަދަލުވެފައެވެ. ރެންސް އިން ގެނައި 21 އަހަރުގެ ޖެރެމީ ޖެކޭ، ކޮނޑުގެ ސާޖަރީއަކަށް ފަހު މިދިޔަ ސީޒަނުގެ ބޮޑު ބައެއް ގެއްލުނުއިރު ޕްރީ ސީޒަނުގެ ޙަރަކާތްތަކުގައި ވެސް ބައިވެރިއެއް ނުވެއެވެ. ޖެކޭ އަކީ ސީނިއާ ލެވެލްގައި 100 މެޗު ވެސް ހަމަނުވާ ކުޅުންތެރިއެކެވެ. ހަމައެއާ އެކު ޖޯ ގޯމޭޒަށް ޕްރީ ސީޒަނުގެ ފުރަތަމަ މެޗުގައި މަސްގަނޑުގެ އަނިޔާއެއް ލިބުނުއިރު ޒުވާން ޖިއޮވާނީ ލިއޯނީ އަދި ހުރީ އަނިޔާއިން ރަނގަޅުވުމުގެ މަރުހަލާގައެވެ. މި ހާލަތުގައި ކޯޗު އެންޑޯނީ އިރައޯލާގެ ޓީމުގެ ފިޓް ހަމައެކަނި ސީނިއާ ސެންޓަރ ބެކަކީ ކެޕްޓަން ވާޖިލް ފެން ޑައިކެވެ.

2018 ވަނަ އަހަރު ބާސެލޯނާގެ ބީ ޓީމާ ގުޅި 2019 ގައި ސީނިއާ ޓީމަށް ޕްރޮމޯޓްވި އަރައޫހޯ ވަނީ ނޯ ކޭމްޕްގައި 200 އަށް ވުރެ ގިނަ މެޗު ކުޅެދީފައެވެ. މިދިޔަ ޖެނުއަރީގައި ގޯލްކީޕަރު މާކް-އަންދްރޭ ޓާ ސްޓޭގަން ކްލަބު ދޫކޮށްލުމުން ޓީމުގެ ކެޕްޓަންކަން ވެސް އޭނާއަށް ލިބުނެވެ. އެހެންނަމަވެސް ޑިޕްރެޝަނާ ގުޅިގެން 2025 ވަނަ އަހަރުގެ ނޮވެމްބަރުން ފެށިގެން ދުވަސްތަކެއް ވަންދެން ފުޓްބޯޅައާ ދުރުގައި ހުރުމަށް ފަހު އެނބުރި އައިސް ނިމިގެންދިޔަ ސީޒަނުގެ ސްޕެނިޝް ލީގުގައި އޭނާއަށް ކުޅެވުނީ އެންމެ 11 މެޗެވެ.