ކިތަންމެ ހޫނުގަދަ މޫސުމެއް ނަމަވެސް ހަމަސް ނުފުރޭ ތުއްތު ކުދިންގެ ކަރުހިއްކުން ފިލުވުމަށް ފެން ބޭނުން ނުވާނޭކަމަށާއި، ދެކެވޭ އެފަދަ ވާހަކަތަކުގެ ހަގީގަތަށް ސަމާލުވުމަށް އެޗްޕީއޭއިން އިލްތިމާސްކޮށްފިއެވެ.

ހަމަސްނުވާ ތުއްތުކުދިން ކަރުހިއްކުން ފިލުވުމަށް ފެން ޖެއްސުމަކީ ބައެއް މީހުން ކޮށްއުޅޭ ކަމެކެވެ. މިކަމާ ގުޅޭގޮތުން އެޗްޕީއޭއިން ސޯޝަލް މީޑިއާގައި ކުރި ޕޯސްޓެއްގައި ވަނީ މިކަމުގެ ހަގީގަތް ސާފްކޮށްދީފައެވެ. އެޗްޕީއޭއިން ބުނީ، ކިތަންމެ ހޫނު މޫސުމެއް ކަމުގައި ވީނަމަވެސް ތުއްތު ކުދިންނަށް 6 މަސްވުމުގެ ކުރިން ފެން ބޭނުން ނުވާނޭކަމަށެވެ.

އެގޮތުން މައިމީހާގެ ގާތުން ދޭ ކިރުގެ 88 އިންސައްތައަކީ ފެންކަމުގައިވާތީ، ދަރިފުޅުގެ ކަރުހިއްކުން ފިލުވުމަށް ގާތުންދޭ ކިރު ފުދޭނޭކަމަށް އެޗްޕީއޭގެ އިރުޝާދުގައި ވަނީ ބުނެފައެވެ.

އެޗްޕީއޭއިން ބުނީ މައިމީހާގެ ކިރަކީ ތުއްތު ކުއްޖާގެ އުމުރުން ފުރަތަމަ ހަ މަސްދުވަހުގެ ތެރޭގައި ހަށިގަނޑަށް ބޭނުންވާ ހުރިހާ ހަކަތައަކާއި، ކާނާގެ މުހިންމު މާއްދާތަކުގެ އިތުރުން ހަށިގަނޑަށް ބޭނުންވާ ފެން ވެސް ފުރިހަމައަށް ފޯރުކޮށްދޭ އެއްޗެއް ކަމަށެވެ. 

މޫސުން ހޫނު ދުވަސްވަރެއް ނަމަ، 6 މަސް ނުވާ ކުދިންނަށް އާދައިގެ މަތިން ކިރުދޭ ވަރަށް ވުރެ ގިނައިން ކިރުދިނުން މުހިންމުކަމަށްވެސް ވަނީ ފާހަގަކޮށްފައެވެ.

ހަމަސްނުވާ ތުއްތު ކުދިންނަށް ފެން ދިނުމަކީ އެކުދިންގެ ސިއްހަތަށް ވަރަށް ނުރައްކާތެރި ކަމެކެވެ. މިއީ އާއްމުކޮށްވެސް ޑޮކްޓަރުން މައިންނަށް އެންމެ ގިނައިން ދޭ އެއް ނަސޭހަތެވެ. ޑޮކްޓަރުން ލަފާދެއްވަނީ މި ދުވަސްވަރު ދަރިފުޅަށް ހަމައެކަނި މައިކިރު ނުވަތަ މައިމީހާ ގާތުން ނުދެވޭނަމަ ފޯމިއުލާ ކިރު ދިނުމަށެވެ.

އެއީ ކުއްޖާގެ ހަށިގަނޑަށް ބޭނުންވާ ހުރިހާ ފެނެއް އޭގެއިން ލިބޭތީއެވެ. ހަމަސް ނުފުރޭ ކުދިންނަށް ފެން ނުދޭން ޑޮކްޓަރުން ލަފާދެއްވާ މައިގަނޑު އެއް ސަބަބަކީ ފެން ވިހަވުން ފަދަ ކަމެއް ކުރިމަތިވެދާނެތީއެވެ. އެގޮތުން މި އުމުރުގައި ކުދިންގެ ކިޑްނީ ފުރިހަމައަށް ހެދިބޮޑުނުވާތީ، ހަށިގަނޑަށް އެތެރެވާ އިތުރު ފެން ބޭރުކުރުމުގެ ގާބިލުކަން ނުހުރުމަކީ މައިގަނޑު އެއް ސަބަބަބެވެ.