އިރާނާއި އެމެރިކާ ދެޤައުމުގެ ގުޅުން ގޯސްވެފައިވަނިކޮށް އަނެއްކާވެސް ދެ ޤައުމުން ސުލްހައިގެ މަޝްވަރާތައް ފެށުމަށް ތައްޔާރުވަމުންދާކަމަށް މީޑިއާގެ ރިޕޯޓްތައް ބުނެފިއެވެ.

އަލްޖަޒީރާއިން ބުނެފައިވަނީ، ހޮރްމުޒް ކަނޑުއޮޅި މައްސަލާގައި އެމެރިކާ އާއި އީރާނުން ސީދާ މަޝްވަރާތައް ފެށުމަށް ތައްޔާރުވަމުންދާކަމަށެވެ. އެގޮތުން ހޮރްމުޒް ކަނޑުއޮޅިއާ ގުޅޭގޮތުން އޮމާނާއެކު އެކުލަވާލާފައިވާ އެއްބަސްވުމަކަށް އަމަލުކުރުމާ މެދު އީރާނުގެ ކަމާބެހޭ އިދާރާތަކުން ގޮތްތަކެއް ނިންމަމުންދާކަމަށް ހަބަރުތައް ލިބެއެވެ.

ނަމަވެސް މިކަމުގައި ކުރިއަށް ދެވެން އަންނަނީ ނުވަތަ އީރާނުން އެއްބަސްވުމަކަށް ދީލާލާނީ އެޤައުމުން އެދޭ ލުއިތަކެއް އެމެރިކާއިން ދިނުމުންކަމަށް އީރާނުގެ އޮފިޝަލުން ބުނެފައިވާކަމަށްވެސް ރިޕޯޓްތައް ބުނެއެވެ. އީރާނުގެ ޚާރިޖީ ވަޒީރު އައްބާސް އަރަގްޗީ ހޮނިހިރު ދުވަހު ވިދާޅުވީ، އޮމާނާއެކު ވެވޭ އެއްބަސްވުމުގެ ދެލިކޮޕީ މިހާރު އޮތީ ނިމުމަކާ ހަމައިގަ ކަމަށެވެ. އެހެންނަމަވެސް، ކަނޑުއޮޅި ފުރިހަމައަށް ހުޅުވާލުން ބިނާވެފައި އޮތީ، ޖޫން މަހު ސޮއިކުރި ފަހުމުނާމާގައި އެމެރިކާއިން ވެފައިވާ ވަޢުދުތަކަށް އެ ގައުމުން އިޙްތިރާމްކޮށް، އެ ވަޢުދުތައް ފުއްދުމުގެ މައްޗަށް ކަމަށް އޭނާ ވިދާޅުވިއެވެ. މީގެ ކުރިން އެމެރިކާއިން އެ ފަހުމުނާމާގެ އުސޫލުތަކާ ޚިލާފުވެފައިވާ ކަމަށްވެސް އޭނާ ވަނީ ފާހަގަކުރައްވާފައެވެ.

މިކަމާ ގުޅޭގޮތުން ބައިނަލްއަޤްވާމީ އެކިއެކި ފަރާތްތަކުން ދަނީ ދެފަރާތުގެ ދެމެދުގައި ސުލްހަ ގާއިމްކުރުމަކީ މިހިނދަށް ކޮންމެހެންވެސް ބޭނުންވާ ކަމެއްކަމަށް ބުނެފައެވެ. އީރާނާ އެމެރިކާ ގުޅުން ރަނގަޅުކުރުމަށް މިފަހުން އެންމެބޮޑަށް ހަރަކާތްތެރިވާ އެއް ޤައުމަކީ ޕާކިސްތާނެވެ. އެގޮތުން ޕާކިސްތާނުން ދަނީ މަޝްރަހު ފިނިކުރުމަށް އީރާނާ އެމެރިކާ އާ ދެމެދު މެދުވެރިއެއްގެ ރޯލް އަދާކުރަމުންނެވެ.